الإصحاح 20
1
وكِي كَمْلَتْ الْفْوْضَى، دْعَا بُولُس اَلتْلاَمِيذْ وَدَّعْهُمْ و رَاحْ لْمَكِدُونِيَّة.
3
وكِي كَانْ يْزُورْ دِيكْ الْجْوَايَهْ كَانْ يْبَشَرهُمْ ويْشَجَعْهُمْ بْكْلاَمْ كْثِيرْ، حَتَّى وْصَلْ لْهَلاَّسْ،
2
وڤْعَدْ ثَلْثْ أَشْهُورْ. وكِي كَانْ بَغِي يْرُوحْ لْسُورِيَّة، سْمَعْ بَلِي لْيَهُودْ دَرُوا لَهْ فَخْ بَاشْ يَقَتْلُوهْ بَدَلْ الْطْرِيڤْ ورَاحْ لْمَكِدُونِيَّة.
4
وسَافَرْ مَعَهْ لْأسِيَّا سُوبَاتَرُس آلْبِيرِيُّ، و مَنْ نَّاسْ تَسَالُونِيكِي:أَرَسْتَرْخُس و سَكُونْدُس و غَايُوس آلْدَّرْبِيُّ و تِيمُوثَاوْس. و مَنْ نَّاسْ أَسِيَّا: تِيخِيكُس وتُرُوفِيمُس.
5
وهَدُوا سَبْقُوا وقَرْعُونَا فِي تَرُوَاس.
6
وحْنَا سَافَرْنَا مَنْ فِيلِيبِي مَل لَبْحَرْ بَعْدْ عِيدْ آلْفَطِيرْ، وأَلْحَڤْنَا بِهُمْ لْتَرُوَاس بَعْدْ خَمْسَة إِيَّامْ، وڤْعَدْنَا تَمَا سَبْعْ إِيَّامْ.
7
وفِي الْيُّومْ اَلْلَوَالْ تَعْ الْسِمَانَة، كَان الْتْلاَمِيذْ مْجَمْعِينْ بَاشْ يْكَسْرُوا الْكَسْرَة، خَاطَبْهُمْ بُولُس وهُوَ كَانْ نَاوِي يْسَفَرْ فَالْغَدْ، وطَوَالْ الْكْلاَمْ حَتَّى نَصْ اَلْلِيلْ.
8
وكَانَتْ مَصَابِيحْ كْثِيرَة فْالبِيتْ اَلْعَالْيَّة أَلِي كَانُوا مْجَمْعِينْ فِيهَا.
9
وكَانْ وَاحَدْ الْشِيرْ أَسْمَهْ أَفْتِيخُوس مْجَمَعْ ڤُدَامْ الْطَّاقَة أَدَاهْ الْنُومْ، وبُولُسْ طَوَلْ فِي كْلاَمَه، غَلْبَهْ الْنُومْ وطَاحْ مَنْ الْطَّبَقْ الْثَّالَثْ لَلَرْضْ، و رَافْدُوه وهُوَ مِيَّتْ.
10
هَوَّدْ بُولُس ورَفْدَه لْعَنْدَه وعَنْڤَهْ و ڤَالْ: "مَا تْخَافُوشْ! عْلَى خَاطَرْمَازَلَه حَيْ!".
11
مَنْ بَعْدْ طْلَعْ وكَسَّرْ الْكَسْرَة وكْلاَ وزَادْ لَكْلاَمْ حَتَّ لَفْجَرْ. مَنْ بَعْدْ خْرَجْ.
12
وجَابُوا دَاكْ الْشِيرْ حَيْ، وتْعَزَاوْ تَعْزِيَة مَشِي قْلِيلَة.
13
وحْنَا سْبَڤْنَا لَلْبَابُورْ و قَلَعْنَا لْأسُّوس، مْعَوْلِينْ نَرَفْدُوا بُولُس تَمَا، عَلَى خَاطَرْ هُوَ أَلِي بْغَى يْجِي بَالْمَشْي.
14
وكِي لْحَڤْ بِينَا لْأسُّوس أَرْفَدْنَاه وقَلَعْنَا لْمِيتِيلِينِي
15
ومَنْ تَمْ سَافَرْنَا بْحَرْ ومَلْغَدْ وْصَلْنَا لْجِهَة خِيُوس. وفالْيُّومْ التَّالِي وْصَلْنَا لْسَامُوس، وڤْعَدْنَا فِي تُرُوجِيلِيُّون، وفالْيُّومْ الْتَّالِي رَوحْنَا لْمِيلِيتُس،
16
عْلَى خَاطَرْ بُولُس مَاكَانْشْ بَغِي يْفُوتْ مَنْ أَفَسُس مَلْلَبْحَرْبَاشْ مَا يْضِيَعْشْ الْوَقْتْ فِي أَسِيَّا، عْلَى خَاطَرْ كَانْ بَغِي يْوْصَلْ لأُوْرُشَلِيمْ اِذَا ڤْدَرْ فِي يُّومْ الْخَمْسِينْ
17
ومَنْ مِيليتُس أَرْسَلْ لأَفَسُس و أَسْتَدْعَى قُسُوسْ الْكَنِيسَة.
18
وكِي جَاوْ عَنْدَهْ ڤَالْ لْهُمْ: "رَاكُمْ عَارْفِينْ مَنْ الْيُّومْ اَلْلَوَلْ أَلِي دْخَلْتْ أَسِيَّا، كِيفْ كُنْتْ مْعَاكُمْ فِي كُلْ وَقْتْ.
19
نَخْدَمْ الْرَّب فِي تَوَاضُعْ ودْمُوعْ كْثِيرَة، وشْحَالْ مَنْ مُصِيبَة صْرَاتْ لِي مَنْ مَكَايِدْ الْيَهُودْ.
20
ومَا قَصَرتْ عْلِيكُمْ فِي حَتَّى شِي فِيهْ فَايْدَة لِيكُمْ خَبَرْتْكُمْ وعَلَّمْتْكُمْ جَهَرَا مَنْ دَارْ لْدَارْ،
21
شَاهَدْ لَلْيَهُودْ و لَلْيُونَانِيِّينْ بالْتُّوبَة لله والإِيمَانْ أَلِي بْرَّبْنَا يَسُوع الْمَسِيح.
22
ودُورْكْ رَانِي رَايَحْ لأُوْرُشَلِيمْ مْقَيَّدْ بالْرُّوحْ، مَا رَانِي عَارَفْ وَاشْ يْقَبَلْنِي تَمَا.
23
بَصَحْ اَلْرُّوحْ الْقُدُسْ يَشْهَدْ فِي كُلْ مْدِينَة ڤَايَلْ: الْحَبْسْ والْمَصَاعِبْ تَسَنَانِي.
24
بَصَحْ مَا رَانِيشْ دَايَرْ قِيمَة لْرُوحِي، مَادَامْ رَانِي بَغِي نْكَمَّلْ الْخَدْمَة أَلِي أَعْطَهَالِي اَلْرَّب يَسُوعْ، بَاشْ نَشْهَدْ بَبْشَارَة نِعْمَة الله.
25
ورَانِي عَارَفْ بَلِي مَا تْزِيْدُوشْ تْشُفُوا وَجْهِي مَلْ الْيُّومْ، أَنْتُمَ ڤَاعْ أَلِي كُنْتْ بِينَتْكُمْ نْبَشَرْ بْمَلَكُوتْ الله. و
26
نَشْهَدْ الْيُّومْ ڤُدَامْكُمْ بَلِي أَنَا بَرِيءْ مَنْ دَمْكُمْ،
27
عْلَى خَاطَرْ مَا خَبِيت عْلِيكُمْ حَتَّى شِي مَنْ قَصْدْ الله.
28
عَاسُوا عْلَى رْوَاحْكُمْ و عْلَى رَّاعِيَّة الله أَلِي حَطْكُمْ اَلْرُّوحْ الْقُدُسْ رُعَاتْ، بَاشْ تَرْعَاوْ كَنِيسَة الله أَلِي شْرَاهَا بْدَمَهْ.
29
عْلَى خَاطَرْ رَانِي عَارَفْ بَلِي بَعْدْ رْوَاحِي يَدَخْلُوا بِينَاتْكُمْ نَّاسْ ذْيُوبَا تَخْطَفْ ومَا تَرْحَمْشْ اَلرَّعِيَّة.
30
ومَنْكُمْ يْنُوضُوا رْجَالْ يَتْكَّلْمُوا بْتَعَالِيمْ كَذْبَة يْدِيواَلتْلاَمِيذْ مُورَاهُمْ
31
عْلَى هَدْ الْشِي كُونُوا فَطْنِينْ، وتْفَكْرُوا بَلِي مُدَّة ثَلْثْ سْنِينْ وأَنَا نْوَصِيكُلْ وَاحَدْ فِيكُمْ بَالْدْمُوعْ.
32
وضُورْكْ نْوَدَعْكُمْ يَا خُوتِي لله ولْكَلْمَة نِعْمَتَهْ، الْقَادْرَة تْبْنِيكُمْ وتَعْطِيكُمْ اَلْوَرْثْ مْعَ ڤَاعْ اَلْمَقْدْسِينْ.
33
مَا طْمَعْتْ لاَ فِي فَضَّة ولاَ ذْهَبْ و لاَ قَشْ وَاحَدْ مَنْكُمْ.
34
رَاكُمْ عَارْفِينْ بَلِي كُنْتْ نَخْدَمْ بْيَدِي بَاشْ نَكَفِي رُوحِي ولِي كَانُوا مْعَيَا.
35
وَرِيتْ لْكُمْ كِيْفَاشْ لاَزَمْ نَخَدْمُوا بَاشْ نْعَوْنُوا الْمَحْتَاجِينْ، ونَتْفَكْرُوا كْلاَمْ الْرَّب يَسُوعْ أَلِي ڤَالْ: اَلْفَرْحْ اَلِي يْمَّدْ كْثَرْ مَلِي يْشَدْ".
36
وكِي ڤَالْ هَدَا رْكَاعْ بُولُس مَعَهُمْ وصَلَّى.
37
وڤَاعْ بْكَاوْ بَزَافْ، ويْعَنْڤُوا بُولُسْ ويَسْلْمُوا عْلِيه
38
حَزْنُوا بَزَافْ، مَلِي ڤَالْ لْهُمْ: مَا تْزِدُوشْ تْشُفُوا وَجْهِي مَلْيُّومْ. مَنْ بَعْدْ رَافْقُوهْ لْبَابُورْ و وَدْعُوهْ.