الإصحاح 14
1
قَلْبُوا عْلَى الْمَحَبَة وبْغِيوْ بَزَافْ الْمَوَاهِبْ اَلرُوحِيَة، وبَالْخُصُوصْ مَوْهِبَة اَلنُبُوَة.
2
اَلْلِي يَتْكَلَمْ شِي لُغَة مَاشِي مَفْهُومَة، رَاهْ مَا يَتْكَلَمْشْ مْعَ النَاسْ ولَكِنْ مْعَ الله. عْلاَهْ حَتَى وَاحَدْ مَايْفَهْمُو لْأَنُو بَالرُوحْ يَتْكَلَمْ بَالْأَسْرَارْ.
3
ولِي يَتْنَبَأ، رَاهْ يَتْكَلَمْ مْعَ النَاسْ بَاشْ يَبَيَنْهُمْ ويْشَجَعْهُمْ ويْقَوِيهُمْ.
4
اَلْلِي يَتْكَلَمْ بالألسنة رَاهْ يَبْنِي رُوحَهْ، ولِي يَتْنَبَأْ رَاهْ يَبْنِي الْكَنِيسَة.
5
رَانِي بْغِيتْكُمْ ڤَاعْ تَهَدْرُوا بَلُغَاتْ مَاشِي مَفْهُومَة، ولَكِنْ مْلِيحْ تَتْنَبْأُو. اَلْلِي يَتْنَبَأْ خِيرْ مَنْ اَلْلِي يَتْكَلَمْ بِلُغَاتْ، مَنْ غِيرْ إِلاَ تَرَجْمُوهَا بَاشْ تَتْقَوَى الْكَنِيسَة.
6
لُوكَانْ يَا الْخُوتْ نْجِي عَنْدْكُمْ وتْكَلَمْتْ بْلُغَة مَاشِي مَفْهُومَة، بْوَاشْ غَادِي نَنْفَعْكُمْ؟ مَا نَنْفَعْكُمْ بْوَالُو مَنْ غِيرْ إِلاَ تْكَلَمْتْ مْعَاكُمْ بَالْوَحْيْ وَلاَ بَالْمَعْرِفَة وَلاَ بَالنُبُوَة وَلاَ بَالتَعْلِيمْ.
7
حَتَى صْوَالَحْ تَاعْ الْمُوسِيقَة اَلْلِي مَا فِيهَمْشْ حْيَاةْ، كِيمَا الْمَزْمَارْ والْقِيتَارْ، كِي مَا تْكُونْشْ اَلنَغْمَة تَاعْهُمْ بَايْنَة، كِيفَاشْ تَفْرَقْ بِينْ اَلنَغْمَة تَاعْ الْمَزْمَارْ وَلاَ تَاعْ الْقِيتَارْ؟
8
وِإلَا صُوتْ الْبُوقْ مَارَاهْشْ بَايْنْ، شْكُونْ غَادِي يْوَجَدْ رُوحَهْ لَلْحَرْب؟.
9
هَكَا حَتَى نْتُمْ إِلاَ مَا كُنْتُوشْ تَتْكَلْمُو بَكْلاَمْ مَفْهُومْ، كِيفَاشْ غَادِي نَعْرَفْ وَاشْ تْقُولْ؟
10
رَاهْ بْلاَ شَكْ كَايَنْ بَزَافْ تَاعْ اَللُغَاتْ فَالدَنْيَا، وكُلْ وَحْدَة فِيهُمْ عَنْدْهَا مَعْنَى.
11
كِي مَانَعْرَفْشْ اَللُغَة اَلْلِي يَتْكَلَمْ بِهَا وَاحَدْ، غَادِي نْوَلِي بَرَانِي بَالنَسْبَة لِيهْ، وهُوَ تَانِي بَرَانِي بَالنَسْبَة لِي.
12
وهَكَا حَتَى أَنْتُمْ، بْغِيتُو تْكُونْ عَنْدْكُمْ الْمَوَاهِبْ اَلرُوحِيَة، قَلْبُو عْلَى لِي تَبْنِي الْكَنِيسَة بَزَافْ.
13
وعْلَى هَادَشِي اَلْلِي يَتْكَلَمْ بَلُغَة مَاهِيشْ مَفْهُومَة، خَاصَهْ يْصَلِي بَاشْ يْمَدْلَهْ الله اَلتَرْجَمَة لْهَادَاكْ اَلشِي لِيْقُولَهْ.
14
عْلَى خَاطَرْ إِلاَ صَلِيتْ بْلُغَة مَاهِيشْ مَعْرُوفَة، رَاهْ رُوحِي تْصَلِي لَكِنْ عَقْلِي مَا يْسَتْفَادْ وَالُو.
15
كِيفَاشْ نْدِيرْ؟ غَادِي نْصَلِي بَالرُوحْ، نْصَلِي بَالْعَقْلْ، ونْسَبَح بَالرُوحْ، ونْسَبَحْ بَالْعَقْلْ.
16
لُوكَانْ تَشْكَرْ بَالرُوحْ، كِيفَاشْ هَادَاكْ اَلْلِي جَا جْدِيدْ يْقُولْ "أَمِينْ" عْلَى الشُكْرْ تَاعَكْ وهُوَ مَاعْرَفْشْ وَاشْ تْقُولْ؟.
17
نْتَ شْكَرْتْ مْلِيحْ، لَكِنْ وَاحَدْ أَخَرْ مَاسَتْفَادْ وَالُو.
18
نَشْكَرْ الله رَانِي نَتْكَلَمْ بْلُغَاتْ خِيرْ مَنْ كُلْ وَاحَدْ مَنْكُمْ،
19
ولَكِنْ فَالْكَنِيسَة نَبْغِي نْقُولْ خَمْسْ كَلْمَاتْ بْعَقْلِي بَاشْ نْعَلَمْ بِهُمْ لَخْرِينْ، خِيرْ مَا نْقُولْ عَشْرَالاَفْ كَلْمَة بْلُغَة مَاشي مَفْهُومَة.
20
يَا الْخُوتْ، مَا تْكُونُوشْ بْزُوزْ صْغَارْ فَالتَفْكِيرْ تَاعْكُمْ، ولَكِنْ كُونُو بْزُوزْ صْغَارْ فَالشَرْ وكُونُو وَاصْلِينْ فْالَفْهَامَة.
21
مَكْتُوبْ فَكْتَابْ اَلشَرِيعَة: " رَاحْ نْكَلَمْ هَادْ اَلشَعْبْ بْفَمْ اَلنَاسْ لِيْهَدْرُو لُغَة وَاحَدْ أُخْرَي، وهَكْذَا مَايْسَمْعُونِيشْ، هَاكْذَا يْقُولْ اَلرَبْ ".
22
وهَكَا رَاهْ اَللُغَاتْ بَيَانْ مَاشِي لَلْمُوْمِنِينْ ولَكِنْ لْهَادُوكْ اَلْلِي مَايْأَمْنُوشْ. ولَكِنْ اَلنُبُوَة رَاهَا مَاشِي لْهَادُوكْ اَلْلِي مَايْأَمْنُوشْ،
23
ولَكِنْ لَلْمُؤمِنِينْ. كِي تَجْتَمَعْ الْكَنِيسَة ڤَاعْ وكَانْ كُلْشِي بْلُغَاتْ مَاشِي مَفْهُومَة، ودَخْلُو وَاحْدِينْ مَاشِي قَارْيِينْ، وَلاَ مَاشِي مُؤْمِنِينْ، وَاشْ مَاغَادِيشْ يْقُولُو رَاهُمْ يْخَرْفُو؟.
24
ولَكِنْ كِي كُلْشِي بَالنُبُوَة ودْخَلْ وَاحَدْ مَاشِي مُؤْمِنْ وَلاَ مَاشِي قَارِي، رَاهْ كُلْشِي يْلُومَهْ وكُلْشِي يَحْكَمْ عْلِيهْ.
25
وغَادِي يْبَانْ اَلشِي اَلْلِي مْخَبِي فَالْقَلْبْ ويَرْكَعْ ويَسْجُدْ لله ويَعْتَرَفْ بَلِي بَالصَحْ الله فِيكُمْ.
26
وَاشْ لاَزَمْ تْدِيرُو يَا الْخُوتْ؟ كِي تَجْتَمْعُو، وكُلْ وَاحَدْ مَنْكُمْ عَنْدَهْ مَزْمُورْ، وَلاَ عَنْدَهْ تَعْلِيمْ، عَنْدَهْ وَحْيْ، عَنْدَهْ لُغَةْ، عَنْدَهْ تَرْجَمَة، خَاصْ كُلْ هَادَشِي يْكُونْ بَاشْ تَبْنِيوْ بَعْضِيَاتْكُمْ.
27
كِي يَتْكَلَمْ وَاحَدْ بْلُغَة اَلرُوحْ، خَاصْ يَتْكَلْمُو زُوجْ وَلاَ ثْلاَثَة بَالتَرْتِيبْ، ووَاحَدْ يْكُونْ يَتَرْجَمْ.
28
ولَكِنْ كِي مَايْكُونْشْ وَاحَدْ يَتَرْجَمْ خَاصْ اَلْلِي يَتْكَلَمْ بَلُغَة اَلرُوحْ يَسْكُتْ فَالْكَنِيسَة ويَتْكَلَمْ مْعَ رُوحَهْ ومْعَ الله.
29
ولِي عَنْدْهُمْ اَلنُبُوَة، خَاصْ زُوجْ ولاَ ثْلاَثَة لَخْرِينْ يْمَيْزُو فَكْلاَمْهُمْ.
30
ولَكِنْ إِلاَ وْحَى الله لْوَاحَدْ مْجَمَعْ، خَاصْ اَللَوَلْ يَسْكُتْ.
31
تْقَدْرُو ڤَاعْ تَتْنَبْأُو وَاحَدْ مُورْ وَاحَدْ بَاشْ ڤَاعْ يَتْعَلَمْ ويَتْشَجَعْ.
32
وأَرْوَاحْ اَلْأَنْبِيَاءْ تْطِيعْ اَلْأَنْبِيَاءْ،
33
عْلَى خَاَطْرْ الله، مَاشِي إِلاَهْ فَوْضَى بَصَحْ إِلاَهْ اَلسَلاَمْ. فِي ڤَاعْ كَنَائِسْ الَمْقَدْسِينْ.
34
اَلنْسَا خَاصْهُمْ يْسَكْتُوا فَالْكَنَائِسْ مَاشِي مَسْمُوحْ لْهُمْ يْهَدْرُوا، ولَكِنْ خَاصْهُمْ يْطِيعُو كِمَا تْوَصِي اَلشَرِيعَة.
35
وِإلاَ بْغَاوْ يَتْعَلْمُو حَاجَة، خَاصْهُمْ يْسَقْسِيوْ رْجَالْهُمْ فَالدَارْ،عْلَى خَاطَرْ عِيبْ اَلمْرَا تَهْدَرْ فَالْكَنِيسَة.
36
وَاشْ مَنْ عَنْدْكُمْ خْرَجْ كْلاَمْ الله؟ وَلاَ وْصَلْ عَنْدْكُمْ وَحَدْكُمْ؟
37
إِلاَ كَانْ وَاحَدْ يَحْسَبْ رُوحَهْ نَبِيْ وَلاَ عَنْدَهْ مَوْهِبَة رُوحِيَة، غَادِي يَعْرَفْ مْلِيحْ بَلِي هَادَشِي اَلْلِي كْتَبْتْ هُوَ أَمْرْ مَنْ اَلرَبْ.
38
ولَكِنْ إِلاَ وَاحَدْ مَايَعْرَفْشْ هَادَشِي، مَايَعْتَرَفْشْ بِيهْ.
39
عْلَى هَادْ اَلشِي يَاالْخُوتْ، بْغِيوْ اَلنُبُوَة ومَا تْمَنْعُوشْ لِي بِغَا يَتْكَلَمْ بْلُغَاتْ رُوحِيَة.
40
ولَكِنْ خَاصْ كُلْشِي يْكُوْن بَالْإِحْتِرَامْ وبَالنِضَامْ.