¹ Nejjata Josué, Nun pejjunato, matayatsiakuene Sitim pijiwibeje itoroba pe yorobinejja. Jumeitsitsibeje: "Paponarebeje, ira pa tema. Jjanewaitsia kueneta Jericó." Pitsapabeje, pebijitsipaewata Rahab pieja boota patabeje, barajota nukajopabeje. ² Jericó tujjanenu tsipaebatsi: "Taema, Israel tomara pijiwibejewaja ira taeponarenabeje". ³ Nejjata Jericó tujjanenuxo njume rulia Rahab: "Kapitsapare pebibeje pekatae najetarukaejiwi, nieja boota kato junuabeje taenajetarukabeje waja ira". ⁴ Pieja kuojjae barapowa matayatajjuobabeje. Bajara Powa Jumeitsi: "Jaja, netae-najetarukabeje, panakua werena pe najetarukaejawa apo yaputaenu. ⁵ Bajara pajiwibeje merewiyota nawietababeje, tomara boupa pena akatsi wujunaeyota. Apo yaputaenu, belía peponaejawa. Jjamu püjeire, najjatsieyo, nenamatajjunaenejjabeje." ⁶ Bajarapowa boo matatuyabetsia katsiabeje barajotatsia matayatetabeje pe ubi tsitsibo lino kúnu werena boo matatutatsia. ⁷ Nejjata pepübarajinaejiwitsibeye Jordán namutua jawabelia pona. ⁸ Pe itorobijiwitsibeje apo mjitsi, itsa taetabaya. ⁹ Bajara powa jumeitsi: "Jjanu yaputanejü PETUJJANENU papekarajutsijawa pa ira nejjata paka kujunawatsi. Jota patajinonopaewi pa irata panajjeinayabiename yajawa panenajjeinayabiename. ¹⁰ Pajumetanejü, pakuenia PETUJJANENU Cañas mene (petsobia mene) tsewiepa pane ponae nejjalia Egipto wekua. Yajawa pajumetanejü pakuenia paitsimu amorreos tujjanenubeje itsa mujjuburu werena Jordán mene, Sehón wununu yajawa Og, pajjamu pabeyajjuobame. ¹¹ Pajjanu patajumetae kuijinae panieja liweisi, pajamatabu deideijanu pa yaita tsakakuene paneto ajibi, tsipaji PETUJJANENU panieja Dioso, bajara PONU Dioso atjubuyo itabojjotatsia yajawa ira tatsika. ¹² Nejjata, panejumetaima, kae liweisi kuenia PETUJJANENU Pewunuta, tajamatabu jjanepaneajjae pajjamubeje pajamatabu jjanepanaenamebeje tajja pieja boota. Neto itaropire pakuenia ¹³ patane ewetsinejja pata asoüjawa: tajja, taena, tajuyapijiwi, tajuyapijiwajji yajawa tajamonae, pajjamu apo patane beyejebimunejja". ¹⁴ Bajara pajiwibeje jumeitsi: " ¡Kae liweisikuenia pata asoü epatota! Itsa, kamoyamutsane pataya liweisi, nejjata; PETUJJANENU pa ira itsa pa nerajuta, paka itajjuto tsonia taenatsi yajawa pakajumekowuntsienatsi." ¹⁵ Nejjata bajara powa Penaita kapitsiatsi jawalia pemoüto rutsika pe runaenejjabeje. Tsipaji bajara powa boo tabu jumanania tomarata ponupona. ¹⁶ Powa jumeitsi: "Paponarebeje unu tiribo tsutua jawabelia panamatayabarebeje papekapübarajinaew jjunaijitsipa. Akueyabi kobesito kuenia panamatayabienamebeje, penawiebi matakabita papitsapaenamebeje. Bajara pakuijinae panija namuto pakeitsinamebeje." ¹⁷ Bajara pajiwibeje jumeitsi: "Apo panajume liweisi kowuntsinutsanebeje jjamu jawabelia, itsa jjamu apo pane jume kowuntsimutsane pataka itorobijawa, ¹⁸ Itsa pa irata pa jonenajü, jjamu kütsiename petsobia panayo nenaíta kapitsapea jawalia patarunae jawatsika pata taenejja nejjata, kaituotsiename nijea boota ajja, ena, nejuyapijiwi dajjita nieja monae dajjita ajja pieja boo pijiwi. ¹⁹ Pajiwiyo baja itsa pitsaparena nieja boupa welia nukaena namutota, tüpaena pieja nekonitsane pajjanu apo pataja nekonitsane. Itsa baja pakobe paka jayeta nieja boota, patüpaenajü tsipaji apo panaa jume liweisi kowuntsinu jjamu jawalia. ²⁰ Itsa pa jjamu patsipaebiename jiwi pajjanu apo pana jume kowuntsinutsane jjamu jawabelia." ²¹ Rahab jumeitsi: "Najume liweisi kowuntsienatsi kaekuenia."Jjanewaitsia kuene nawietsi ejjanabeje. Nejjata bajara powa petsobia panayo kütajjuoba penaita kapitsapae jawalia. ²² Unu tiribo kuijitabeje petsuto jawatsia akueyabi matakabi eweta pepubaraijinaewitsi penawiebijawa. Pepubarajinaewitsi jeitatsi dajjita namutojawajjiya apo namatajjunaetsibehe. ²³ Pebibeje petsuto wetsika runeika Josueta penawietsinejjabeje, Nun pejjunato, tsipaeba dajjita liweisi. ²⁴ Josué tsipaebabeje: "Jjanewaitsia kueneta PETUJJANENU naka rajuta paira. Dajjita pa ira pijiwi naka kujunawa."