¹ Apwiya yaahomwiirela Moises: Kin'hala wookhaliha phanka Nluku ohoolo waFarao. Arao, mwaamun'na n'hala okhala nrumeyaa. ² On'hala wuulumatja yeele en'halaaka owiirela. Arao, mwaamun'naa, naahala omwiirela Farao wiira aahiye atthu owiisrael akhume nlaponiwawe. ³ Kinaahala olipiha nrima wa Farao, ni kinaahala opanka mithoonhero tjintji nooweryawaka nimiiriirya tjintji elapo yowiigipitu. ⁴ Massi Farao khan'hala owiiwa. Kinaahala weessenra ntatanaka wiigiipitu ni kinaahala okumiha ekurutjaka, atthu owiisrael. Ni kinaahala waakumiha elapo yowiigiipitu mwaha watjoovaratjaya tjuulupaleru. ⁵ Atthu owiigiipitu anaahala otjuwela wiira kiPwiya, kataphulela ntatanaka wiigiipitu ni kaakumiha atthu owiisrael eriyaryaatja. ⁶ Moises ni Arao, yaahopanka tjitjon'mo panka Apwiya tjaahimeeryalyaaya. ⁷ Moises aarina eyaakha thamaaniini, ni Arao aariina eyaakha thamaaniini na tthaaru, waamuuluman'nyaaya Farao. ⁸ Apwiya yaahomwiirela Moises ni Arao: ⁹ Farao awiirelanivale: Opanke mwiiriirya n'motja, vano wamwiirele Arao: Okusse nkopwaa orihele ohoolo waFarao, wiira otathuwe enuaa. ¹⁰ Vano, Moises ni Arao yaahorwaatja waFarao ni yaahopankatja phanka tjaahimeeriyaaya naaPwiya. Arao aahorihela nkopwaawe ohoolo waFarao naanantekwaawe, ni yaahotathuwa enuaa. ¹¹ Vano, Farao aahowiihana atjuwelyaawe naananhanka. Naayenatja yaahopankatja weenhankatjaya. ¹² Khula ntthu waayenatja yaahorihela nkopwaaya vathi, ni tjaahotathuwa enuaa. Phimaana nkopo wa Arao waahomirya enuaatjaya. ¹³ Nrima waFarao waaholipa ni khawiiwenlale, phanka tjaahimyalyaaya Apwiya. ¹⁴ Apwiya yaahomwiirela Moises: Nrima waFarao ori woolipa ni yena nawaakhottiiha atthu okhuma. ¹⁵ Orwee waFarao owitjissu, akhala nmaatjini. Wakhale nkurukuru muro, ni wakusse nmatataniwaa nkopo waathatuwale enuaa. ¹⁶ Wan'himeerye: Pwiya, Nluku aaheperi, hokiruma wiira koohimeerye: Waahiye atthwaaka arwee, ni tjitjon'mo anaahala okikokhorela woothakoni. Npaka n'nava, khun'niwenla. ¹⁷ Apwiya yaahiira: Tjitjon'mo onaahala otjuwela wiira kiPwiya. Kinaahala otakhaliha maatji omuro Nilo ninkopo won'matataniwaka, ni emurweeyo en'hala okhala ephome. ¹⁸ Ehopa tjin'hala okhla nmuro tjinaahala okhwa, ni emurweeyo enaahala onukha. Atthu owiigiipitu khan'halatho ovurya maatji onmuro. ¹⁹ Ni Apwiya yaahomwiirela Moises: On'himeerye Arao: Okusse nkopo waatalele nmaatjini owiigiipitu, nmuro, mapuro ooteene arimaatji wowiira akhale ephome. Opanke tjitjon'mo, ni onaahala okhala ephome elapo yooteene yowiigiipitu. ²⁰ Moises ni Arao yaahopanka phanka Apwiya tjaahimyalyaaya. Arao aahotakhaliha maatji on'muro, ohoolo waFarao naanantekwaawe. Maatji ooteene on'muro yaahokhala ephome. ²¹ Ehopa tjaahokhwa ni maatji yaahantjera onukha. Atthu owiigiipitu khayaavuryatho maatji on'muro, ni ephome yaari nphantte woteene owiigiipitu. ²² Massi ananhanka owiigiipitu yaahopanka tjitjon'mo weenanhankaaya. Vano, nrima waFarao waaholipa ni yena khaatthunale wiiwenlatja Moises ni Arao, phanka Apwiya tjaahimyalyaaya wiira onaahala wiiranyaa. ²³ Farao aahorukunuwa aahorwaa owanuwawe. Yena khaakhalihale etthu. ²⁴ Atthu ooteene owiigiipitu yaahothipa wiira aphwanhe maatji oopheela ovurya, massi khaaphwanhale maatji oopheela ovurya. ²⁵ Ni yaahovira mahuku saapa Apwiya yatakhaliheru emuro.