الإصحاح 15
1
ورَانِي نْفَكَرْكُمْ يَالْخُوتْ بَالْإِنْجِيلْ اَلْلِي خَبَرْتْكُمْ بِيهْ وقْبَلْتُوهْ ومَازَالْ ثَابْتِينْ فِيهْ،
2
وبِيهْ نْسَلْكُو إِلاَ قْعَدْتُو فَالكْلاَمْ اَلْلِي خْبَرْتْكُمْ بِيهْ ، وَلاَ كُنْتُو أَمَنْتُو بْلاَ فَايْدَة.
3
رَانِي وْصَلَتْكُمْ فَاللَوَلْ هَادَاكْ اَلشِي اَلْلِي قْبَلْتَهْ حَتَى أَنَا، بَلِي الْمَسِيحْ مَاتْ عْلَى جَالْ ذْنُوبْنَا كِيمَا مَكْتُوبْ فَكْتَابْ الله،
4
وتَدْفَنْ، وفَالنْهَارْ الثَالَثْ قَامْ مَنْ اَلْمُوتْ كِيمَا مَكْتُوبْ فَكْتَابْ الله.
5
وبَانْ لْصَفَا ومَنْ بَعَدْ لَتَلاَمِيذْ اَلطْنَاعْشْ.
6
ومَنْ بَعَدْ بَانْ لَكْثَرْ مَنْ خَمْسَمِيَة أَخْ عْلَى مَرَة وَحْدَة، بَزَافْ مَنْهُمْ قَعْدُو حَيِينْ ولَكِنْ وَحْدِينْ مَنْهُمْ مَاتُو.
7
ومَنْ بَعَدْ بَانْ لِيَعْقُوبْ، ولَرُسُلْ كُلْهُمْ.
8
وفَالتَالِي مَنْ بَعَدْ كُلْشِي، بَانْ لِي حَتَى أَنَا كِيمَا إِلاَ تَوْلَدَتْ مَنْ قَبْلْ اَلْوَقْتْ.
9
عْلَى خَاطَرْ رَانِي أَصْغَرْ مَنْ اَلرُسُلْ ومَا نَسْتَاهَلْشْ نَتْسَمَا رَسُولْ ، لِأَنِي كُنْتْ نَتْعَدَى عْلَى كَنِيسَة الله.
10
وبَالنِعْمَة تَاعْ الله وَلِيتْ فْهَادَشِي اَلْلِي أَنَا فِيهْ ضُرْوَكْ ، والنِعْمَة اَلْلِي مَدْلِي رَبِي مَا كَانَتْشْ بَالطَلْ، لِأَنُو تْعَبْتْ كْثَرْ مَنْهُمْ كَامْلِينْ. مَاشِي أَنَا اَلْلِي دَرْتْ هَادْ اَلشِي، ولَكِنْ نِعْمَةْ الله هِيَ اَلْلِي تَخْدَمْ فِيَا.
11
وسِوَا أَنَا وَلاَ هُمَ، رَاهْ هَكَا نْخَبْرُو بَالْبِشَارَة وهَكَا أَمَنْتُو.
12
وإِلاَ كَانْ الْمَسِيحْ اَلْلِي نْخَبْرُو بِيهْ قَامْ مَنْ بِينْ الْأَمْوَاتْ، كِيفَاشْ وَحْدِينْ مَنْكُمْ يْقُولْ مَكَاشْ الْقِيَامَة مَنْ الْأَمْوَاتْ؟.
13
وِإلَا مَكَاشْ الْقِيَامَة مَنْ الْأَمْوَاتْ، رَاهْ حَتَى الْمَسِيحْ مَاقَامْشْ مَنْ الْمُوتْ.
14
وِإلاَ الْمَسِيحْ مَاقَامْشْ مَنْ الْمُوتْ، رَاهْ حَتَى اَلتَبْشِيرْ تَاعْنَا بَاطَلْ، وحَتَى إِيمَانْكُمْ بَاطَلْ.
15
وحَتَى حْنَا غَادِي نْكُونُو شُهُودْ زُورْ عْلَى الله، عْلَى خَاطَرْ شْهَدْنَا عْلَى الله بَلِي أَقَامْ الْمَسِيحْ مَنْ بِينْ اَلْمُوتَى، وهُوَ كِمَا قَامُوشْ مَنْ بِينْ اَلْمُوتَى، إذَ كَانْ اَلْمُوتَى مَايْقُومُوشْ.
16
وِإلاَ مَا كَانُوشْ اَلْمُوتَى يْقُومُو مَنْ اَلْمُوتْ، رَاهْ حَتَى الْمَسِيحْ مَا قَامْشْ مَنْ الْمُوتْ.
17
وِإلَا الْمَسِيحْ مَاقَامْشْ، رَاهْ إِيمَانْكُمْ بَاطَلْ، وُرَاكُمْ بَاقْيِينْ فَذْنُوبْكُمْ.
18
إِذَ كَانْ كِيمَا هَكَا حَتَى هَادُوكْ اَلْلِي مَاتُو وهُمْ مُؤْمِنِينْ بَالْمَسِيحْ تْهَلْكُو!.
19
ولُوكَانْ عَنْدْنَا اَلرَجَاءْ فَالْمَسِيحْ غِيرْ فْهَادْ اَلدَنْيَا، نْكُونُو حْنَا الْمَغْبُونِينْ مَنْ ڤَاعْ اَلنَاسْ.
20
ولَكِنْ فَالْحَقِيقَة، الْمَسِيحْ قَامْ مَنْ بِينْ الْمُوتَى، وهُوَ الْبِكْرْ بِينْ هَادُوكْ اَلْلِي مَاتُو.
21
وبَسْبَابْ إِنْسَانْ جَاتْ الْمُوتْ، وهَكَا حَتَى قِيَامَة الْمُوتَى جَا بَسْبَابْ إِنْسَانْ.
22
كِيمَا مَاتْو ڤَاعْ اَلنَاسْ فْآدَمْ، هَكَا ڤَاعْ يَحْيَاْو فَالْمَسِيحْ.
23
ولَكِنْ كُلْ وَاحَدْ فَالْمَرْتَبَة تَاعَهْ: الْمَسِيحْ هُوَ اَللَوَلْ ومَنْ بَعْدْ الْمُؤْمِنِينْ بِيهْ كِي يْوَلِي الْمَسِيحْ.
24
ومَنْ بَعْدْ هَادَشِي غَادِي يْجِي يُومْ الْأَخِرَة، مَلِي يْرَدْ الْمَسِيحْ الْمُلْكْ لله لَلْآبْ، بَعْدْمَا يَغْلَبْ ڤَاعْ اَلرِيَاسَاتْ وڤَاعْ اَلسُلُطَاتْ وڤَاعْ الْقُوَاتْ.
25
لِأَنُو خَاصْ الْمَسِيحْ يَمْلَكْ حَتَى يْدِيرْ الله عَدْيَانَهْ ڤَاعْ تَحْتْ رَجْلِيه.
26
والْعَدُوْ اَلتَالِي اَلْلِي غَادِي يَتْغَلَبْ عْلِيهْ هُوَ الْمُوتْ.
27
عْلَخَاطَرْ"الله دَارْ كُلْشِي تَحْتْ رَجْلِيهْ" وُكِي يْقُولْ "يْرَدْ كُلْشِي" ، مَعْنَتْهَا يَهْدَرْ عْلَى الْمَسِيحْ لِيَمْلَكْ مَنْغِيرْ لِي هُوَ فَي الْأَصْلْ يَمْلُكْ.
28
ولَكِنْ مَلِي يْكُونْ كُلْشِي تَحْتْ رَجْلِيهْ، فْهَاذَاكْ اَلسَاعَة اَلْإِبْنْ يْكُونْ خَاضَعْ لله اَلْلِي مَلْكَهْ عْلَى كُلْشِي، بَاشْ يْكُونْ الله هُوَ اَلْلِي غَادِي يَمْلَكْ عْلَى كُلْشِي.
29
وِإلاَ كَانُو الْمُوتَى مَايْوَلِيوْشْ مَنْ الْمُوتْ، وَاشْ مَنْ الْفَايْدَة عَنْدْ هَاذُوكْ اَلْلِي يَتْعَمْدُو عْلَى جَالْ الْمُوتَى؟ وعْلاَشْ يَتْعَمْدُو عْلَى جَالْهُمْ؟.
30
وعْلاَشْ نْخَاطْرُو حْنَا بَحْيَاتْنَا كُلْ سَاعَة؟
31
رَاهْ كُلْ نْهَارْ نْشُوفْ الْمُوتْ ، وأنَا نْقُولْ هَاذء اَلشِي يَا الْخُوتْ نَفْتَخَرْ بِيكُمْ فَالْمَسِيحْ يَسُوعْ رَبْنَا.
32
وِإلاَ أَنَا غِيرْ إِنْسَانْ وتْحَارَبْتْ مْعَ الْوُحُوشْ اَلْلِي فْأَفَسُسْ، وَاشْ مَنْ فَايْدَة عَنْدِي؟ وِإلاَ كَانْ مَكَاشْ قِيَامَة اَلْمُوتَى، خَلِيوْنَا نَاكْلُو ونْشَرْبُو غَادِي نْمُوتُو.
33
مَا تْغَلْطُوشْ " اَلْعَشْرَةْ اَلْفَاسْدَة تَفْسَدْ اَلتَرْبِيَة الَمْلِيحَة".
34
وَلِيوْ لَلْبَرْ تَاعْكُمْ ومَا تْذَنْبُوشْ، كَايْنِينْ وَحْدِينْ مَا يْعَرْفُوشْ الله. ونْقُولْكُمْ هَاذَشِي بَاشْ نْحَشَمْكُمْ.
35
ولَكِنْ يَسَقْسِي وَاحَدْ: كِيفَاشْ يْقُومْ الْأَمْوَاتْ؟ وبِأَيْ جَسَدْ يْوَلِيوْ؟.
36
يَا لْحَمْقَا! اَلزَرِيعَة كِي تَزْرَعْهَا مَاغَادِيشْ تَحْيَا إِلاَ مَامَاتَتْشْ.
37
وهَاذَاكْ اَلشِي اَلْلِي تْزَرْعَهْ مَاشِي هُوَ اَلنَبْتَة اَلْلِي غَادِي تَطْلَعْ مَنْ بَعْدْ، ولَكِنْ هُوَ اَلزَرِيعَة اَلْلِي تَقْدَرْ تْكُونْ تَاعْ الْقَمْحْ وَلاَ شِي زَرِيعَة خْرَى.
38
والله غَادِي يْمَدْهَا الْجَسَدْ اَلْلِي بْغَا هُوَ، وكُلْ زَرِيعَة غَادِي يْمَدْهَا خَاصْ بِيهَا.
39
مَكَاشْ جَسَدْ يَشْبَهْ جَسَدْ وَاحَدْ آخَرْ، لَلْإِنْسَانْ جَسَدْ تَاعَهْ، ولَبْهَايَمْ جَسَدْ وَحَدْهُمْ، ولَطْيُورْ جَسَدْ وَحَدْهُمْ، ولَلْحُوتْ جَسَدْ وَحَدْهُمْ.
40
كَايَنْ جَسَدْ تَاعْ اَلسْمَاء وكَايَنْ جَسَدْ تَاعْ اَلآرْضْ، ولَكِنْ مَجْدْ اَلسْمَاء وَحْدَهْ ومَجْدْ اَلآرْضْ وَحْدَهْ.
41
مَجْدْ اَلشَمْسْ وَحْدَهْ، مَجْدْ الَقْمَرْ وَحْدَهْ، ومَجْدْ اَلنُجُومْ وَحْدَهْ، وكُلْ مَجْدْ نَجْمْ يَخْتَلَفْ عَنْ مَجْدْ نَجْمْ وَاحَدْ أَخَرْ.
42
وهَكَا حَتَى فْي قِيَامَةْ اَلْأَمْوَاتْ: يَزْرَعْ جَسَدْ مَيَتْ ويْقُومْ جَسَدْ حَيْ.
43
يَزْرَعْ بْلاَ قِيمَة ويْقُومْ فَالْمَجْدْ، ويَزْرَعْ ضْعِيفْ ويْقُومْ قْوِيْ.
44
يَزْرَعْ جِسْمْ حَيَوَانِى ويْقُومْ جِسْمْ رُوحَانِي، وكِمَا كَايَنْ جَسَدْ حَيَوَانِي كَايَنْ جَسَدْ رُوحَانِي.
45
وهَكَا مَكْتُوبْ" وَلَى آدَمْ، اَلْإِنْسَانْ اَللَوَلْ، نَفْسَا حَيَة". وآدَمْ اللَخَرْ رُوحْ يْمَدْ اَلْحَيَاةْ.
46
فَاللَوَلْ مَاكَاشْ إِنْسَانْ اَلرُوحِي، ولَكِنْ كَانْ اَلْإِنْسَانْ الْأَرْضِي ومَنْ بَعَدْ جَا اَلرُوحِي.
47
اَلْإِنْسَانْ اَللَوَلْ مَنْ اَلْآرْضْ تْرَابْ، والْإِنْسَانْ اَلثَانِي جَا مَنْ اَلسْمَا.
48
كِمَا الْإِنْسَانْ لِي تَنْدَارْ مَنْ اَلتْرَابْ هَكَا حَتَى اَلْلِي هُمْ مَنْ تْرَابْ، وكِمَا الْإِنْسَانْ اَلْلِي جَا مَنْ اَلسْمَا هَكَا اَلْلِي هُمْ مَنْ اَلسْمَا.
49
وكِمَا كُنَا عْلَى صُورَة اَلْإِنْسَانْ اَلْلِي تَنْدَارْ مَنْ اَلتْرَابْ هَكَا غَادِي نْكُونُو عْلَى صُورَة اَلْإِنْسَانْ اَلْلِي جَا مَنْ اَلسْمَا.
50
رَانِي نْقُولْ يَا الْخُوتْ بَلِي الْجَسَدْ اَلْلِي مَنْ اَللْحَمْ والدَمْ مَايَقْدَرْشْ يَوْرَثْ مَمْلَكَة الله، و اَلْلِي غَادِي يَفْنَا مَايَقْدَرْشْ يَوْرَثْ اَلْلِي مَايَفْنَاشْ.
51
هَا وَاحَدْ اَلسَرْ غَادِي نْقُولْكُمْ : مَا غَادِيشْ نْمُوتُو ڤَاعْ، ولَكِنْ ڤَاعْ غَادِي نَتْبَدْلُوا.
52
وغَادِي فْرَمْشَةْ عِينْ، مَلِي يَتَسْمَعْ اَلْبُوقْ اَللَخَرْ، ويَتَنْفَخْ فَالْبُوقْ، وغَادِي الْمُوتَى يْقُومُو حَيِينْ وحْنَا نَتْبَدْلُو.
53
وكِي تَلْبَسْ الْجَسَدْ الْفَانِيَة الْجَسَدْ لِي مَايَفْنَاشْ، وتَلْبَسْ الْجَسَدْ الْمِيْتَة الْجَسَدْ لِي مَايْمُوتْشْ
54
وكِي تَلْبَسْ الْجَسَدْ الْفَانِيَة الْجَسَدْ لِي مَايَفْنَاشْ، ويَلْبَسْ الْجَسَدْ الْمَيَتْ الْجَسَدْ لِي مَايْمُوتْشْ، فْهَاذِيكْ اَلسَاعَة يَكْمَلْ الَكْلاَمْ اَلْلِي جَا فَكْتَابْ الله: " تْهَلْكَتْ الْمُوتْ وكَمَلْ اَلنَصْرْ".
55
وِينْ هِيَ شَوْكْتَكْ يَالْمُوتْ؟ وِينْ هِيَ اَلنَصْرْ تَاعَكْ؟
56
شُوكَةْ اَلْمُوتْ هِيَ اَلذُنُوبْ، والْقُوَة تَاعْ اَلذْنُوبْ هِيَ الشَرِيعَة.
57
ولَكِنْ نْشَكْرُو الله لِي مَدْنَا اَلنَصْرْ بْرَبْنَا يَسُوعْ الْمَسِيحْ.
58
يَا خُوتِي الَعْزَازْ، كُونُو ثَابْتِينْ وَما تَزْعَزْعُوشْ، كَثْرُو فْي خِدْمَةْ اَلرَبْ فْكُلْ وَقْتْ، ورَاكُمْ تْعَرْفُو بَلِي تْعَبْ مَاشِي بَاطَلْ فَالرَبْ.