¹ Biyadxie' ne biiya dendxu que' suhuaa lu daani Sión. Ne nuune laabe 144,000 ni napa ca lábe ne lá bixhozebe cáa lucua ca. ² Binadiaga ti ridxi de guiba' ni caxhidxi casi ribidxia' xtale nisa ne hridxi layu nadipa. Hridxi ni binadiaga que laaca guca ni casi ca ni ruxhidxi ca arpa, cuxhidxi ca arpa xtica ³ Laaca cayuunda ca ti didxa hriunda nacubi nezalú bangu ra runi mandar Diuxhi, ne nezalú ca guidapa bultu nabani, ne ca ni nagola. Guiruti que ganda guiziidi ca didxa hriunda que' pa cadi ca 144,000 si que', ca ni ma bilá ca de ndani guidxilayu. ⁴ Ca ndi nga ca ni caaru guni mucu ca laca laaca ne gunna, ti purti ma gupa ca laaca naya' de chú ne xtobi. Ca ndi nga ni sinaanda ca dendxu que ra tiica Seebe. Ca ndi nga ca ni bilá ca de ndani guidxilayu' casi ni niru guche ndú para Diuxhi ne para Dendxu huiini que'. ⁵ Nin ti guenda ruziigui' que nidxela ndani rua' ca, pue laaca que gapa ca donda nezalú bangu runi mandar xti Diuxhi. ⁶ Biya' xti Angel canapapa lu bii, ni napa didxa chi guinii ni que rati, de ca ni nacubi sicarú para güinebe ni cani nabaani ndani guidxilayu' -Cada tobi de ca guidxiro', binni zaa, didxa, ne binni. ⁷ Ne laabe bicaa be ti hridxi nadipa: "Laguidxibi Diuxhi ne lagudii Laabe guira guenda nandxo'. Ti purti dxi giaba xti Juiciu xtibe ma bedanda'. Lagusisaca Laabe, Xha ni bizaa guiba', guidxilayu', nizado', ne ca ra hrindani nisa." ⁸ Xti Angel - Ti guiropa Angel- ziniiru': "Ma biaaba, ma biaaba babilonia ni narooba, ni biini de que guira guidxiro' guee' ca vinu xti guenda riuladxi guenda que iquiiñe. ⁹ Xti Angel -Ra Guiona Angel- zinanda laacabe, ne naa, ne hridxi nadipa: "Pa tuuxha gusisaca maní que ne bido' xtibe, ne guica' duuba xtibe lucua o ladu ndiga ná, ¹⁰ Laa laaca zee' Vinu xti xhiana xti Diuxhi, vinu ni ma bidaa, sin ciu xhia' ndani xhiga xti xiana xtibe. Binni ni guee ni iza' sacana ne bele ne azufre nezalú ca Angel ni nandxo', ne nezalú xha Dendxu que'. ¹¹ Gu'xhu xti guenda nana xti cabe riguiiba dede guira dxi ne guira dxi, ne laaca que riziiladxi ca ridxi ne hiaxhini - Cani rusisaca ca mani di' ne bido' xti, ne guira ca ni guicaa duuba xti lá be. ¹² Rarí' nuu ti guenda ribiidxi para guenda ribeeza ni que riluxhe xti ca ni nandxo', cani ruzuuba ca didxa xti ca guendaruni mandar xti Diuxhi, ne runi cre' ca Jesus." ¹³ Binadiaga ti ridxi de guiba' ni naa: "Bicaa ndi': Ndaya nga naca ca ni guuti ca lu señor." "yá", naa Espiritu, "Ti ma ganda laacabe guiziiladxi cabe de ca xhiiña cabe, pue ca ni biini cabe sazaa nanda laacabe." ¹⁴ Biyadxie ne biiya nu ti zaa naquiichi raque'. Ne luu zaa que zuuba tobi ni rilui' casi xhiiñi Binni guidxilayu'. Laabe napabe ti la'pa' de oro iquebe' ne ti nagandxu ni ruga ne naduxhu' ndani ná. ¹⁵ Oraque' biree xti Angel de ndani yu'du' ne bica ridxi ne ti ridxi nadipa xha ni zuuba lu zaa que': "Gucuaa gandxu' ruga xtilu ca, ne bizulu bichuugu biníi, ti purti ma bedanda dxi guiruugu ni guidxi'ba. ti purti bindani ca ma nagüi' ni". ¹⁶ Oraque ni zuuba lu zaa que' biniibi gandxu' ruchuugu xti que' ti ladu ne xtobi luguia' guidxilayu', ne biruugu biní ndani guidxilayu ¹⁷ Xti Angel biree de ndani yu'du' de guiba'; laa laca naaze ti gandxu ni rugaa ne naduxhu. ¹⁸ Oraque xti angel biree de lu altar ra riu' guxhu rindánaxhi, ni napa ti guenda runi mandar luguia bele. Laabe bicaa be ridxi ne ti ridxi nadipa xha Angel ni naaze gandxu naduxhu que: "Gucua gandxu duxhu xtilu ne bicui manojo ca bee'za Uvas de ca layu' riu' uvas ndani guidxilayu, ti purti ca uvas xti cani ca ma nagüí. ¹⁹ Angel que biniibi machete duxhu xti ti ladu ne xti ladu luguia guidxilayu' ne bicuibe manojo ca uvas ni biruugu ndani guidxilayu', ne bilaa be laaca ndani ti badiaá narooba de vinu ni naca xhiana xti Diuxhi. ²⁰ Pila que' bixhatañe cabe uvas que bituñe cabe laa fuera de guidxi, ne hrini biree de laa dede ra nazoo frenu nuu rua caballu para bia' chona gayua' kilometru.