الإصحاح 12
1
وُفِي دَاكْ الْوَقْتْ بْدَى الْسُلْطَان هِيرُودُوس يَضْطَهَدْ نَاسْ مَنْ الْكَنِيسَة،
2
وُقْتَلْ يَعْقُوب خُو يُوحَنَّا بَالْسِيفْ.
3
وُكِي شَافْ بَلِي هَادْ اَلشِي فَرَحْ لِيهُودْ، حْكَمْ عْلَى بُطْرُس تَانِي. وُكَانْ فِي عِيدْ اَلْفَطِيرْ.
4
وُكِي حَكْمَهْ دَرَاهْ فالْحَبْسْ، سَلْمَهْ لْرَبْعَة مَجْمُوعَاتْ كُلْ وَاحْدَة فِيهَا رَابْعَة عَسْكَرْ بَاشْ إِيعَسُوهْ، بَاشْ يْقَدْمَهْ مُورْ عِيدْ الْفِصْحْ لَشَّعْبْ.
5
وُكَانْ بُطْرُسْ يْعَسُوهْ فالْحَبْسْ، وَالْكَنِيسَة كَانَتْ تْصَلِي بَحْرَارَة مَنْ أَجْلَهْ.
6
وُفَالْلِيلَة أَلِي كَانْ هِيرُودُس مْعَوَلْ يْقَدْمَهْ، بُطْرُس كَانْ رَاقَدْ بِينْ زُوجْ عَسْكَرْ مَرْبُوطْ بَسْلاَسَلْ، وُكَانْ قُدَامْ الْبَابْ عَسَاسِينْ إِيعَاسُوا الْحَبْسْ.
7
وُعْلَى غَفْلَة بَانْ مَلَايْكَة اَلرَّبْ، تَنَوْرَتْ ألبِيتْ تَعْ الْحَبْسْ، وُالْمَلاَيْكَة نَوَضْ بُطْرُسْ وُڤَالَهْ: " نُوضْ بَالْخَفْ!". وُتْفَتْحَتْ اَلسْلاَسَلْ أَلِي كَانُوا فِي يَدِيهْ.
8
وُڤَالَهْ: " دِير حْزَامَكْ وُأَلْبَسْ صَبَاتَكْ". دَارْ زَادْ ڤَالَهْ: "أَلْبَسْ رِدَاءكْ وتَبَعْنِي".
9
وَخْرَجْ مْتَبْعَهْ. وُمَاكَانْشْ فَاهَمْ شَا رَاهْ صَارِلَهْ مْعَ الْمَلاَيْكَة صَحْ، كَانْ حَاسَبْ رَاهْ فِي مْنَامْ.
10
فَاتُوا مَنْ الْحِرَاسَة الْلَوْلَة وُالثَانْيَة، وُكِي وَّصْلُوا لْبَابْ الْحَبْسْ تَعْ حْدِيدْ أَلِي يَّدِي لَمْدِينَة، أَتَفْتَحْ وَاحْدَهْ، مَلِي خَرْجُوا وُتْمَشَاوْ فِي طْرِيڤْ وَاحْدَة، فَارْقَه الْمَلاَيْكَة.
11
وُڤَالْ بُطْرُسْ، كِي رْجَعْ لْرُّوحَهْ: "ضُورْكْ أَتْأَكَدْتْ بَلِي الْرَّب أَرْسَلْ مَلاَيْكَة وُسَلَكْنِي مَنْ يَدْ هِيرُودُسْ، وُمَنْ شَّعْبْ الْيَهُود أَلي كَانْ يْقَارَعْ".
12
مَنْ بَعْدْ رَاحْ لَدَارْ مَرْيَمْ يَمَاتْ يُوحَنَّا أَلِي يْسَمُوهْ مَرْقَسْ، كَانُوا مُومِنِينْ بَزَافْ مْجَمْعِينْ يْصَلُوا.
13
كِي وْصَلْ قْرَعْ عَالْبَابْ تَاعْ بَرَى جَاتْ خَدَامَة يْسَمُوهَا رَوْدَا بَاشْ تَسْمَعْ.
14
كِي عَرْفَتْ صُوتْ بُطْرُسْ مَافَتْحَتْشْ الْبَابْ مَنْ الْفَرْحْ، رَجْعَتْ لَداَخَلْ أَدَارْ وُخَبْرَتْهُمْ بَلِي بُطْرُس رَاهْ وَاقَفْ عَنْدْ الْبَابْ.
15
وُڤَالُوا لْهَا: "رَاكِي تَتْخَيْلِي!". وُهِيَ كَانَتْ تْؤَكَدْ لْهُمْ بَلِي هُوَ. ڤَالُوا: " بَلاَكْ مَلاَيْكَة!".
16
وُبُطْرُسْ كَمَلْ يَقْرَعْ. كِي فَتْحُولَهْ شَافُوهْ أَنْدَهْشُوا.
17
وُشَارْ لْهُمْ بْيَدَهْ يَسْكْتُوا، وُحْكَالْهُمْ كِيفَاشْ خَرْجَهْ اَلرَّبْ مَالْحَبْسْ. وڤَالْ: "خَبْرُوا يَعْقُوبْ وَالإِخْوَة بْهَادْ اَلشِي". مَنْ بَعْد خْرَجْ وُرَاحْ لَمْكَانْ أَخَرْ.
18
وُكِي طْلَعْ الْنْهَارْ صْرَاتْ بَلْبَلَة بِينْ الْعَسْكَرْ: يَادْرَى شَا صْرَى لْبُطْرُس؟
19
وُكِي أَسْتَدْعَاهْ هِيرُدُسْ بَأشْ يَقَتْلُوهْ مَالْقَهْشْ حَقَقْ مْعَ الْعَسْكَرْ وُأَمَرْ بَاشْ يَقَتْلُوهُمْ.
20
وُكَانْ هِيرُدُسْ سَاخَطْ عْلَى الصُّرِيِّين وَالصَّيْدَاويِّين، أَتَفْقُوا وُرَسْلُوا نَاسْ يَسْتَعْطْفُوا عَنْدْ بَلاَسْتُسْ حَاجَبْ الْسَلْطَانْ طَالْبِينْ الأَمَانْ عْلَى خَاطَرْ مْدِينَتْهُمْ تَدِي رَزْقْهَا مَنْ مْدِينَة الْسُلْطَانْ.
21
وُفِي وَاحَدْ الْنْهَارْ أَلْبَسْ هِيرُودُس لَبْسَة الْسَلْطَانْ، وُڤْعَدْ فُوڤْ كُرْسِّيهْ وُبْدَى يْخَاطَبْهُمْ.
22
وُ الْشَّعْبْ ڤَالْ بَعْيَاطْ: " هَدَاصُوتْ إِلَهْ مَاشِي صُوتْ إِنْسَان!".
23
فَالْحِينْ ضَرْبَهْ مَلاَيْكَة الْرَّبْ خَاطَرْ مَاعْطَاشْ الْمَجْدْ لله، وُالْدُودْ بْدَى يَاكْلَهْ حَتَى مَاتْ.
24
وُكَلِمَة الله كَانَتْ تَكْبَرْ وُتَزْدَادْ. وُمَلِي بَرْنَابَا وُشَاوُلْ كَمْلُوا الْخِدْمَة فِي أُورْشَلِيمْ، رَجْعُوا لأَنْطَاكِيَة،
25
وُدَاوْ مْعَاهُمْ يُوحَنَّا أَلِي يْسَمُوهْ مَرْقُسْ.