الإصحاح الزاوج
1
يَا الْخُوتْ، رَاهْ رَّبْنَا يَسُوعْ الْمَسِيحْ غَادِي يْوَلِي وُنَتْجَمْعُو مْعَاهْ. وُعْلَى هَادَشِي، نَطْلَبْ مَنْكُمْ.
2
بَاشْ مَا تَتْزَعَزْعُوشْ فْأَفْكَارْكُمْ بَالْخَفْ، وُمَا تْخَلْعُوشْ لاَ بَرُّوحْ، وَلاَ بْكَلْمَة، وَلاَ بْرِسَالَة يْقُولُو لْكُمْ بَلِي هِيَ مَنْ عَنْدْنَا، تْخَلِيكُمْ تْحَسْبُو نْهَارْ اَلرَّبْ لْحَقْ.
3
مَا تْخَلِيوْ حَتَى وَاحَدْ يَخْدَعْكُمْ بْكَاشْ طَرِيقَة كِيمَا بْغَاتْ تْكُونْ، قَبْلْ مَا يُوْصَلْ دَاكْ اَلنْهَارْ لَبُدَ مَا يْبَانْ الْكُفْرْ فَاللَوَلْ، وُبْنَادَمْ اَلْمَشْرَارْ اَلْلِي غَادِي يَتَهْلَكْ فَجْهَنَمْ.
4
هَادَاكْ اَلْلِي غَادِي يْعَادِي وُيْدِيرْ رُّوحَهْ فُوقْ ڤَاْع اَلْلِي حَسْبُوهْ اَلنَاسْ إِلَّهْ وُيْعَبْدُوهْ، يَلْحَقْ يَجْمَعْ فْبِيتْ الله وُغَادِي يْقُولْ هُوَ الله وُيَحْسَبْ رُّوحَهْ خِيرْ مَنَهْ.
5
مَا تْفَكَرْتُوشْ بَلِي قُولْتْ لْكُمْ هَادَشِي كِي كُنْتْ عَنْدْكُمْ؟
6
وُضَرْوَكْ رَاكُمْ عَارْفِينْ وَاشْ حَبْسَهْ بَاشْ مَا يْبَانْشْ حَتَى يَلْحَقْ اَلْوَقْتْ تَاعَهْ.
7
عْلَى خَاطَرْ اَلسَرْ تَاعْ اَلشَرْ رَّاهْ يَخْدَمْ ضَرْوَكْ،حَتَى يَتْنَحَى هَادَكْ اَلشِي اَلْلِي حَبْسَهْ.
8
وُفْهَادَاكْ اَلْوَقْتْ غَادِي يْبَانْ اَلْمَشْرَارْ، اَلْلِي غَادِي يَفْنِيهْ اَلرَّبْ يَسُوعْ بْنَفْخَة مَنْ فَمَهْ، وُمَا يْبَانْشْ لاَثْرَهْ كِي يْوَلِي يَسُوعْ.
9
الْمَجِيء تَاعْ اَلْمَشْرَارْ غَادِي يْكُونْ بِقُوَة تَاعْ اَلشِيطَانْ، وُغَادِي يْدِيرْ اَلْمُعْجِزَاتْ وَالْأَيَاتْ وَالْعَجَايَبْ اَلْلِي فِيهُمْ اَلْخْدِيعَة.
10
وُڤَاْع نْوَاعْ اَلشَرْ اَلْلِي بِيهْ غَادِي يَخْدَعْ هَادُوكْ اَلْلِي غَادِي يَتْهَلْكُو، عْلَى خَاطَرْ مَا قَبْلُوشْ مَحَبَة اَلْحَقْ بَاشْ يَسْلكُو.
11
وعْلَى هَادَشِي يَرْسَلْ لِيهُمْ الله اَلْلِي يَغْلَطْهُمْ بَاشْ يْأَمْنُو بَالْكْذُوبْ.
12
وُهَكَا غَادِي يَتْعَاقْبُو ڤَاْع اَلْلِي مَا أَمْنُوشْ بَالحَقْ، وُبَصَحْ فَرْحُو بَالذْنُوبْ.
13
وُبَصَحْ حْنَا يَالْخُوتْ الَعْزَازْ عْلَى اَلْرَّبْ، وَاجَبْ عْلِينَا نْشَكْرُو الله دِيمَا عْلَى جَالْكُمْ، عْلَى خَاطَرْ الله خْتَارْكُمْ مَنْ الْبِدَيَة بَاشْ يْكون عَنْدكُم الْخَلاصْ بِالتَقْدِيسْ تَاعْ اَلرُّوحْ اَلْقُدُوسْ، وَبِالْإِيمَانْ تَاعْكُمْ بِالْحَقْ.
14
وَعْلَى خَاطَرْ هَادَشِي دْعِينَاكُمْ بِالإِنْجِيلْ اَلْلِي خْبَرْنَاكُمْ بِيهْ، بَاشْ يْكُونْ لِيكُمْ اَلْعَزْ تَاعْ رَّبِنَا يَسُوعْ اَلْمَسِيحْ.
15
اَثَبْتُو يَالْخُوتْ وُشَدُو فَالْعَادَاتْ اَلْلِي تْعَلَمْتُوهَا مَنَا، سْوَا بَكْلَامْنَا وَلاَ بَالرَسَائَلْ تَعْنَا.
16
وُنَدْعِي رَبْنَا يَسُوعْ الْمَسِيحْ، وَالله بُونَا اَلْلِي بْغَانَا وُبَالنِعْمَة تَاعَهْ عْطَانَا اَلتَشْجِيعْ اَلدَايَمْ وَالرَّجَا اَلصَالِحْ.
17
بَاشْ يَشَجَعْكُمْ وُيْثَبَتْكُمْ فْڤَاْع اَلصْوَالَحْ اَلمْلِيحَة اَلْلِي تْقُولُوهَا وُاَلْلِي تْدِيرُوهَ.