¹ Vano, Apwiya yaahomwiirela Moises: Onaahala woona en'halaaka omwiiriha Farao. Onaahala woona wiira yena naahala waahiya arwaaka mwaha wontatanaka noowerya. Mwaha wontatanaka nokuru, yena naahala owoomola nlaponiwawe. ² Nluku aahomwiirela Moises iiraka: MikiPwiya. ³ Kihonkhumenla Abraao, Isaque ni Jaco, phanka Nluku ooweryessa; massi mwaha wontjinanaka, Pwiya, akaatjuweliya naayenatja. ⁴ Nimi kihovaha waataanawaka, wowaavaha elapo yooCanaa, elapo ekhalalyaaya tjinene yeettakatjaka. ⁵ Ohiyavaa, kinawiiwaka mahuviho aatthu owiisrael, yaayo apotthiye naatthu owiigiipitu, ni kinawuupuwelaka waataanihawaka. ⁶ Phimaana, waahimeerye atthu owiisrael: MikiPwiya. Kinaahala wookumihani mwiipiphini mwaatthu owiihiipitu ni kinaahala wootaphulatjani. Kinaahala wookumihatjani nintatanaka nooweryessa ni tjoovara tjuulupale tjohukhumu. ⁷ Kinaahala wookussani phanka atthwaaka, ni kin'hala okhala Nlukweenhu. Ni nhu n'naahala otjuwela wiira mikiPwiya, Nlukweenhu, ookumihaleni mwiipiphini mwaatthu owiigiipitu. ⁸ Kinaahala wookussani koorweehakani elapo enkhuluvelihalyaaka Abraao, Isaque ni Jaco. Kinaahala woovahatjerani. MikiPwiya. ⁹ Moises waahimeeryatjalyaawe atthu owiisrael, ayenatja khayaamwiiwenlale mwaha wonpottha waakhalihiyaaya. ¹⁰ Vano Apwiya yaahomwiirela Moises: ¹¹ Orwee ni wamwiirele Farao, mwene owiigiipitu, wiira aahiye atthu owiisrael akhume nlaponiwawe. ¹² Moises aahowiirela Apwiya: Atthu owiisrael khankiiwenla, vano Farao naahala okiwenla, nimi kihitjuwelaka wuulumatja? ¹³ Massi Apwiya yaahomwiirela Moises ni Arao, aavahaka moolumo atthu owiisrael ni Farao, mwene owiigiipitu, wowiira aatthu owiisrael ahiye elapo yowiigiipitu. ¹⁴ Ala phaakhulupale yaakhala vatthokoni wan'nathumwanawe: Assaana aRuben, owantjeriya wiisrael, Hanoque, Palu, Hezrom ni Carmi. Yaari amutji aRuben. ¹⁵ Assaana aSimeao Jemuel, Jamim, Oade, Jaquim, Zoar ni Saul mwaana anthiyana ooCanaa. Ala yaari amutji aSimeao. ¹⁶ Ala matjina aassaana aLevi, Gerson, Coate ni Merari. Levi aakhalale eyaakha emiya wotalaathiini nasaapa. ¹⁷ Assaana aGerson yaari Libni ni Simei. ¹⁸ Assaana aCoate yaari Anrao, Isar, Hebrom ni Uziel. Coate aahokhala eyaakha emiya wotalaathiini natthaaru. ¹⁹ Assaana aMerari yaari Mali ni Musi. Alayaari amutji aLevi. ²⁰ Anrao aahonthela Joquebede, mwanrokoraya athumwaane. Naayena yaahon'yara Arao ni Moises. Anrao aahokhala eyaakha emiya wotalaathiini nasaapa phaakhwaawe. ²¹ Assaana aIzar yaari Cora, Nofeque ni Zicri. ²² Assaana a Uziel yaari Misael, Elzafa ni Sitri. ²³ Arao aahonthela Eliseba, mwaana aAminadabe, mwanrokorawe Nasom. Ayena yaahon'yara Nadabe ni Abiu, Eleazar ni Itamar. ²⁴ Assaana aCora yaari Assir, Elcana ni Abiasafe. Alaphayaari amutji aCora. ²⁵ Eleazar, mwaana Arao, aahonthela mwaana n'motja n'motja aPutiel. Ayena yaahon'yara Fineias. Alaphayaari akhulupale an'nathumwanawe Levi. ²⁶ Arao ni Moises, phaalopwana Apwiya yaawiirenlyaaya Mwaakumihe atthu owiisrael elapo yowiigiiitu, womiphwinkotjaya tjaanakhotto. ²⁷ Arao ni Moises phaamwiirelale Farao, mwene owiigiipitu, wiira aahiye akhume atthu owiisrael elapo yowiigiipitu. ²⁸ Apwiya wamwiirelalyaaya Moises elapo yowiigiipitu, ²⁹ Ayena yaahiira: MikiPwiya. On'himeerye Farao, mwene owiigiipitu, tjitthu tjooteene tjin'halaaka woohimeerya. ³⁰ Massi Moises aahowiirela Apwiya: Akinkhwititi wuulumatja, vano, Farao n'hala okiiwa tjani?