¹ Ne laca yendaa Pablo ra guidxi Derbe ne Listra, ne la guuya', raque nuu ti discipulu laa Timoteo, xiiñi ti gunaa Judía runi cree, ne bixozebe la? Griegu laa. ² Ca hermanu nuu guidxi Listra ne Iconio la, ruchacabe enda naroo' xtibe. ³ Pablo nabe nuu chinne laabe, ngue runi; para gucuaabe laa ne bichuugube ti ndaa de laa, runi ca judiu nuu ladu que, purti nannacabe de que griegu bixozebe. ⁴ Laga zidiidicabe ndaani ca guidxi que, rabicabe ne rusienecabe ndaani ca yuudu' que xiinga naquiiñe gunna ca', ca diidxa bicaa ca apostol ne ca binnigola nuu Jerusalen. ⁵ Ngue runi ca yuudu' que gucuaaca xtipa lu enda runi cree, ne jma zidaleca guiradu dxi. ⁶ Pablu ne ca ni nanda laabe que guyee cabe neza ca guidxi Frigia ne Galicia, purti Espiritu Santu maca gudxi laacabe cadi güicabe xtiidxa diuxi ca guidxi huiini sti Asia. ⁷ Ora laacabe yendacabe gaxha de Misia, gucalaadxicabe ñecabe guidxi Bitinia, peru espiritu xti jesus que ninna di'. ⁸ Para ora zidiidicabe neza Misia, bietecabe guidxi sti Troas. ⁹ Pablu biiyabe xiixa casi ñaca ti bacaanda lu gueela; tobi hombre de Macedonia zuhuaa' raque, cucaa ridxi laabe ne naa: "Gudi'di Macedonia ne gucanee laadu". ¹⁰ Ora Pablu viiya bacaanda que, oraqueca bitopadu ca xtidu para chuudu Macedonia, bienedu de que Diuxi cani'ne laadu para chi guisiididu xtiidxa Diuxi laacabe. ¹¹ Ora cuchadu ca xtiidu para guiaaxadu de Troas, guyuucadu guidxi Samotracia, ne xti dxi que yendadu Neápolis. ¹² Raque ma guyuudu Filipos, nacanni ti guidxi xti Macedonia, guidxi ma risaca lade ca guidxi que, ne nacanni ti ndaa guidxi xtii ca Romanu , ne biaanadu ndaani guidxi que xtale dxi. ¹³ Dxi guendariziilaadxi bireedu ra puerta neza ra guiigu', purti gunii ique du nuu ti ra ñanda ninninedu diuxi. Guridu ne guyuinedu diidxa ca gunaa gucuaa lisaa gucaca' tobi si beedaca ra nuudu. ¹⁴ Guyuu ti gunaa laa Lidia, ni rutoo lari moradu guidxi Tiatira, ni rusisaca Diuxi, cucaadiaga laadu. Señor bixhale ladxidoobe para guienebe ca diidxa rini' Pablu que. ¹⁵ Ora laabe ne ca binni lidxibe biuunisacabe la, laabe rabibe laadu: "pa laatu ma biiyatu que ruchee nia dia' Diuxi, lataa ralidxe, ne laguiaana rarii." Ne bicuudxibe laadu. ¹⁶ Bizaaca, laga ziuudi ra runi orar du que, ti badudxaapa nuu binidxaba laabe nga runi ribeebe xi cayaca binni, bidxaga lu laadu. Laabe nabee ruguube bidxichi ra nuu xpixuaanabe, ne enda ribeebe xi cayaca binni que. ¹⁷ Gunaa di yenanda be laadu ne Pablu ne rucaabe ridxi: "ca hombre di nacacabe ni runi xiiña Diuxi ni nandxo', laacabe cusiidicabe ti neza guilaa binni." ¹⁸ Badudxaapa que bi'nibe ndi xtale dxi. Peru Pablu, nabee cadxiidxi ne laabe, Pablu bie'que bidxiilu laabe ne gudxi binidxaba que: "naa cayabe lii lu la Jesucristu biree de laabe". Ne oraqueca biree binidxaba que de badudxaapa que. ¹⁹ Ora ca xpixuaana badudxaapa que viiya ca ma que zanndadi guchiñabe bidxichi ra nuu ca, ne gucuaacabe Pablu ne Silas, ne guxubiyucabe laaca de ra yendaacabe ra luguiaa nezalu ca xaique guidxi. ²⁰ Ora laacabe yenecabe laaca nezalu ca xaique que, guniica':"ca hombre di Judiu laacabe ne cayuni yaayacabe xquidxi du. ²¹ Lacabe cusiidicabe ni cadi bia'nu ne que zanna di' ca Romanu gunica'" ²² Para ora que ca binni que gucuaa saaca' ne biasaca luguiaa Pablo ne Silas; ca xaique que guchezaca xabacabe ne biseendaca' guidiñenecabe ne palu. ²³ Ne ra ma gudiiñecabe Pablu ne Silas xtale, guluucabe laaca ndaani lidxiguiiba ne biseenda tidxi cabe ni rapa que, gapa chaaui laacabe. ²⁴ Ne ra ma gudxicabe ni rapa que xi guni la, guluubi laacabe ndaani lidxiguiiba que ne guluu cepu ñeecabe. ²⁵ Zedadxiña galaa gueela Pablo ne Silas, caniinecabe Diuxi ne cayuundacabe diidxa riuunda', ne xcaadxi ca ni daguyoo que cayunadiagaca' laacabe. ²⁶ Maalasi guca ti xu ro' ne guidubi dede ra zuba lidxi guiiba que binnibi dxacha; oraqueca bixale guiraa ca puerta que, ne ca guiiba nuu ñeecabe que bixale ca. ²⁷ Ni rapa lidxiguiiba que bibani de lu bacaanda que ne viiya zuxale ca puerta xti lidxiguiiba, biruuxabe xquiibabe ne bia' que ñuutisibe laabe, purti zaca xabe bixoñelu ca ni daguyoo ndaani lidxiguiiba que. ²⁸ Nagueenea ca Pablu bicaa ti rudxi ne na:"cadi guninaa diou' lii, purti guiradu nuudu rari' ". ²⁹ Ni rapa lidxiguiiba que cacaabe ridxi guedanecabe biaani', ne oraqueca guyuu, ne cayacadi ti izaa cadxibi, biaba xañee Pablo ne Silas, ³⁰ ne guleebe laaca ne rabibe laaca: "Biche ca', xi gune para guilaaya pue? ³¹ Laacabe rabicabe laa: "bini cree Señor jesucristu, ne zalalu lii ne guiraa binniliidxu'. " ³² Laacabe guyui'necabe laa xtiidxa Diuxi, ne guira' ca binni lidxi. ³³ Ora que, ni rapa lidxiguiiba que gucuaa laacabe gueela que ca, ne gudiibibe guira' ra gucannacabe, ne laabe ne guira' ca binni lidxibe que guyuu nisacabe oraqueca. ³⁴ Ne de raque laga zinebe Pablo ne Silas luguia ra lidxi be que, ne bidiibe ni goo xhica', laabe biechebe xtale ne ca binni lidxi be que, ti laabe ma runi creebe Diuxi. ³⁵ Yanna casi biraa gueela', ca xaique guidxi que bisenda tidxi cabe ca ni rapa lidxiguiiba que ne rabicabe laaca: "La gudii che ca hombre ca'." ³⁶ Ni rapa lidxiguiiba que yetidxi ca diidxa di Pablu ne na: "Ca xaique guidxi bisenda tidxi ca gudiee lugar cheetu: yanna la, la guiree, ne la che gatadxi ladxido'to. ³⁷ Peru Pablu rabi laacabe: "Gudiñecabe laadu nezalu guira' biniguidxi sin ñuuyacabe pa nu ra bicheedu, neca nacadu binni romanu ne bilaacabe laadu ndaani lidxiguiiba. ¿Yanna naacabe gundaacabe laadu naga'chi la? ¡co' xa! gueedacabe laapecabe guedandeecabe laadu." ³⁸ Ca ni rapa lidxiguiiba que guidxica' ca diidxa di ca xaique guidxi que; ne ca xaique gidxi que bidxibi ca' ora binadiaga ca' Pablo ne Silas binni Romanu laaca. ³⁹ Ca xaique guidxi que guyeeca' ra nuucabe ne gunabaca laacabe cadi gudxiibacabe donda ique ca ne guleeca laacabe, ne gunabaca'' laacabe checabe de guidxi que. ⁴⁰ Raque ru', Pablo ne Silas bireeca de ndaani lidxiguiiba que ne guyeca ra lidxi Lidia. Ne ra viiya' Pablo ne Silas ca hermanu que, uluucabe ganna laaca ne ora que bireecabe de guidxi que.