¹ Ora que biiya xti ángel nadipa' sedayete de iba'. Bitaagu ti zá Laabe ne biree ti xtuxu de xtale color de xa ique be. Seda gaca lú be casi gubidxa ne ñeebe seda gaca casi ti pilar de béle. ² Ne naaze be ti gui'chi' dudú huiini ma zuxale' lu ná be, laabe gula'quibe ladu ndiga' ñeebe lu nisa do' ne ñeebe ladu bíga' lu guidxilayú ³ Ora que laabe bicaabe ti ridxi ro'ba casi ti lion ora cuguá ridxi, ne ora laabe bicaabe ridxi, ca gádxe rayu qué bicaa ca xtidxi ca'. ⁴ Ne ora ca gádxe rayu que bicaa ca xtidxi ca', mapeca chi gucaa, maala si binadiaga ti ridxi de iba' ne ná: "Nagaachi gu'pa ca ni gádxe rayu ca guní ca. cadi gucaalu ní." ⁵ yanna xa ángel ni biiya suhuaa lu nisa do' ne guidxilayú qué, gundisabe ladu ndiga' ná be iba' ⁶ ne bidii xtiidxabe pur ni Laa nabáni ne que siuu dxi gati qué - ni Laa bisa' ca iba' ne ira ni nuu lú ní, guidxilayú ne ira ni nuu lú, nisa do' ne ira ni nuu ndaani: "Ma que zandaa di' Diuxi. ⁷ Peru dxí ora xa gadxe angel que ma chi guxidxi cáchu qué, ora que ni naga'chi napa Diuxi qué záca ní, zacá casi ca Laabe ma gudxibe ni ca ni runi xiiñabe, ca profeta." ⁸ Xa ridxi ni binadiaga de iba' qué guni' ne naa xti tiru: "guyé, ne gucuaa gui'chi' du'du ni zuxale' ni naaze ángel ni suhuaa lu nisa do' ne guidxilayú." ⁹ Ora que naa guyaa ra nuu ángel qué ne gudxe laa gudii naa gui'chi' huiini ni du'du qué. Laabe gudxibe naa: "Gucuaa gui'chi' huiini du'du ca ne gudo ní. Zuni nda ni ndaani lu', peru ndani ruaa lu zácani nanaxi casi ca dxiña yaga." ¹⁰ Naa gucuaa de lu na' angel que xa gui'chi' huiini ni du'du que ne gudahua ní. Iza' nanaxi ni casi ca dxiña yaga ndani ruaa, peru gudi'di si gudahua ní ndaane qué binda'. ¹¹ Ora que tuuxa gudxi naa: "Lii naquiiñe guiní lu xti tiru xi chi guni Diuxi lugia xtale binni, ne' ca guidxi ro', ne'ira xixe diidxa, ne ca xaique guídxi."