¹ Binadiaaga ti hridxi roo bicá hridxi dede ra jmá nandxo que ne gudxibe ca gadxe Angel que: "Guye ne bixhii ca gadxe xhiga xti xhiana xti Diuxi." ² Niru Angel que guyee ne bixhii xhiga xti lu layú; Nayudxu ne nana gui'dxu beeda luguia ca binni, ca ni napa ca duuba xti mani que', ca ni bisisaca ca bido' xtibe. ³ Guiropa Angel que bixhii xhiga xti ndani nisado'. Gucani casi hrini xti ti binni ni ma guti, ne guira ni nabani ndani nisado' guti. ⁴ Guiona Angel que bixhii xhiga xti ndani ca guiigu ne ca ra rindani nisa; ne guca ca hrini. ⁵ Binadiaga' Angel xti ca nisa que guní: "Lii nga ruunu jneza -ni naca ne ni guca, Ni nandxo'- ti purti lii ma bedaneu ca juiciu di'. ⁶ Ti purti laacabe bixhii cabe hrini xti ca ni runi cre', ne ca profeta, bidiilu laacabe hrini para gue' cabe. Ndi nga ni naquiiñe guica cabe. ⁷ Binadiaga altar que bicabi: "Yá, xhaiquenu Diuxi ni napa de guiraxhixhe xtipa, ni runi mandar lugia de guira, ca juiciu xtilu naca ca dxandí ne jneza." ⁸ Guidapa Angel que bixhii xhiga xti lu gubidxa, ne gucua be lugar para guzaaqui be binni ne bele. ⁹ Laaca guya'qui ca pur naróba guenda nandá que, ne laaca gulu dí ca lá Diuxi, Ni napa xtipa Luguia ca guendananá di'. Laaca que nibizaa ca o nudí ca guenda nandxo'. ¹⁰ Ra gaayu Angel que bixhii xhiga xti lu bangu runi mandar xti maní que', ne gelacahui bitaagu ra runi mandar be. Laaca gudoya' ca ludxica' gúni guenda naná que'. ¹¹ Laaca gulu dí ca Diuxi de guiba' gúni yuuba xti ca ne ca gui'dxu ne nin saque' laaca que niná ca nibiiza ca de ni biini ca. ¹² Ra Xhoopa Angel que bixhii xhiga xti ndani ti guiigu naróba, Éufrates. Nisa xti bibidxi ti saca ganda gusuchahui neza para tiidi ca Rey ni seeda ca de neza ra rindani gubidxa. ¹³ Biiya chona Espiritu nayudxu ni rilui ca casi biidxi' ni seda guire' de rua ti Dragon, de maní que' ne de profeta ni cadi dxandi que'. ¹⁴ Ti purti laacabe naca cabe Espiritu xti binidxaba ni cayuuni duuba de guenda ridxagayaa. Laacabe siguire' cabe neza ra nuu ca Rey xti interu guidxilayu, ne saca gudi lisaa cabe laaca tobisi para guenda ridxelazaa xti dxo ro' xti Diuxi ni napa de guiraxhixhe xtipa. ¹⁵ ("Laguuya! Naa senda casi ti gubaana! Ndaya nga naca ni riana cayapa, riaana ca nacuca shaba ca, cadi gueda guiree ca xhie' ladi ca ne guuya cabe guenda rituilú xti ca.") ¹⁶ yenecabe laaca tobisi ti ra lá lu didxa hebreu, Armagedón. ¹⁷ Oraque' ra gadxe angel que' bindate xhiga xti lu bii. Oraque ti ridxi zoo biree de ndani yu'du' ne de lu bangu ra raca mandar que' ne ná: "Ma gucani!". ¹⁸ Biree biani rayu, caxhidxi iba', ne caxhidxi rayu ne ti xhú narooba - Ti xhú jmá narooba que intiica xhú huayaca dede dxi binni nuu ndani guidxilayu di', saca de narooba guca xhu di'. ¹⁹ Guidxi ni narooba que guca ni chona nda', ne ca guidxi xti ca guidxi ro' gucadé ca. Oraque' Diuxi bietenaladxi de Babilonia ni narooba, ne Laabe bidii be guidxi que' xhiga dxa tipa de vinu ni guca de xhiana ni izá' cadxichi xtibe. ²⁰ Guira layu' nuu galahui nisado' binitilú ne ca dani ma que guidxelaa ca. ²¹ Narooba guie' de granisu, ni nanaa bia' ti talentu, biaba ca de iba' luguia binni. Laacabe guludí cabe Diuxi pur ca guendananá de granisu que', ti purti izá naná ngue.