الإصحاح 11
1
سَمْعُوا الْرُّسُل الإِخْوَة أَلِي كَانُوا فالْيَهُودِيَّة بَلِي الأُمَمْ تَانِي قَبْلُوا كَلِمَة الله.
2
وُكِي طْلَعْ بُطْرُس لأُورْشَلِيمْ،خَاصْمُوهْ الْمُومْنِينْ أَلِي أصَلْهُمْ مَالْيَهُودْ،
3
ڤَالُوالَهْ: "كِيفَاشْ دْخَلْتْ عَنْدْ أَلِي مَاشِي مَخْتُونِينْ وُكْلِيتْ مْعَاهُمْ".
4
وُبْدَى بُطْرُس يْفَهَمْهُمْ كِي صْرَتْ الأُمُورْ ڤَالْ:
5
"أَنَا كُنْتْ فِي مْدِينَة يَافَا نْصَلِي، وُشَفْتْ فِي رُؤْيَة: وِعَاءْ كِي طَرْفْ قْمَاشْ كْبِيرْمَرْبُوطَة بْرَبْعَة جْوَايَهْ مْهَوَدْ مَالْسْمَا عْلِيَّا.
6
وُشَفْتْ فِيهْ مْلِيحْ، بَانْ لِي فِيهَاحَيَوَانَاتْ الْلَرْضْ وُلَوْحُوشْ وُالزَّحَّافَاتْ وُطْيُورْ الْسْمَا.
7
سْمَعْتْ صُوتْ يْقُولْ لِي: نُوضْ يَا بُطْرُس، اَذْبَحْ وُكُّولْ.
8
وُڤُلْتْ: لاَ يَارَبِ! مَا يَدْخَلْشْ فَمِي شِي مْحَرَمْ وَلاَ نَجِسْ.
9
جَاوَبْنِي الصُوتْ مَرَة تَانْيَة مَنْ الْسْمَا: أَلِي نَقَاهْ الله مَا تَحْسْبَهْشْ أَنْتَ نْجَسْ. وُ
10
كَانْ هَادْ اَلْأمْرْ ثْلاَثْ مَرَّاتْ. وُأَطْلَعْ كُلْشِي لَسْمَا.
11
وثْلاَثْ رْجَالْ وَقْفُوا فِي دَاكْ الْوَقْتْ عَنْدْ بَابْ الْدَارْ أَلِي كُنْتْ فِيهَا، مَرْسُولِينْ أَلْ عَنْدِي مَنْ قَيْصَرِيَّة.
12
وُڤَالْ لِي اَلرُّوحْ اَلْقُدُسْ نْرُوحْ مْعَاهُمْ بْلَى خُوفْ. وُرَوَحْتْ مْعَاهُمْ وُ جَاو مْعَانَا هَادُو الإِخْوَة الْسَتَة، دْخَلْنَا دَارْ الْرَاجَلْ،
13
وُ حْكَالْنَا كِيفَاشْ شَافْ مَلاَيْكَة فِي دَارَهْ وْقَفْ وُڤَالَهْ: أَرْسَلْ اَلْ يَافَا رْحَالْ، وَأَعْرَضْ سِمْعَانْ أَلِي يْسَمُوهْ بُطْرُسْ،
14
وُهُوَ يْكَلْمَكْ بَكْلاَمْ تَسْلَكْ بِيهْ أَنْتْ وُڤَاعْ دَارَكْ.
15
كِي بْدِيتْ نَهْدَرْ، هَوَدْ الْرُّوحْ الْقُدُسْ عْلِيهُمْ كِمَا هَوَدْ عْلِينَا فَالْبِدَايَة.
16
تْفَكَرْتْ كْلاَمْ الْرَّب مَلِي ڤَالْ: يُوحَنَّا يْغَطَسْ بَالْمَا وَأَنْتُمَ رَاحْ تَعْمْدُوا بالْرُّوحْ الْقُدُسْ.
17
إِذَا الله حَبْ يْسَاوِهُمْ بِينَا وَأَعْطَاهُمْ المَوْهِبَة كِمَا أَعْطَاهَلْنَا لِينَا وُأَمْنُوا بَالْرَّبْ يَسُوعْ الْمَسِيحْ، شْكُونْ أَنَا؟ قَادَرْ نْحَبَسْ الله؟".
18
كِي سَمْعُوا أَلِي كَانُوا يْعَرْضُوهْ سَكْتُوا، وُكَانُوا يْسَبْحُوالله ڤَالُوا: "الله أَنْعَمْ عْلَى الأُمَمْ بَالْتُوبَة لَلْحَيَاة!".
19
وَأَلِي تْفَرْكْتُوا عْلَى خَاطَرْ الْضِيقْ أَلِي صْرَى بْسَبَة اسْتِفَانُوسْ رَاحُوا لْ فِينِيقِيَّة وُقُبْرُسْ وُأَنْطَاكِيَة، وُ كَانُوا يَحْكُوا بَالْكَلِمَة غِيرْ لَليَهُودْ.
20
بَصَحْ كَانْ مَنْهُمْ قُومْ، رْجَالْ قُبْرُسِيُّن وُقَيْرَوَانِيُّون، كِي دَخْلُوا أَنْطَاكِيَة كَانُوا يَهَدْرُوا مْعَ الْيُونَانِيِّين يْبَشْرُوا بَالْرَّب يَسُوعْ.
21
وُكَانتْ يَدْ الْرَّب مْعَهُمْ، وُأَمْنُوا كْثِيرْ وُرَجْعُوا لَرَّبْ
22
وْصَلْ لَخْبَرْ لْكَنِيسَة فِي أُورْشَلِيم، وُرَاسْلُوا بَرْنَابَا يْرُوحْ لأَنْطَاكِيَة.
23
كِي وْصَلْ شَافْ نِعْمَة الله فْرَحْ، وُ وْعَظْهُمْ كُلْهُمْ بَاشْ يَثَبْتُوا فالْرَّبْ مَنْ كُلْ الْڤَلْبْ،
24
خَاطَرْ كَانْ رَاجَلْ صَالَحْ وُ مْعَمَرْ بَالْرّوُحْ اَلْقُدُسْ وُالْإِيمَانْ. وُزَادُوا أَمْنُوا بَالْرَّبْ بَزَافْ مَنْ نَاسْ
25
مَنْ بَعْدْ رَاحْ بَرْنَابَا لْطَرْسُوسْ أَيْجِيبْ شَاوُلْ. وُكِي لْقَاهْ جَابَهْ لأَنْطَاكِيَة.
26
وُڤَعْدُوا فَالْكَنِيسَة عَامْ كَامَلْ وُقَرَاوْ الْكَلِمَة لْشْحَالْ مَنْ الْنَاسْ. وُأَوَلْ مَرَة سَمَاوْ الْتَلاَمِيذْ "مَسِيحِيِّينْ" فِي أَنْطَاكِيَة.
27
وُفِي دِيكْ لِيَامْ جَاوْ أَنْبِيَا مَنْ أُورْشَلٍيمْ لأَنْطَاكٍيَة. وُوَاحَدْ مَنْهُمْ يَسَمُوهْ أَغَابُوسْ،
28
تْنَبَأ بالْرُّوح بَلِي جُوعْ كْبِيرْ رَاحْ يْطِيحْ عْلَى ڤَاعْ اللَرْضْ، وُ صْرَى فِي وَقْتْ كْلُودِيُوسْ قَيصَرْ.
29
وُتْفَهْمُوا الْتَلاَمِيذْ بِنَتْهُمْ يَتْبَرَعُوا عْلَى حْسَابْ مَا يَقْدَرْ كُلْ وَاحَدْ، خِدْمَة للإخْوَة أَلِي سَّاكْنِينْ فَالْيَهُودِيَّة.
30
وُبَعْثُوا الْمَعُونَة للْمَشَايِخْ بْيَدْ بَرْنَابَا وُشَاوُلْ