¹ Josué bajayakunia noukota pieja jiwi yajawa Sitim wekua pitsapa. Jordán jawabelia poná, bajara ponu Israel tomarayajawa, bara jota nubena otjopa pe majitsinejja penikabi wujunae. ² Akueyabi matakabi kuijinae, pieja bitsouwi taeruta boojji; ³ najume rajuta piejiwi: "Itsa pataneme PETUJJANENU pieja kojoni panieja Dioso, levita pieja sacerdote. Wi pekaponaejawa papü-najetarubenaename. ⁴ Patajayotsiename kajoni wekua noventa (90) yapü sajineaya. Pa-pükajjinaejitsipame, jjanewaitsia pane tae nejja, tsipaji namuto apo payapütaemu." ⁵ Josué piejiwi jumeitsi: "Merewia panajjanewaitsiename, PETTUJJANENU pejjania kuene paka tsi tajübijitsia." ⁶ Josué jumeitsi sacerdotewi: "Kojoni pa waitabare, jiwi pa jjeintaponeima". Bajara pamonae pe notarukupa kuijinae jjeintaponaya jiwi pe kanamatajjeinanejja. ⁷ PETUJJANENU jeitsi Josué jawabelia: "Mapa matakabi kaitabutsienatsi pebi jjaneto mutsane Israel kataina. Yapütaena, pakuenia Moisés apo kopatsino, jjamu apo kakopatsitsanetsi. ⁸ Itorobiename sacerdotewi kojoni liweisi pe kaponaewi: "Itsa Jordán menejawata papatame pemujjuburuta Jordán meneta panubenaename kaekowuta. ⁹ Nejjata jumeitsi Josué Israelitawi: "Berena panubenare, PETTUJJANENU pieja liweisi panejumetaenejja panijea Dioso. ¹⁰ Ma jjua kuijinae payaputaename pe asou jumali pejjeinainu Dioso pajjamuta paka yajawa ponpina paka wekua torotsiena cananeowi, hititawi, heveowi, ferezeowi, gergeseowi, amorreowi, jebuseowi. ¹¹ ¡Taema! Petujjanenu pieja kojoni liweisi ira jjeinaenu nikabielia Jordán werena paneitabu nejawa. ¹² Akonojjae paita-petsiename doce (12) pebijiwi Israel wiria. ¹³ Itsa sacerdotewi Pettujjanenu ira jjeinanu pieja kojoni liweisi pekaponponaewi, petajju japato Jordán mene jayeta, Jordán mene nukatabiena, pemene-soujawatsika kae kowuta rukaena nejjata nukatabiena petsewinejja nejjata pemene runae-rareka bajara pakuenia nukatabiena. ¹⁴ Nejjata, jiwi nikabiena Jordán mene, sacerdotewi kojoni liweisi kajinonopaewi kopieya namata jjeinanaena. ¹⁵ Nejjata pekajinonopae kuijinae kajoni Jordán jawalia nubena otjopa, natajju japa sukueta mera mujjuburuta (akonojja Jordán mene nawota pe ubi matakabi), ¹⁶ pematatu wetsika pe najetarukaera nukatabayabe pejumatsutoysatabi. Tájü wetsika mera apo runae, Adán tajjujjuoba, pena mujjunene ekae tomara Saretán, Neguév mene jawareka, Salado mene. Jiwi nikaba itsapanabelia Jericó werena. ¹⁷ Sacerdotewi kajoni pekajinonopaewi PETUJJANENU pieja liweisi, petsewi irata nubenajopa Jordán iraka tüotüojuta penikabinejjalia dajjita Israelitawi.