الإصحاح اللول
1
مَنْ عَنْد بُولَسْ وَسِلْوَانُسْ وَتِيمُوثَاوَسْ، لِكَنِيسَة تِسَالُونِيكِي، فالله بُونَا وَاَلرَّبْ يَسُوعْ اَلْمَسِيحْ.
2
نِعْمَة لِيكُمْ وَ اْلسَلاَمْ مَنْ الله بُونَا وُالرَّبْ يَسُوعْ اَلْمَسِيحْ.
3
لَزَمْ نْشَكْرُو الله دِيمَا مَنْ جِهَتْكُمْ يَالخُوتْ كِمَا يْلِيقْ، عْلَى خَاطَرْ إِيمَانْكُمْ يَكْبَرْ بَزَافْ، وُالْمَحَبَة لِبَعْضِيَاتْكُمْ تْزِيدْ تَكْبَرْ فِيكُمْ ڤَاْع.
4
وَحْنَا وَلِينَا نَفْتَخْرُو بِيكُمْ فِى كْنَايَسْ الله، مَنْ جِهَة صْبَرْكُمْ وُإِيمَانْكُمْ فَوَسْطْ ڤَاْع اَلْإِضْطِهَادْ وُالَمْحَايَنْ اَلْلِي تْحَمَلْتُوهُمْ.
5
وُهَادَ الشِي يْبَيَنْ بَلِي الله يَحْكَمْ بَالعَدْلْ، وَعْلِيهَا تَسْتَاهْلُو مَمْلَكَة الله اَلْلِي عْلَى جَالْهَا تَتْعَذْبُو.
6
وُبَصَحْ الله عَادَلْ فَالْحُكْمْ تَاعَهْ، عَنْدَهْ اَلْحَقْ يْمَحَنْ هَادُوكْ اَلْلِي يْمَحْنُوكُمْ.
7
وُيَعْطِيكُمْ اَلرَّاحَة اَلْلِي تَتْمَحْنُو كِمَا يْمَدْهَا لِينَا حَتَى حْنَا، كِي يْجِي اَلرَبْ يَسُوعْ مَنْ اَلسْمَا بْقَوْتَهْ مْعَ الْمَلاَيْكَة تَاعَهْ .
8
فَوْسَطْ اَلنَارْ شَاعْلَة، بَاشْ يْعَاقَبْ هَادُوكْ اَلْلِي مَا يْعَرْفُوشْ الله وُاَلْلِي مَا يْطِيعُوشْ إِنْجِيلْ رَّبِنَا يَسُوعْ.
9
هَادُو رَاهُمْ يَتْعَاقْبُو بَالْهَلاَكْ اَلدَايَمْ، وُغَادِي يْكُونُو بْعَادْ عْلَى اَلرَّبْ وُ عْلَى الْمَجْدْ تَاعْ قُوْتَهْ.
10
مَلِي غَادِي يْوَلِي فْهَادَاكْ اَلنْهَارْ، بَاشْ يْمَدُولَهْ اَلْمَقَدْسِينْ تَاعَهْ اَلْمَجْدْ وُيَتْعَجْبُو مَنَهْ ڤَاْع اَلْمُوْمِنِينْ اَلْلِي حَتَى نْتُمَ مَنْهُمْ، عْلَى خَاطَرْ أَمَنْتُو بَالْكَلاَمْ اَلْلِي خْبَرْنَاكُمْ بِهْ.
11
وُعْلَى هَادَشِي نْصَلِيوْ دِيمَا مَنْ جِهَتْكُمْ، بَاشْ يْرَدْكُمْ إِلَهْنَا تَسْتَاهْلُو تْعِيشُو هَادَكْ اَلشِي اَلْلِي عْلَى جَالَهْ دْعَاكُمْ، وبَاشْ يَكَمَلْ بَالْقُوَة دْيَالَهْ ڤَاْع الَحْوَايَجْ الَمْلِيحَة اَلْلِي بْغِيتُو تْدِيرُوهُمْ، وُيْرَدْ خَدْمَة إِيمَانْكُمْ كَامْلَة.
12
بَاشْ يَتْمَجَدْ اِسْمْ رَّبِنَا يَسُوعْ اَلْمَسِيحْ فِيكُمْ، وُحَتَى نْتُومَ غَادِي يْكُونْ لِيكُمْ اَلْمَجْدْ، بِفَضْلْ نِعْمَة إِلَهْنَا وَاَلرَّبْ يَسُوعْ اَلْمَسِيحْ.