الإصحاح 13
1
كَانْ فِي كَنِيسَة أَنْطَاكِيَة أَنْبِيَا وُمُعَلِّمُونْ: بَرْنَابَا، وُسَمْعَانْ أَلْلِي يْسَمُوهْ نِيجَرَ، ولُوكِيُوسْ الْقَيْرَوَانِي، وُمَنَايِنُ أَلْلِي تْرَبَى عَنْدْ هِيرُودُسْ رَايَس الْرُبْعْ، وُشَاوُلْ.
2
وُكِي كَانُوا يَخَدْمُوا لَرَّبْ وُيْصُومُوا، اَلرُوحْ اَلْقُدُسْ ڤَالْ: "خَيْرُوا لْلِي بَرْنَابَا وُشَاوُلْ لَلْخِدْمَة أَلْلِي أَخْتَرْتَلْهُمْ".
3
مَنْ بَعَدْ مَا صَامُوا وُصَلاَوْ وُحَطُوا عْلِيهُمْ الْيَدِينْ،خَلاَوهُمْ إِشَاوْرُوا.
4
وُ فِي زُوجْ أَرْسَلْهُمْ اَلرُّوحْ اَلْقُدُسْ هَوْدُوا لْسَلُوكِيَّة، وُمَنْ هْنَاكْ سَافْرُوا مَالَلْبْحَرْأَلْقُبْرُسْ.
5
وُكِي وَصْلُوا أَلْسَلاَمِيسْ بَشْرُوا بْكَلِمَة الله فَي مْجَامَعْ الْيَهُودْ. وُكَانْ مْعَاهُمْ يُوحَنَّا خَادِمْ.
6
وُكِي رَاحُوا اَلْجَزِيرَة بَافُوسْ، أَلْڤَاوْ رَاجَلْ سَحَارْ نَبِي كَذَابْ يَهُودِي أَسْمَهْ بَارْيَشُوعْ،
7
كَانْ مْعَ الْوَالِي سَرْجِيُوسْ بُلُوسْ، وُهُوَ رَاجَلْ فَاهَمْ، عْرَضْ بَرْنَابَا وُشَاوُلْ وُبْغَى يَسْمَعْ كَلْمَة الله،
8
بَصَحْ عَارَضْهُمْ عَلِيمْ الْسَاحَرْ، خَاطَرْ هَادَ هُوَ مَعْنَى أَسْمَهْ، بْغَى يْخَسَرْ نِيَة الْوَالِي عْلَى آلإِيمَانْ.
9
وُشَاوُلْ، أَلْلِي هُوَ بُولُس تَانِي أَتْعَمَرْ مَنْ اَلرُّوحْ اَلْقُدُسْ وُشَافْ لِيهْ
10
وُڤَالْ: "أَنْتَ أَلْلِي رَاكْ مْعَمَرْ مَنْ كُلْ غَشْ وُكُلْ خُبْثْ!يَا وَلْدْ إِبْلِيسْ! يَا عْدُو كُلْ حَقْ! مَازَالَكْ تْفَسَدْ طَرْڤَانْ الله لَمْسَڤْدَة؟
11
وُضُورْكْ هَا يَدْ الْرَّب عْلِيكْ، تَتَعْمَى وُمَتْشُوفْشْ الْشَّمْس لَلْوَقْتْ". وُفَالْحِينْ طَحْ عْلِيهْ ضْبَابْ وُظَلْمَة، وُرْجَعْ يْحَوَسْ شْكُون يْقُودَهْ مَنْ يَدِيهْ.
12
وُمَلِي شَافْ اَلْوَالِي مَاصْرَى، اَمَنْ وُأَدْهَشْ مَنْ تَعْلِيمْ اَلْرَّبْ.
13
مَنْ بَعْدْ قَلَعْ بُولُسْ وُأَلْلِي مْعَاهْ مَنْ بَافُوسْ لْبَرْجَة بَمْفِيلِيَّة. وُيُوحَنَّا فَارَقْهُمْ وُرْجَعْ لِأُوْرْشَلِيمْ.
14
وُهُمَا فَاتُوا مَنْ بَرْجَة وُجَاوْ لْأَنْطَاكِيَة بِيسِيدِيَّة، وُدَخْلُوا الْمَجْمَعْ يُومْ الْسَبْتْ وُجَمْعُوا.
15
وُبَعْدْ قِرَاءَة الْشَرِيعَة وَالأَنْبِيَا، رَاسْلُوا لْعَنْدْهُمْ رِيَاسْ الْمَجْمَعْ ڤَالُوا: " يَا إِخْوَة، إِلَى عَنْدْكُمْ كَلِمَة وَعْظْ لَشَّعْب ڤُولُوا".
16
وڤَفْ بُلُوسْ وُشَرْ بْيَدِيهْ وُڤَالْ: " يَا رْجَالْ إِسْرَائِيلْ يَالِي تَتَقُوا الله آسَمْعُوا!
17
إِلَهْ شَّعْبْ إِسْرَائِيلْ خْتَارْ جْدَادْنَا، وُطَلَعْ شَأنْ شَعْبْنَا وَقْتْ غَرْبْتَهْ فِي مَصَرْ، وُبْيَدَهْ لَقْوِيَة خَرَجْهُمْ مَنْهَا. وُطُولْ رَبْعِينْ سْنَة،
18
تْحَمَلْ عْوَايَدْهُمْ فَالصَحْرَى.
19
مَنْ بَعْدْ أَهْلَكْ سَبْعَ أُمَمْ فِي أَرْضْ كَنْعَانْ وُڤَسَمْ لْهُمْ أَرْضْهُمْ بَالْقُرْعَة.
20
وُبَعْدْ رَبْعْمْيَا وْ خَمْسِينْ سْنَة أَعْطَاهُمْ قُضَاةْ حَتَى لْصَمُوئِيلْ اَلنَبِي.
21
وُمَنْ ثَمَ بْغَاوْ إِيدِيرْ لْهُمْ سُلْطَانْ، دَارْلْهُمْ شَاوُل بَنْ قَيْسْ، رَاجَلْ مَنْ عَرْشْ بِنْيَامِينْ، رَبْعِينْ سْنَة.
22
مَنْ بَعْدْ عَزْلَّهْ وُدَارْلْهُمْ دَاوُدْ سُلْطَانْ، ألْلِي شْهَدْ عْلِيهْ، وُڤَالْ: لْڤِيتْ دَاوُدْ بَنْ يَسَّ رَاجَلْ عْلَى حْسَابْ ڤَلْبِي، أَلْلِي يْدِيرْ ڤَاعْ مَشِئْتِي.
23
وُمَنْ نَسْلَهْ، عْلَى حْسَابْ الْوَعْدْ، أَلِي وْعَدْ الله بَلِي يَخْرَجْ لَمْسَلَكْ مَنْ إِسْرَائِيل، يَسُوعْ.
24
وُسْبَقْ يُوحَنَّا وُ بَشَرْ بمَجِيئِهْ بَالتَغْطَاسْ لَتُوبَة لْڤَاعْ شَّعْب إِسْرَائِيلْ.
25
وُكِي ڤَرَبْ يُوحَنَّا يْكَمَّلْ خَدَمْتَهْ ڤَالْ: شْكُون رَاكُمْ حَاسْبِينِّ؟ مَاشِي أَنَا الَمْسَلَكْ، رَاحْ يْجِي وْرَيَا وَأَنَا مَا نَسْتْهَلْشْ نْحَلْ رْبَاطْ صَبَاطْ كَرْعِيهْ
26
"يَا خَوْتِي أوْلاَدْ جَنْسْ إِبْرَاهِيم، وُ أَلْلِي مَنْكُمْ يْتَقُوا الله، لِيكُمْ أَرْسَلْتْ كَلْمَة هَادْ الْسْلاَكْ.
27
عْلَى خَاطَرْ الْسَاكْنِينْ فِي أُورْشَلِيمْ وُرِيَاسْهُمْ مَا عَرْفُوهْشْ وُكَمْلُوا عْلَى حْسَابْ لْكَلْمَة أَلِي يَقْرُوهَا بَالسَبْتْ، وُحَكْمُوا عْلِيهْ.
28
مَلْقَاوْ حَتَى ذَنْبْ وَاحَدْ عْلِيهْ أَلِي يَسْتْهَلْ الْمُوتْ طَلْبُوا مَنْ بِيلاَطُس بَاشْ يَقَتْلَهْ.
29
وُكِي كَمْلُوا أَلشِي أَلِي كَانْ تَكْتَبْ عْلِيهْ، هَوْدُوهْ مَنْ الْصَلِيبْ وُدَفْنُوهْ.
30
بَصَحْ الله نَوْضَهْ مَنْ اَلْمُوتْ.
31
وُبَانْ مُدَّة إِيَامْ لَلِي رَافْقُوهْ مَنْ اَلْجَلِيلْ لْأُورْشَلِيمْ، أَلِي هُمَا شْهُودْ تَاعَهْ عَنْدْ الْشَّعْبْ.
32
وُ حْنَى نْبَشْرُوكُمْ بَالْوَعْدْ أَلِي كَانْ لَجْدَادْنَا،
33
وُالله كَمَلْ هَادْ الْوَعْدْ لِينَا حْنَى أَوْلاَدْهُمْ، نَوَضْ يَسُوعْ مَنْ اَلْمُوتْ كِمَا كَانْ مَكْتُوبْ فَالْمَزْمُورْ اَلْثَانِي: أَنْتَ أَبْنِي، أَنَا الْيُومْ وْلَدْتَكْ.
34
الله نَوْضَهْ مَنْ اَلْمُوتْ، وُمَاخَلَاهْشْ يَتْعَفَنْ، هَكْدَا ڤَالْ: نَعْطِيكُمْ مَرَاحِمْ دَاوُدْ اَلْصَّادْقَة.
35
وُڤَالْ ثَانِي فِي مَزْمُورْاَخَرْ: مَا تْخَلِيشْ لَمْقَدَّسْ تَعَكْ يَتْعَفَنْ.
36
عْلَى خَاطَرْ دَاوُدْ بَعْدْ مَا خْدَمْ جِيلَهْ بَمْشَاوْرَة الله، مَاتْ وُ لْحَڤْ جْدَادَهْ الْلَقْبَرْ، وُتْعَفَنْ.
37
وُهَذَاكْ لِي حْيَاهْ الله مَا تْعَفَنْشْ.
38
وُأَعَلْمُوا يَا خَوْتِي، بَلِي بيَسُوعْ تْبَشْرُوا بْغُفْرَانْ اَلْخَطَايَا،
39
وُبِهْ يَتْبَرَّرجْمِيعْ أَلِي يْؤَمَنْ مَنْ كُلْ الْشِي أَلِي عَجْزَتْ عْلِيهْ شَرِيعَة مُوسَى
40
أَحَرْزُوا بَاشْ مَا يَصْرَى لْكُمْشْ أَلِي تْڤَالْ فَالْأنْبِيَا:
41
"شُوفُوا يَاالْمَسْتَاهْزِيِين، تْعَجْبُوا وُ أَهَلْكُوا! رَانِي دَايَرْ فِي إِيَامْكُمْ خَدْمَة لَوْكَانْ يَحْكِيوْهَا لْكُمْ مَاتْصَدْقُوشْ".
42
وُكٍي خَرْجُوا الْيَهُودْ مَالْمَجْمَعْ طَلْبُوا الأُمَمْ بَاشْ يَوَلِوْ الْسَبْتْ الْتَالِي وُيْكَلْمُوهُمْ بْهَادْ الَكْلاَمْ.
43
وُكِي كْمَلْ اَلْإجْتِمَاعْ تَبْعُوهُمْ نَاسْ كْثِيرْ مَالْيَهُودْ وُالْمَتْهَوْدِينْ بُولُس وُبَرْنَابَا كَانُوا يْكَلْمُوهُمْ وُيْقَنْعُوهُمْ بَاشْ يَثَبْتُوا فِي نِعْمَة الله.
44
وُفَالسَبْتْ الْتَالِي أَجْتَمَعْتْ ڤْرِيبْ ڤَاعْ لَمْدِينَة بَاشْ تَسْمَعْ كَلِمَة الله.
45
وُمَلِي شَافُوا الْيَهُودْ دُوكْ الْنَاسْ تْعَمْرُوا غِيْرَة، وُبْدَاوْ يْعَارْضُوا كْلاَمْ بُولُسْ.
46
وُبْجُرْأة بُولُسْ وُبَرْنَابَا كَلْمُهُمْ وُڤَالُوا: "كَانْ عْلِينَا نْكَلْمُكُمْ أَنْتُمَا فَالْلَوَلْ بْكَلْمَة الله، بَصَحْ مَا بْغِيتُوشْ وُبَيَنْتُوا بَلِي مَا تَسْتَهْلُوشْ الْحَيَاة الْأَبَدِيَّة، وُرَانَا ضُورْكْ نْكَلْمُوا أَلْلِي مَاشِي يَهُودْ.
47
عْلَى خَاطَرْ هَاكْدَا وَصَانَا اَلرَّبْ : رَانِي دَرْتَكْ نُورْ لَلْأُمَمْ، أَنْتَ تْوَصَلْ الَسْلاَكْ لْڤَاعْ اَلْلَرْضْ".
48
كِي سَمْعُوا اَلْأمَمْ هَادْ لَكْلاَمْ فَرْحُوا وُمَجْدُوا كَلِمَة اَلرَّبْ. وُاَمَنْ جْمِيعْ أَلْلِي وَجَدْهُمْ الله لَلْحَيَاة ْاَلْأَبَدِيَّة.
49
وُهَكْدَا أَنْتَشْرَتْ كَلِمَة اَلرَّبْ فَالْمنْطْقَة كُلْهَا.
50
بَصَحْ لِيهُودْ حَرْكُوا اَلنْسَا اَلتَقِيَاتْ اَلشَّرِيفَاتْ وُشُورَفَاءْ لَمْدِينَة، ونَوْضُوا إِضْطِهَادْ عْلَى بُولُسْ وُبَرْنَابَا، وُطَرْدُوهُمْ مَنْ مْدِينَتْهُمْ.
51
وُهُمَا نَفْضُوا لْغَبْرَى تَاعْ كَرْعِيهُمْ، وُرَوْحُوا أَلْإِيقُونِيَة.
52
وُ الْتَلاَمٍيذْ كَانُوا يَتْعَمْرُوا بَالْفَرْحْ وُالرُّوحْ الْقُدُسْ.