¹ Cadxi nguiiu bieteca de Judea ne yendaca' Antioquia ne bisiidica ca biichica, naa ca': "Pa que nirúgu ti nda guidiladitu casi guni' Moises, laatu que sanda guilaatú." ² Ndi biini de que Pablo ne Bernabé gupaca' pleitu ne laacabe,ne bichaga diixda ne laacabe xadxi. Ne zaqué Pablo ne Bernabé ne xcadxi de laacabe bibiicabe para checabe Jerusalén ti guidaacugabe ne ca Apóstol ne ca hermanu gola ti ma ginii didxacabe de ndi'. ³ Ngue runi laacabe, biseendasi yu'du' laacabe, gudidicabe luu guiropa guidxi, Fenicia ne Samaria, ne siniicabe de ca ni que naca judíu ni ma cayuni cre. Laacabe bedanecabe stale guenda nayeche ra nuu guira ca bichicabe. ⁴ Ora laacabe yendacabe Jerusalén, bieche ne yu'du' laacabe, ne bichaagalu ca Apostol, ne ca hermanu gola laacabe, ne gudxi cabe laaca deguira ni ma biini Diuxi ne laacabe. ⁵ Peru cadxi hombre ni ma bini cre, ni nacaca de ca Fariseu biasaca ne guinii ca: "Naquiñe guiru'gucabe ne gabinu laacabe gapacabe ca didxa ni udíxe Moisés." ⁶ Oraque ca apostol ne ca hermanu gola bidaaguca para guiniica de ndi'. ⁷ Udidisi gunicabe stale, Pedru biasa ne gudxi laacabe: "Biche ca', laatu nanna tu' de jma ante Diuxi gulidxi naa de ladetu, ti sacaa de ruaá ca ni cadi Judiu gunadiagaca xtidxa Evangeliu, ne guni cre ca'. ⁸ Diuxi ni runi biaa ladxidoo binni, ma bisiuinii ca ni cadi judiu, ne cudiibe laaca Epiritu Santu, sacá casi laabe ma bininebe laanú; ⁹ ne laabe que ninaabe ñunibe pa adxe laacabe para laanu, ra bisiabe ladxidooca pur enda runi cre. ¹⁰ Yanna, ¿xiñee laatú cuquindetu Diuxi, ra cuguátu xayani ca discípulo chinandaca casi ca lu gui'chi', nin ca bixozenu nin laanú que ñanda ñuni huantarnu? ¹¹ Peru laanu runi crenú deque salaanú pur enda nachahui sti Señor Jesucristu, sacá casi ca guca ne laacabe." ¹² De ira xixe binni que biganica ne bicadiagaca Bernabé ne Pablo de ora laaca caniica de ca señal ne milagru ni Diuxi ma bi'ni' lade ca ni cadi judiu pur guiropacabe. ¹³ Biluxe guniisicabe, Jacobo (Santiago) bicabí ne guni': " Hermanu ca', laguca diaga naa. ¹⁴ Simón ma gunii xi modo Diuxi gucané primé ca ni cadi judíu para icaabe de laaca ti guidxi ni icaa labé. ¹⁵ Ca didxa xti ca profeta tobisi cani ne ndí, casi ca lu gui'chi': ¹⁶ 'TIDISI CA NDI NAA SABIQUETA', NE SUSAYA' STI TIRU XTIENDA DAVID, NI MA BIABA; SANDISANII NE SUNECHAHUE RA MA BIXAA XTI TIRU, ¹⁷ TI SACÁ CA NI BIAANA DE NGUIU GANDA GUYUBICA' SEÑOR, SAQUECA CA NI CADI JUDÍU CACÁ CA RIDXI PUR LA'YA'. ¹⁸ Ndi nga ni na Diuxi, ni ma bi'ni iraa ndi ni ma xadxi gudxibeni laanu." ¹⁹ Nga runi, ni naa rabe laa, laanu que naquiñe cúnu ni guirenda ñee ca ni cabigueta ra nuu Diuxi de lade ca ni cadi Judíu. ²⁰ Peru suca'nú que laacabe caquiiñe guixalecabe de acabiidicabe de ca bidoo, ne guenda riní ique chu' ne ni cadi xeela, de goocabe beela xti mani ni bixii yani, ne ríni. ²¹ Purti Moisés napa tu laa guii de laa ndani cada guidxi dede ma xadxi', ne riunda ca didxa ni ca lu guichi xti ca Judíu ndaani ca sinagoga ira dxi enda risi' ladxi'. ²² Ne saque ndi biuladxi ca apóstol ne ca hermanu gola, ne interu yu'du', cuí cabe Judas ni laa' Barsabás ne Silas, ni nacaca xaique yu'du', ne guseendacabe laaca Antioquía ne pablo ne Bernabé. ²³ Laacabe bicaacabe ndi: "De ca apóstol ne ca hermanu gola, ca bi'chitu, ra nuu ca bichidu ni cadi naca judíu ni nuu ca Antioquía, Siria ne Cilicia: ¡Pa diuxi! ²⁴ Ma binadiagadu deque cadxi nguiu biree ca de ladenú, ni laadu que nusendadu laaca gunica xixá,ne ma bichendaca laatu ne ni cusiidica ne ma cuchi'ña xquenda tu. ²⁵ como nacani saca la, guiradu ma bitacu didxadu cuidu cadxi nguiu ne gusendadu ranuutu ne sinecabe ca ni nadxiinu Bernabé ne Pablu, ²⁶ nguiu ni ma bini arriesgar xpida ca pur lá Señor Jesucristu. ²⁷ Nga runi laadu cuseendadu Judas ne Silas,ni lapeca saniineca laatu laca de ni laadu ma bicaadu casi ca gunii ca'. ²⁸ Purti sacaa biuladxi Epiritu Santu ne sacaca laadu, que uguadu laatu jma que bia' naquiiñe' gunitu: ²⁹ que laatu guixaletu de ca ni ra'ta lu bidoo, rini, ni bixii yani, ne guenda riní ique chuu ne ni cadi xeela tu. Pa gapatu laatu de ca ndi laa, galan saca para laatu. Ti ma iduuyanú." ³⁰ Ora que laacabe, biluxe bisaacacabe para chee cabe, biete cabe Antioquía; udiidi si bitagulisaa cabe xtale binni, bidii cabe gui'chi' que. ³¹ Ora biinda cabe nii, laacabe bieche cabe pur enda riete nalaadxi di'. ³² Judas ne Silas, saqueca ca profeta, bidii cabe gana ca hermanu ne xtale diidxa ne bidxaa cabe xtipa. ³³ Udidi si biaana cabe raque xadxí, ca hermanu que biseenda dxii ca laacabe guibigueta cabe ra nuu ca ni biseenda ca laacabe. ³⁴ Peru guca galan para Silas guiaana raqué. ³⁵ Peru Pablo ne Bernabé biaana ca Antioquía laa ne xcadxi jma, ra bisi'di cabe ne guni' cabe xtiidxa Señor. ³⁶ Udidi si cadxi dxí, Pablu gúdxibe Bernabé: " ibiguetanu yanna ne chigana nu ca bichinu ndaani ca guidxi ra laanu ma guninu de xtiidxa Señor, ne idu'yanu xi modo nuu ca. ³⁷ Bernabé, laca ucalaadxi niné Juan ni laa Marcos. ³⁸ Peru Pablu guní ique deque cadi biaasi chinebe Marcos,purti bisaanabe laaca Panfilia ne ma que niza ne rube laaca lu dxi'ña di'. ³⁹ Ngue runi biása ti enda que ridagulisaa, ne saqué bixale cabe tobi de xtobi, ne Bernabé gucuabe Marcos ne laabe,ne udxiiba cabe barcu ne see cabe Chipre. ⁴⁰ Peru Pablu guliibe Silas ne see cabe, gudidi si gudixe ca hermanu que la'a lu guenda nachahui xti Señor. ⁴¹ Ora que guyé be Siria ne Silicia, cana gudiibe xtipa ca yu'du'.