الإصحاح 21
1
و كِي تْفَرَقْنَا عْلِيهُمْ ڤَلَعْنَا ورَوَحْنَا نِيشَانْ لْكُوسَ، وفَالْريُومْ الْتَّالِي لْرُودُس، ومَنْ تَمَا لْبَاتَرَا.
2
لْڤِينَا بَابُورْ رَايَحْ لْفِينِيقِقَة طْلَعْنَا فِيهْ وڤَلَعْنَا.
3
مَنْ بَعْدْ فَتْنَا عْلَى قُبْرُسْ، أَلِي كَانَتْ عَلْ لِيسْرَى وسَافَرْنَا لْسُورِيَّة، وكِي لْحَڤْنَا لْصُور وهَوَّدْنَا فِيهَا عْلَى بَاشْ يْهَوْدُوا الْسَلْعَة أَلِي كَانَتْ فالْبَابُورْ.
4
حَوَسْنَا عْلَى الْتْلاَمِيذْ وڤْعَدْنَا عَنْدْهُمْ سَبْعْ إِيَّامْ. وكَانُوا يَنَصْحُوا بُولُس بَالْرُّوحْ مَا يَطْلَعْشْ لأُورُشَلِيمْ.
5
وكِي كَمْلَتْ لِيَّامْ أَلِي فَوْتْنَهَا خْرَجْنَا نْكَمْلُوا الْسْفَرْ تَعْنَا، ورَافْڤُونَا مْعَ نْسَاهُمْ ووْلاَدْهُمْ لْبَرَى لْمْدِينَة. و رْكَاعْنَا فَالشَّاطِئ وصَلِينَا.
6
وكِي وَدَّعْنَاهُمْ طْلَعْنَا لْبَابُورْ. و هُمَا رَاجْعُوا لَدْيَارْهُمْ.
7
وكَمَلْنَا اَلسْفَرْ بْحَارْ مَنْ لْصُورْ، حَتَّى لْبُتُولِمَايِس، سَلَّمْنَا عْلَى الْخُوتْ وفَوَتْنَا عَنْدْهُمْ نْهَارْ وَاحَدْ.
8
وفَالْغَدْ خْرَجْنَا ورَوَحْنَا لْقَيْصَرِيَّة، ودْخَلْنَا ضْيَافْ لْدَارْ فِيلِبُّسْ اَلْمُبَشِّرْ، أَلِي كَانْ وَاحَدْ مَنْ الْسَبْعَة لَمْدَبْرِينْ.
9
وكَانْ عَنْدَهْ رَبْعَة شِيرَاتْ كُلْهُمْ يَتْنَبْاُو.
10
وفَوَتْنَ عَنْدَهْ شْحَالْ مَلْلِيَّامْ ، حَتَّى لْحَڤْ مَنْ الْيَهُودِيَّة نْبِي أَسْمَه أَغَابُوس.
11
جَا لْعَنْدْنَا، ورْفَدْ لَحْزَامْ تَعْ بُولُس، ورْبَطْ يَدِيهْ و كَرْعِيه وڤَالْ: " الْرُّوحْ الْقُدُسْ يْڤُولْ: الَراجَلْ مُولْ هَدْ لَحْزَامْ، هَكْدَا يَرَبْطُوهْ لِيهُودْ فِي أُورُشَلِيمْ ويَسْلْمُوهْ فِي يَدِينْ الأُمَمْ".
12
وكِي سْمَعْنَا هَدْ لَكْلاَمْ طْلَبْنَا مَنَه حْنَا صْحَابَه و الْخُوتْ أَلِي مَلْ لَمْدِينَة بَاشْ مَا يَطْلَعْشْ لأُورُشَلِيمْ.
13
وجَوَابْنَا بُولُسْ: " شَارَاكُمْ أَدِيرُوا؟ تَبْكُوا وتَكْسْرُوا ڤَلْبِي، عْلَى خَاطَرْ رَانِي وَاجَدْ مَاشِي نَتَرْبَطْ بَارْكْ وَاجَد حَتَّى نْمُوتْ فِي أُورُشَلِيمْ عْلَى جَالْ آسْمْ يَسُوعْ ".
14
وكِي مَا تْقَنَعْشْ سْكَتْنَا وڤُولْنَا: لِتَكُنْ مَشِيئَة الْرَّبْ".
15
وبَعْدْ هَادُوكْ لِيَامْ وَجَدْنَا وَطْلَعْنَا لأُرْشَلِيمْ.
16
وجَا ثَانِى نَاسْ مَتْلاَمَذْ مَنْ قَيْصَرِيَةْ جَابُونَا عَنْدْ مَنَاسُونْ، وهُوَ رَجُلْ مَنْ قُبْرُسْ، تَلْمِيذْ قْدِيمْ بَاشْ نْبَاتُو عَنْدَهْ.
17
وكِي وْصَلْنَا أُورُشَلِيمْ قَبْلُونَا الْخُوتْ بَالْفَرْحْ.
18
وفَالْيُومْ الْتَّالِي دْخَلْنَا مْعَ بُولُس عَنْدْ يَعْقُوبْ، وكَانُوا ڤَاعْ الْشْيَاخْ مَجَمْعِينْ.
19
مَنْ بَعْدْ مَا سَلَّمْ عْلِيهُمْ بْدَى يَحْكِي خَطْوَة بْخَطْوَة ڤَاعْ الْشِي أَلِي دَارَه الله فَالاُمَمْ بَالْخِدْمَة تَعَهْ.
20
كِي سَمْعُوا كَانُوا يْمَجْدُوا آلْرَّبْ. وڤَالُوا لَهْ: " أَنْتَ تَعْرَفْ يَا خُونَا شْحَالْ مَنْ الْيَهُودْ أَلِي آمْنُوا، وهُمَا مَزَالْ مَتْحَمْسِينْ لْشَرِيعَة.
21
ورَاهُمْ سَمْعُوا عْلِيكْ بَلِي رَاكْ تْعَلَمْ الْيَهُودْ أَلِي رَاهُمْ بِينْ الأُمَمْ يَتْخَلاَوْ عْلَى مُوسَى، وتْوَصِهُومْ بَاشْ مَا يَخْتْنُوشْ أَولاَدْهُمْ ومَا يَمْشِيوشْ بْالَعْوَايَدْ.
22
وَاشْ نْدِيرُوا ضُورْكْ؟ رَايْحِينْ يَسْمْعُوا بَلِي رَاكْ جَيتْ،
23
دِيرْ كِمَا نْڤُولُوا لَكْ: عَنْدْنَا رَبْعَة رْجَالْ عَنْدْهُمْ وَعْدْ لله.
24
أَدِيهُمْ مْعَاكْ و تْطَهَّرْ مْعَهُمْ وخَلَّصْ عْلِيهُمْ بَاشْ يْحَسْنُوا رِسَانْهُمْ، و يَعْرْفُوا ڤَاعْ بَلِي الْشِي أَلِي سَمْعُوهْ عْلِيكْ مَاشِي صَّحْ، وحَتَّى أَنْتَ تَمْشِي بَالْشَرِيعَة.
25
والْمُومْنِينْ أَلِي مَاشِي مَلْ لِيْهُودْ، رَانَا رْسَلْنَالْهُمْ حْنَا بْرِيَّة نْوَصِوْهُمْ فِيهَا، بَاشْ مَا يَكْلُوشْ مَنْ لْحَمْ الْذْبَايَحْ، ومَا يَشَرْبُوشْ الْدَّمْ، ومَا يَكْلُوشْ اَلْحَيَوَانْ اَلْمَخْنُوڤْ، ويْبَعْدُوا عَالْزْنَا".
26
وهَكْدَا كَانْ، فَالْيُومْ الْتَّالِي أَدَهُمْ بُولُسْ مْعَهْ، وتَطَهَّرْ مْعَهُمْ و دْخَلْ اَلْهَيْكَلْ، يْخَبَرْ بَالْتَارِيخْ أَلِي تَكْمَلْ فِيهْ يَامَاتْ اَلْتَّطْهِيرْ، والْصَدْقَة تَعْ كُلْ وَاحَدْ.
27
وڤْبَلْ مَا تَكْمَلْ اَلْسَبْعْ إِيَّامْ، شَافُوهْ اَلْيَهُودْ تَعْ أَسِيَّا فَالْهَيْكَلْ، وهَيْجُوا النَّاسْ عْلِيهْ، حَكْمُوهْ
28
ويْزَڤُوا: يَا نَّاسْ إِسْرَائِيلْ! هَدَا هُوَ الْرَّاجَلْ أَلِي يْعَلَّمْ فِي كُلْ مْكَانْ ضَدْ الْشَّعْبْ والْشَرِيعَة و الْهَيْكَلْ، حَتَّى دَخَّلْ يُونَانِيِّينْ لْهَيْكَلْ ونَجَّسْ هَدْ لَمْكَانْ الَمْقَدَّسْ".
29
عْلَى خَاطَرْ شَافُوا مْعَهْ فْلَمْدِينَة تُرُوفٍيمُسْ الأَفَسُوسِي، وكَانُوا حَاسْبِينْ بُولُسْ أَدَاهْ الْهَيْكَلْ.
30
هَاجَتْ ڤَاعْ لَمْدِينَة، وهَجْمُوا عْلَى بُولُسْ وجَرُّوهْ خَارَجْ الْهَيْكَلْ، و تَمْ تَمْ تْغَلْقَتْ الْبِيبَانْ.
31
ومَلِي كَانُوا بَاغْيِينْ يَقْتْلُوهْ، وْصَلْ لَخْبَرْ لْرَايَسْ الْكَتِيبَة بَلِي كَايَنْ فَوْضَى كْبِيرَة فِي أُورُشَلِيمْ
32
وتَمْ تَمْ أَدَى قِيَادْ مِيَة عَسْكَرْ ولْعَسْكَرْ وهَوَّدْ لِيهُمْ. مَلِي شَافُوا اَلرَايَسْ والْعَسْكَرْ حَبْسُوا مَنْ ضَرْبْ بُولُسْ.
33
وتْقَرَبْ الْرَايَسْ وحَكْمَهْ، وڤَيْدَّهْ بَسْلاَسَلْ، وسْأَلْهُمْ : يَادْرَى شْكُونْ هَدَا؟ ووَاشْ دَارْ؟
34
وكَانُوا وَاحْدِينْ يْزَڤُوا بْشِي و وَاحَدْ أُخْرِينْ بْشِي بْشِي أَخَرْ. وكِيمَا قْدَرْشْ يَفْهَمْ مَنْ الْفَوْضَى، أَمَرْ يَدُوهْ الْثَكَنَة.
35
وكِي وَصْلُوا لَدَّرْجْ أَتَفَقْ الْعَسْكَرْ بَاشْ يَرَفْدُوهْ عَلَى جَالْ اَلْعُنْفْ تَعْ النَّاس،
36
عْلَى خَاطَرْ النَّاسْ كَانُوا يْتَبْعُوهْ ويْزَڤُوا: "أَقَتْلُوهْ!".
37
وكِي ڤَرَبْ بُولُسْ يَدْخَلْ الْثَكَنَة ڤَالْ لَلْأَمِيرْ: تَسْمَحْ لٍي نڤُولَكْ شِي؟" ڤَالَهْ الْرَيَسْ: " تَعْرَفْ اَلْيُونَانِيَّة؟
38
مَاشِي أَنْتَ الْمَصْرِي أَلِي دَارْ فَتْنَة لِيَامْ أَلِي فَاتُوا، و خَرَجْ لَصَحْرَة رَبْعْ اَلاَفْ رَّجَلْ مَلْ اَلْقَتَلَة؟".
39
وڤَالَه بُولُسْ: "أَنَا رَاجَلْ يَهُودِي طَرْسُوسِي، مَنْ أَهْلْ مْدِينَة مَاشِي دِنِيَّة مَنْ كِيلِيكِيَّة. ونَتْرَجَاكْ تَسْمَحْ لِي نْكَلَمْ الْشَّعْبْ".
40
و مَلِي خَلَّهْ، وْڤَفْ بُولُسْ عَالْدَّرْجْ وشَرْ بْيَدَهْ لَشَّعْبْ، وكِي سَكْتُوا. زَڤَى بالْلُّغَة الْعِبْرِيَة وڤَالْ: