¹ Bidii cabe naa ti nite para iquiiñé casi ti vara ni ruguu bia' ne cabé. Ne gudxi cabe naa: "Biasa ne guluu bia' yu'du' xti Diuxi , ne altar, ne biga'ba cani rusisaca laabe. ² Peru cadi cuu bia' lu layú nuu fuera de yu'du' cá, purti ma ucuaa ca ni cadi judíu ni', Laacabe zutu ñeecabe guidxi ndxo' pur chona iza aronda'. ³ Naa sudiee guiropa xpine'ca ni rini' ni biiya que guini' ca ne xtipa, diidxa ni naa gabe laaca pur chonna iza aronda', ne nacuca lari baaba' " ⁴ Ca ni rini'ni ni biiya na'ca cabe guiropa yaga aceituna ne guiropa candeleru ni nuu nezalu' Xpixuaana guidxilayú. ⁵ Ne pa chuu tu gacaládxi guniná laacabe, bele saree de ruaa cabe ne sunitilú ca ni ucaa lú laacabe. Tutica gacaládxi guniná laacabe, naquiiñe gática sacarí. ⁶ Ca ni rini' ni biiya di napaca xtipa para gutaaguca iba', ti ma que guiaba nisaguie bia dxí laaca guiní ca. Laaca napaca xtipa para guchaa ca nisa ne ga'ca ni rini ne para guniná ca guidxilayú ne ira tipu enda naná, ora tiica guluii la'dxi cá ⁷ Ora laacabe guiluxe guini cabe de xtiidxa Diuxi, xa máni' niguiree de ndaani bizé ni que gapa ra iluxe qué, zadxelasaa ne'laacabe. Laa zagiiñe laacabe ne suuti laacabe. ⁸ Xcuerpu cabe za'ta' ndani neza xti guidxi ro' (ni laa, seda gaca, ni rabicabe Sodoma ne Egipto) ra Xpixuaana tu bicaa cabe laa lu cruz. ⁹ Ne' chonna dxi ne galaa, ca binni de ira guidxi, guidxi huiini, de ira xixe diidxa, ne ca guidxi ro', suuya ca' xcuerpu cabe. Laaca que sudii cabe igaachi ca ndaani ba'. ¹⁰ Ca ni nabani ndaani guidxilayu sieche ca' de ni uca cabe, ne zunica saa. Ne zuseenda cabe ni gáde cabe entre laacabe; purti guiropa profeta di' binina'ca cani nabani ndaani guidxilayú. ¹¹ Ne tiidisi chonna dxi ne galaa que la? ti bi de guenda nabani xti Diuxi ziuu lugia cabe ne zusuhuaa cabe. Naro'ba enda ridxibi ziuu lugia ca ni gu'ya laacabe. ¹² Oraque, laacabe sunadiaga cabe ti ridxi naro'ba de iba' ni gabi laacabe: "¡Laqui'ba de rari'!". Oraque laacabe sagui'ba cabe iba' lu ti za, laga cayuuya ca ni bicaa lú laacabe qué. ¹³ Ne ora queca, saca ti xú naro'ba, tobi de chii nda de guidxi que za xa. Ne gadxe guixiapa de binni zati lu xu ro' qué, ne ca ni guilá quee zadxiibi ca' ne zusizacaca Diuxi de iba'. ¹⁴ Guiropa guénda nana'qué ma gudi'di. ¡Laguuya! ¡ Guiona guénda nana'qué seeda nagueenda! ¹⁵ Oraque ra bizaa gadxe ángel qué bixidxi ca'chu, ne xtale ridxo ro' de iba' guni'ca ne ná ca': "enda raca xaique xti guidxilayu di', Xpixua'nanu seda gaca xaique xti ni ne Cristu. Laabe suni mandar be de guiraa dxi ne para ira dxi." ¹⁶ Oraque, ca chupa late gande ne tapa ni nagola ca ni súba lu ca xpangu ndxo' ni nuu neza lú Diuxi qué, bisuxibi ca layu ne gulaqui lucua ca', ne bisizacaca Diuxi. ¹⁷ Laacabe guní cabe: Rudi'du xquixe lii Xpixua'nadu Diuxi ni laa na'pa de guiraa xixee guénda nondxoo ni Laa na'ca ne ni Laa gu'ca', purti Lii ma gucuaalu xtipa ro' xtilu' ne ma bizulu lu' guni mandar lu'. ¹⁸ Ira guidxi ro' bidxiichi ca', peru xiana xtiu ma bedandá. Dxi que ma bedandá, para que ca ni ma guti qué guihuini xi bi'ni ca' ne para que Lii quixe lu' ca profeta ni runi xiiña lu', ca ni laa runi cre ne ca ni bidxibi lá lu'; ne guiropa ca', ca ni que risáca ne ca ni napa ti guenda. Dxi qué ma bedandá, para que Lii gunduuxe lu' ca ni cunduuxe guidxilayú. ¹⁹ Oraque, yu'du' xti Diuxi ni nuu iba' bixale' ne guiiña ra bidii xtiidxa Duixi laanu qué bihuíni ni ndaani yu'du' xtibe. Ne biree xtuxu biaani, uxidxi laa, ne biree rayu, ne ti xu, ne biaba ti naro'ba bi yo'xo' de nisa naca casi guie.