¹ Putum xanapuxkun tiku xlamakgolh lakatsu kjordán, nak xakasipijni chu niku xakaxtum, lakatsu xpaxtun pupuno Mediterráneo, lakatsu nak Líbano, Hititas, Amorreos, Cananeos, Ferezeos, Heveos chu Jebuseos, ² Tamakxtumikgolh nak akgtum limapakgsin xpalakata natalalhawakgoy Josué chu Israel. ³ Lata xlatamanin xalak Gabaón kgaxmatkgolh tuku Josué kalhawanilh xalak Jericó chu xalak Hai, ⁴ xlakán lhawakgolh tuku liskgalala. La limakatsinanin litaxtukgolh. Xlakán tiyakgolh xalakgwan lhakgat chu xalakgwan tamakgnu chu likgalhapakgolh axnu. Nachuna talilh xalakgwan xputujun ixchuchut uva, xlaklamakgolha, chu haya xkalaktsapakanit. ⁵ tatunukgolh xalakgwan chu xatalaktsapan ixtatunukan, chu lilhakganankgolh xalakgwan ixlhakgatkan. Putum xkaxtilanchukan chu xtawaykan haya kskaknit chu hay xmasma. ⁶ Xlakán ankgolh niku makxtum xkawalinit Josué nak Gilgal chu wanikgolh Josué chu xalakchixkuin xalak Israel: "Kinin lumakgat kmininchaw, chuna cho kinkatalhawa akgtum talajkaxlan.'' ⁷ Lakchixkuin xalak Israel kawanikgolh Hititas: ''xamakgtum wixin lakatsu kinkatawilatit. ¿Nikunlha chu naj'katalajkaxlhawayan akgtun talajkaxlan? ⁸ Xlakán wanikgolh Josué: ''kinin mintasakuakan.'' Josué kgakgalhskilh: ''¿Tiku wixin? ¿Xalak niku wixin? ⁹ Xlakan wanikgolh: ''Miskujnikan lumakgat minkgonincha, xpalakata xtukuwini min Puchina Dios. Jkgaxmatnitaw tamakatsin tuku xla lhawanit chu tuku skan lhawalh nak Egipto; ¹⁰ putum tuku kalhawanilh chatiy xapuxkun xalak amorreos nak xakilhtutu Jordán, wa Sehón xapuxku Hesbón, chu wa Og xapuxku Basán, nikuma xwi nak Astarot. ¹¹ Xalajkgolón chu putum latamanin xalak kinkachikinkan kinkawanikgon: 'kalipintit mintawaykan xpalakata mintalhawankan. Katatastojkgotit chu kakawanitit: ''kinin miskujnin kinkatalhawatit akgtum talajkaxlan'' ¹² Wa uma kinkaxtilanchukan, chichiku xwanit lata ktiyaw nak kinchijkan ama kilhtamaku lata ktaxtuchaw chu kmiw unu. Lachu ka'akxilti, hay skaklhi chu hay masma. ¹³ Wa umakgolh xputujun xchuchut uva xasasti xwankgonit lata jkamatsamachaw, chu kaukxti, haya taxtitkgonit. Kilhakgatkan chu kintatunukan hay laklamakgolh lata xlimakgan kmininchaw. ¹⁴ Wa israelitas tiyakgolh xtawayakan Gabaonitas, chu ni putsakgolh xtiji Puchina. ¹⁵ Josué katalhawalh takaksni chu akgtum talajkaxlan, xpalakata nalatamakgoy. xmapakgsinanin latamanin nachuna katalhawakgolh akgutm talajkaxlan. ¹⁶ Titaxtulh akgtutu kilhtamaku lata xtalajkaxlhawakgonit talajkaxlan, akxni katsikgolh pixlakan lakatsu xwi xpulatamatkan. ¹⁷ Chuna cho xpulataman Israel ankgolh nak xkachikinkan xliakgtutu kilhtamaku. Ixkachikinkan wa Gabaón , Cafira, Beerot chu Quiriat Jearim. ¹⁸ Wa israelitas nikalatachapakgolh ixpalakata xmapakgsinaninkan ixkatalajkaxlakgonit nak ixlakatin Puchina, wa ixDios Israel. Putum israelitas ixkakgsamakgolh xmapakgsinanin. ¹⁹ Chuna cho putum mapakgasinanin kawanikgolh latamanin: "Kinin jkamalaknuniw ixpalakata kin Puchinakan, wa ixDios Israel, lachu nila kalakslakgaw. ²⁰ Wa chu uma tuku nakatalhawayaw: ixpalakata ni nakinkalakgminan lanka tasitsi ixpalakata kintachiwinkan nikuma katalajkaxlaw, ka kamaxkiw talakaskin kalatamakgolh. ²¹ mapakgsinanin kawanikgolh ixtalaputamatkan: 'ka kamaxkiw talakaskin kalatamakgolh'. Chuna cho wa xalak gabaonitas litalakgapaskgolh lakgsakgnanin chu tiku ixkgatnikgoy ixchuchutkan ixliputum israelitas, chuna la xmapakgsinanin wankgolh nalatalilakgapaskgoy ²² Josué katasanilh chu kawanilh: ¿Wan cho kin kgakgskgawatit lata kin kawanitit: "akinin lulakgamakgat klamachaw, lata wixin unu lakatsu wi min pulatamatkan? ²³ Chuna ixpalakata wixin nilhan mintayatkan chu la tachin nakamaskujukanatit, amakgolh tiku sakgnankgoy chu ixkgatnankgoy nak ixchik ki Dios. ²⁴ Xlakan kgalhtinikgolh Josué: ixpalakata kawanika milakskujni piwa minPuchinakan Dios, limapakgsilh kskujni Moisés namaxkikgoy putum uma katiyatni, chu nakamalakgsputukgoy putum ixlatamanin unu katiyatni, chuna ixlakata lujkapekwanin. Wa uma ixpalakata chuna klhawaw. ²⁵ kaukxti, kinin kmimakan kwilaw. Latatuku wix lhan lakpuwana nakinkalhawaniya, kalháwa.'' ²⁶ Josué chuna lhawalh ixpalakatakan: kamapanunilh israelitas chu israelitas ni kamakgnikgolh. ²⁷ ama kilhtamaku Josué kalhawalh gabaonitas lakgsakgnanin chu xlakgxkgatnanin chuchut xla pulatamanin, chu xla ixpulakgachixkuin Puchina, chuna litaxtokgoyku la uku, anta niku Puchina laksaknit.