الإصحاح الثالث
1
وُفَى اللَّخَرْ يَا الْخُوتْ، صَلِيوْ مَنْ عْلَجَالنَا، بَاشْ كْلاَمْ اَلرَبْ يَنْتَشِرْ بَالْخَفْ وُيَتْمَجَدْ كِيمَا كَانْ عَنْدْكُمْ نْتُمْ.
2
وُبَاشْ الله يْنَجِينَا مَنْ اَلنَاسْ الْمَشْرَارِينْ وُالَقْبَاحْ.عْلَى خَاطَرْ مَاشِي ڤَاْع اَلنَاسْ مُوْمِنِينْ.
3
وُبَصَحْ اَلرَّبْ رَاهْ أَمِينْ وٌهُوَ اَلْلِي غَادِي يَثَبَتْكُمْ وُيَحْفَضْكُمْ مَنْ اَلشِيطَانْ.
4
وَحْنَا عَنْدْنَا اَلثِقَة فَالرَّبْ مَنْ جِهَتْكُمْ بَلِي رَاكُمْ تْدِيرُو اَلْلِي وَصِينَاكُمْ بِيهْ وَتْكَمْلُو فِيهْ.
5
وَالرَّبْ يَهْدِي قْلُوبْكُمْ لِمَحَبَة الله، وُبَاشْ يْكُونْ لْكُمْ اَلصَبْرْ تَاعْ الْمَسِيحْ.
6
وُنْوَصِيكُمْ يَا الْخُوتْ، فْإِسْمْ اَلرَّبْ يَسُوعْ الْمَسِيحْ، بَاشْ تْبَعْدُو عْلَى كُلْ أَخْ فَنْيَانْ، وُمَايْدِيرُشْ عْلَى وَاشْ تْعَلَمْتَهْ مَنَا.
7
وُرَاكُمْ تْعَرْفُو مْلِيحْ كِيفَاشْ خَاصْكُمْ تْكُونُوا كِمَا حْنَا، عْلَى خَاطَرْ مَا كُنَاشْ فَنْيَانِينْ كِي كُنَا مْعَاكُمْ.
8
وُعْمَرْنَا مَا عَشْنَا عْلَى حْسَابْ حَدْ، وُبَصَحْ كُنَا نْخَدْمُو وَنْكَافْحُو لِيلْ وَنْهَارْ بَاشْ مَا نْثَقْلُو عْلَى حَتَى وَاحَدْ مَنْكُمْ.
9
مَاشِي مَا عَنْدْنَاشْ اَلْحَقْ فَالْمَعُونَة تَاعْكُمْ، وُبَصَحْ بْغِينَا نْكُونُو مِثَالْ لِيكُمْ وَتْكُونُو كِيمَا حْنَا.
10
عْلَى خَاطَرْ مَلِي كُنَا مْعَاكُمْ، وَصِينَاكُمْ بْهَادَشِي:( اَلْلِي مَا بْغَاشْ يَخُدْكُمْ مَا يْكَلْشْ).
11
عْلَى خَاطَرْ سْمَعْنَا بَلِي وَحْدِينْ مَنْكُمْ فَنْيَانِينْ وُمَا عَنْدْهُمْ حَتَى خَدْمَة مَنْ غِيْرمَا يَتْلَهْوَ بَصْوَلَحْ لَخْرِينْ.
12
كِيمَا هَادُو اَلنَاسْ نْوَصِيهُمْ وَنْشَجَعْهُمْ فَالرَّبْ يَسُوعْ اَلْمَسِيحْ بَاشْ يَخَدْمُو، وُيَاكْلُو خَبْزْهُمْ بْعَرْقْ جْبِنْهُمْ.
13
أَمَا نْتُمَ يَا الْخُوتْ، مَا تَعْيَاوْشْ تْدِيرُو الْخِيرْ.
14
وَلاَ مَا بْغَاشْ وَاحَدْ يْدِيرْ بَكْلاَمْنَا اَلْلِى فْهَادْ اَلرِسَالَة،عَزْلُوهْ وُمَا تْبَقَاوْشْ تَتْخَلْطُو مْعَاهْ بَاشْ يَحْشَمْ.
15
وُبَصَحْ مَا تْحَسْبُوهْشْ عَدُوْكُمْ، نَبْهُوهْ كَيمَا خُوكُمْ.
16
ونَدْعِي رَّبْ اِلَهْنَا بْرُّوحَهْ يْمَدْ لِيكُمْ لَهْنَا دِيمَا كِمَا بْغَا يْكُونْ اَلْحَالْ، وُالرَّبْ يْكُونْ مْعَاكُمْ ڤَاْع
17
وُهَادْ سْلاَمِي مَكْتُوبْ بْخَطْ يَدِي أَنَيَا بُولُسْ، وُهُوَ لْبَيَانْ بَاشْ تْمَيْزُو اَلرَسَائِلْ تَاوْعِي هَكَا اَنَا نَكْتَبْ.
18
وَالنِعْمَة تَاعْ اَلرَّبْ يَسُوعْ اَلْمَسِيحْ تْكُونْ مْعَاكُمْ ڤَاْع. أَمِينْ.