¹ Ora ma gudixedu naquiiñe chuudu lu nisa neza Italia, laacabe gula'quicabe Pablo ne chupa chona de ca ni deguyoo que, gapa' ti xaique ti gayuaa dxu que laaca, ni laa Julio, ni naca de ti gendalisaa dxu laa Augusta. ² Laadu gucuaadu ziuudu lu nisa lu ti barcu dede Adramitena, ni ma yaca guiaxha lu nisa que guidubi naca guria nisado' xti Asia. Nga runi biabadu nisado' que. Aristarco de Tesalónica nuu Macedonia yene laadu. ³ Xti dxi que bietedu guria nisa lu guidxi xti Sidón, Julio nabe nacha'hui guca ne Pablo,ne bidiibe lugar laa che ranuu ca xamigu ti ma guuyaca laabe. ⁴ Ora que, guyuudu lu nisado' ne gudididu gaxa de guidxi lu nisa Chipre, gaxa de guidxi lu nisa que, purti cudxiiludu bi. ⁵ Ra ma gudididu lu ca nisa nuu gaxha de Cilicia ne Panfilia, yendadu Mira, ti guidxi xti Licia. ⁶ Ra que xaique ti gayuaadxu que bidxela ti barcu xti Alejandría ni che Italia. Laabe bidxiibabe laadu lu ni. ⁷ Ra ma gudididu ca nisa que chahui lu xtale dxi ne ra ma yendadu neca naganna gaxa de Gnido, bi que, que nudiidi lugar ñuurudu ladu que, para ora que gunaazedu gudubi naca ladu rapa cabe Creta, xti ladu xti Salmón. ⁸ Laadu gudididu guria nisa que nabe naganna, de ra yendadu ti guidxi la Buenos Puertos nuu gaxa de Guidxi xti Lasea. ⁹ Laadu yanna nabe ma bindaadu, ne dxi gulaaqui ca judiu giaanaca sin goo ca' que ma gudi'di', ne nave ma naxoo chuudu lu nisa. Ra que Pablo bisaniru lucabe', ¹⁰ ne guidxilaacabe: "Hombre ca, naa cayuuya viaje ma yaca guninu di' nabe nanna ne xtale guendaruniti ni, cadi si de ca ni neenu di ne de barcu di, sinu que nee xquendanabaninu. ¹¹ Peru xaique ti gayuaa dxu que maa bicaadiaga xaique ne ni xti barcu que, que ca ni guni' Pablo que. ¹² Ti purti izaa naganna tidicabe nannda rua' nisado' que, ne xtale de ca ni zee lu barcu que la guni' xtiidxacabe guireecabe de raque, pañanda si nindacabe guidxi Fenice, para tidicabe dxi riaba nanda ra que. Fenice la ti ra rinda barcu Creta ni, nudxiilú guia'huiini de ra rinandani gubidxa ne guetehuiini si de ra rindani gubidxa. ¹³ Ora bindubi huiini bi nisa que, zacaxa ca marineru que ma napa ca ni caquiiñe ca que. Ngue runi gundisacabe ancla que ne zeecabe guidubi guidxi Creta, gaxa de guria nisa que. ¹⁴ Peru gupa si ti ratu ti bi resiu, ni rabicabe bi yooxho, bizulu bichenda laadu ne zeeda de lu guidxi nuu lu nisa que. ¹⁵ Ora barcu que ma bati ladu che ne ma que ganda di gudxiiludu bi que, ne bidiidu guxubi yuu ni laadu. ¹⁶ Laadu yenneni laadu guidubi neza cayaapa xti ti guidxi huiini lu nisa la Cauda; ne naganna gunda bindibidxi'chidu balaaga rula' que. ¹⁷ Ora laacabe bidxiibacabe laabe, biquiiñe cabe doo para bindibicabe cascu barcu que. Laacabe cadxibicabe nidxelasaadu lu ca yuxi riaana lu nisa xti Sirte, para bindaacabe ancla que, ne zineeni laadu guidubi lu nisa que. ¹⁸ Nabee guxubiyu bi yooxho que laadu, ngue runi xti dxi que ca marineru que bizuluca guluubica ca ni zinedu que de rua barcu que. ¹⁹ Lu guiona dxi que ca marineru que guluubica de ruaa barcu que guira doo xti barcu que ne nápecabe. ²⁰ Ora gubidxa ne belegui que, que nuzaani ca' luguiadu xtale dxi, ne nisaguie ro' que cadxelasaa luguiadu, guira ladu gulezadu niladu la ma biaana si. ²¹ Ora laacabe ma biaanacabe sin guendaro, Pablo bizuhuaa lade ca marineru que ne guni': "Hombre ca, gupa tu xide nucaadiaga tu naa, ne que nireedinu de Creta, ne zaque ma que nididinu guendananna ne guendaruniti di'. ²² Yana la canaba laatu cadi guidxibiditu, purti que ziuudi nin ti gueetu lade tu, sinu que barcu si ca nga guiniti. ²³ Purti nuchi la ti angel xti Diuxi xtine', ni laca rusisaca, angel xtibe que bizuhuaa cue', ²⁴ ne guni': "Cadi guidxi'bu Pablo. Lii napu xide guidxiñalu nezalu César, ne biiya', lu guenda nacha'hui Diuxi, bidiibe lii guira xixe ca ni zine lii lu nisa ca. ²⁵ Ngue runi, hombre ca, casi guidxibitu, purti naa rune cree Diuxi, ngape nga ni gaca casi ca guidxi be naa. ²⁶ Peru laanu naquiiñe guidxelasaanu lu xixa guidxi lu nisa. ²⁷ Ora bedanda chii ne tapa gueela que, laga zineecabe laadu zacarii lu nisa do' Adriático, gaxa de galaa gueela ca marineru zacaxaca ma zidxiña ca xixa guidxi. ²⁸ Laacabe guluubia'cabe nisa que ne biiyacabe gande ne chii nuu gadxe de guete ni, gupa ratu si ma guluubia'cabe xti viaje ne biiyacabe gande nuu gadxe de guete ni. ²⁹ Laacabe cadxibicabe gueda idxela saadu ca guie que, ngue runi gunde'te cabe tapa ancla, de lu ra riluxe barcu que ne guniinecabe Diuxi ti niragueela nagueenda. ³⁰ Ca marineru que cuyubica cabe ximodo gusaanacabe barcu que ne maca gundetecabe balaaga que lu nisado' que, ne cuyubicabe ximodo cuubicabe ca ancla que ruaa barcu que. ³¹ Peru Pablo gudxi xaique ti gayuaa dxu que ne ca dxu que: "Naquiiñe pe guiaana ca hombre di ndaani barcu ca, pacoo que zalatu." ³² Ti ora que ru bichuugu ca dxu que ca doo liibi balaaga que ne bidiicabe lugar zeeni. ³³ Ora ma zedadxiña guendaya'ni xti dxi, Pablo guziñe laacabe ti guicaacabe xixa ni goo cabe. Laabe guniibe: "Ndi nga chii ne tapa dxi ni cabezatu ne cadi cayootu; latuu gaxti caru nica gootu. ³⁴ Nga runi inaba laatu guicaatu xiixa ni gootu, purti para guibaanitu ndi. Purti nin tobi de laatu que zunititu nin ti guicha de ndani ique tu." ³⁵ Ra ma guni'be ndi, cuguaabe pan que ne bidiibe xquixe Diuxi nezalu guira xizeecabe. Ti ora que gundaabe pan que ne bizulube gudobe. ³⁶ Ora que, guiraacabe biechecabe ne laca gucuaacabe ni goocabe. ³⁷ Laadu chupa gayuaa chona late gande chii ne xhopa binni nuu ndani barcu que laadu. ³⁸ Ora laacabe ma gudocabe bia' naquiiñe, laacabe bisisicabe barcu que ne guluubicabe lu nisa do' que trigu que. ³⁹ Guca si ridxi', laacabe cadi cayunibia' cabe lu yú, peru biiyacabe yuxii guria nisa do' napa ti playa. Ne biuicabe diidxa pa zanda chine cabe barcu que ra que. ⁴⁰ Zaque bichuugucabe ca ancla que ne bisaana cabe laaca ndaani nisado' que. Ora queca bixadxecabe ca doo xti ca timon que, ne gundisacabe vela nuu rua barcu que lu bi. ⁴¹ Peru laacabe yendaacabe ti lugar ra ridxagalu chuupa ra cuxooñe nisa, ne barcu que gulezadxini ra que. Ruaa barcu que gu'gani raque ne que niniibi di ni, peru xaana ni que bizulu gulaa purti nadipa ca ola que. ⁴² ni naguixhe ca dxu que la, ñuutica ca ni deguyoo que, ti zaca nin tobi de laaca nixuuba ca' ne nuxoñelu ca'. ⁴³ Peru xaique ti gayuaa dxu que nuu gula Pablo, para bicueeza ni nagixe gaca que, ne bicaabe ca ni nanna xuuba que chu'bi ca' de ruaa barcu que ne chindaca' prime lu yu. ⁴⁴ Ti ra que ca xcaadxi hombre que naquiñe ninanda laacabe, cadxi que lu tabla ro' ne xcadxi cosa nuu ndaani barcu que. Zacari nga bizaaca ximodo guiradu yendadu lu yu.