الإصحاح 16
1
أَمَا مَنْ جِهَة نْجَمْعُوا الْمُعَاوَنَة لَلْخُوتْ الْمَقَدْسِينْ، دِيرُو نْتُمْ كِيمَا وَصِيتْ الْكَنَايَسْ تَاعْ غَلاَطِيَة.
2
فَالنْهَارْ اَللَوَلْ فْكُلْ سِيمَانَة، كُلْ وَاحَدْ مَنْكُمْ خَاصَهْ يَخَبِي عَنْدَهْ هَادْ اَلشِي اَلْلِي جْمَعْهَا مَنْ اَلرِبْحْ تَاعَهْ، بَاشْ كِي نْجِي لْعَنْدْكُمْ مَاتَحْتَاجُوشْ عَادْ تْجَمْعُو الْمَعُونَة.
3
وكِي نَلْحَقْ، غَادِي نَرْسَلْ هَادُوكْ اَلْلِي خَيَرْتُوهُمْ، ونْمَدَلْهُمْ بْرِيَاتْ بَاشْ يَدِيوْ الْمُعَاوْنَة تَاعْكُمْ لْأُورْشَلِيمْ.
4
وِإلَا كَانْ لاَزَمْ نَمْشِي حَتَى أنَا مْعَاهُمْ، يْرُوحُو مْعَايَا.
5
وغَادِي نْجِي لْعَنْدْكُمْ كِي نْفُوتْ لْمَكْدُونْيَة، وأَنَا رَايَحْ عَنْدْهَا.
6
ونَقْدَرْ نَقْعَدْ مْعَاكُمْ، وَلاَ نْفُوتْ عَنْدْكُمْ اَلشْتَا بَاشْ تْعَوْنُونِي نْكَمَلْ اَلسَفَرْ تَاعِي.
7
مَا بْغِيتْشْ نْشُوفْكُمْ بَلْخَفْ كِي نْفُوتْ عَنْدْكُمْ، بَصَحْ نَتْمَنَا نَقْعَدْ مْعَاكُمْ وَقْتْ طْوِيلْ إِلاَ بْغَا اَلرَبْ.
8
وُرَانِي نَقْعَد فْأَفَسُسْ حَتَى لْيُومْ الْخَمْسِينْ.
9
تْحَلْ لِي بَابْ كْبِيرْ بَابْ لَلْخِدْمَة، والنَاسْ لِي يْعَادُونِي كْثَارْ.
10
وِإلاَ جَا تِيمُوثَاوَسْ، تْهَلاَوْ فِيهْ بَاشْ يْحَسْ بَالْأَمَانْ مْعَاكُمْ، لِأَنُو حَتَى هُوَ خَادَمْ اَلرَبْ كِيمَا أَنَا.
11
مَايَحْتَقْرَهْشْ حَتَى وَاحَدْ، ولَكِنْ عَاوْنُوهْ وبَعْثُوهْ عْلَى خِيرْ لْعَنْدِي، رَانِي نَسْتَنَاهْ مْعَ الْخُوتْ.
12
أَمَا مَنْ جِهَةْ خُونَا أَبُولُسْ، رَانِي طْلَبْتَهْ بَزَافْ بَاشْ يِجِي لْعَنْدْكُمْ مْعَ الْخُوتْ، ولَكِنْ مَابْغَاشْ يْجِي ضُرْوَكْ، وغَادِي يْجِي مَلِي يْكُونْ عَنْدَهْ الْوَقْتْ.
13
كُونُو سَاهْرِينْ وثَابْتِينْ فَالْإِيمَانْ، كُونُو رْجَالْ وكُونُو قْوَيِينْ.
14
دِيرُو كُلْ حَاجَةْ بَالْمَحَبَة.
15
رَاكُمْ تْعَرْفُو بَلِي عَايْلَةْ إِسْتِفَانُوسْ هُمْ اَللَوْلِينْ اَلْلِي أَمْنُو بَالْمَسِيحْ فْأَخَائِيَة، ومَدُو حْيَاتْهُمْ بَاشْ يْخَدْمُو الِمُؤْمِنِينْ، وعْلِيهَا نَطْلَبْ مَنْكُمْ يَا الْخُوتْ
16
بَاشْ حَتَى نْتُمْ تْطِيعُو اَلْلِي كِيمَا هُمَا، وڤَاعْ اَلْلِي يْشَارْكُو مْعَاهُمْ فَالْخِدْمَة ويَتْعَبْ مْعَاهُمْ.
17
رَانِي فْرَحْتْ كِي جَا إِسْتِفَانُوسْ وفَرْتُونَاتُوسْ وأَخَائِيكُوسْ، هُمْ اَلْلِي نَابُو عْلِيكُمْ فَغْيَابْكُمْ.
18
عْلَى خَاطَرْ هَنَاوْ خَاطْرِي وخَاطَرْكُمْ، تْهَلاَوْ فَالنَاسْ كِيمَا هَادُو.
19
تْسَلَمْ عْلِيكُمْ كَنَايَسْ آسْيَا، وأَكِيلَا وبْرِيسْكِلاَ يْسَلْمُو عْلِيكُمْ بَزَافْ فَالرَبْ مْعَ الْكَنِيسَة اَلْلِي تَجْتَمَعْ فْي دَارْهُمْ.
20
ڤَاعْ الْخُوتْ يْسَلْمُو عْلِيكُمْ، سَلْمُو عْلَى بَعْضِيَاتْكُمْ بَسْلاَمْ مُقَدَسْ.
21
وأَنَا بُولُسْ نْسَلَمْ عْلِيكُمْ بْخَطْ يَدِي.
22
إِلاَ كَانْ شِي وَاحَدْ مَايَبْغِيشْ اَلرَبْ رَاهْ مَلْعُونْ! مَارَنْ أَتَا، أَجِي يَا رَبْنَا.
23
نِعْمَةْ اَلرَبْ يَسُوعْ اَلْمَسِيحْ تْكُونْ مْعَاكُمْ.
24
والْمَحَبَة تَاعِي لِيكُمْ كُلْكُمْ فَالْمَسِيحْ يَسُوعْ.