¹ Waviralyaaya tjitthun'nha, Moises ni Arao yaahorwaatja waFarao ni yaahomwiirelatja: Apwiya, Nluku owiisrael yiirale: Waahiye atthwaka arwee. Tjitjon'mo anaahala okitthapenla assukuhuulu woothakoni. ² Farao aahiira: Pwiya tupani? Kontha essiyani wan'halaaka wiiwa ntjuunaa niwaahiya atthu owiisrael arwaaka? Akinontjuwela Pwiya. Ni akinon'hiya Israel arwaaka. ³ Ayena yaahiiratja: Nluku aaheperi npheela okumaana nihi. Onihiye nirwee nkhwaha homahuku mararu wiira natthapele ni waavaha okuttho Apwiya , Nlukweehu, wowiira nihikeliye naassinttuuttu mwaha wokatanaa. ⁴ Massi mwene owiigiipitu aahowiirelatja: Kontha essiyani waakumihaka atthu nmitekoniwaya? N'hokoleele wantekoni. ⁵ Yena tootho aahiira: Ahaavo aheperi entji nlaponiwihu, ni n'haatthawiihatja nmitekoniwaya. ⁶ Nihuku nen'no, Farao aahowiirela ahooleli omiteko tjaavara atthu. ⁷ Woovirikana nikhalayi, n'haavahatjetho nteko wowuupa etijolu. Mwaahiye yuupe tjawaya. ⁸ Massi nanlelo mwaakhanhenreke wiira apankeke tjintji phnka tjaapankaaya khalayi. Ohaatthunihe okhuma n'motja, kontha anawoolwaatja. Phimaana ayenatja anhuwelatjaaya yiiraka: N'nihiye nanvahe okuttho Nlukweehu. ⁹ Wintjenre nteko waatthwaayo, wowiira attharuwe moolumo owootha. ¹⁰ Vano, ahooleli aatthwaale ni mafunti ontekoole yaahorwaatja waatthuni. Ayenatja yaawiiratja: Farao niiratjo: Akinoovahathoni nteko. ¹¹ N'nohala orweelatja mwaassineene on'haleenhu ophwanha, massi ntekweenhu khunvukuwa. ¹² Vano atthwaale yaahovavaryaana elapo yowiigiipitu, ahephaka ehalahalo. ¹³ Mafunti omiteko, yaakhottiihaka, yaahiira: Mweemessere ntekweenhu, massi khaninoovahanitho. ¹⁴ Mafunti omiteko tja Farao, yaari nimahooleli aatthu owiisrael, yaayo yaari naananteko, yaahaakohatja: Essiyani ohipankaka etijolu tjinkhanhenriyeenhu, phanka ntjana niilelo, phanka tjaapankeenhu khalayi? ¹⁵ Vano, ahooleli aatthu owiisrael yaahorwaa npaka wa Farao ni yaahottokutta: Essiyani waavaraka anantekweenhu enan'neela? ¹⁶ N'hinivahetho anantekweenhu, ni nanlelo n'naaniirela: Npanke etijolu! Hi, anantekweenhu, ninaahuvihiya nen'nava, massi nlattu waatthweenhu. ¹⁷ Phimaana Farao aahiira n'nawoolwaatja! Woolwaatja! N'niiratja: N'nihiye naavahe okuttho Apwiya. ¹⁸ Vano, n'nava, mwaakulele wantekoni. Khaninoovahanitho etthu, massi npanke etijolu phanka tjaapankeenhu khalayi. ¹⁹ Ahooleli aatthu owiisrael yaahotjuwelela mwahaaya owakathi wiireliyaaya tjon'mo: Tjinpankeenhu etijolu khul nihuku khan'nohala ovukula. ²⁰ Ayenatja yaahonpheelatja Moises ni Arao, yeemelal nphantte nkhwaawe wonupa yaamwene, ottayi ni waaryaawe Farao. ²¹ Ayenatja yaahowiirelatja Moises ni Arao: Apwiya yoowehatjeni, kontha n'hopanka enan'na wowiira Farao aawehe anantekwaawe nimeetho ootakhala. N'hokussatja ekatana nmatataniwinhu wiira n'niive. ²² Moises aahorukunuwela waaPwiya ni aahiira: Pwiya, essiyani waawiiheraka mikatjamiho atthwaala? Yoopatjera, nkiwiihenreni nipuron'na? ²³ Kaweeru kuulumaka ni Farao mwantjinaninhu, yena nawaakatjamihatja atthwaala, ninhu khan'naataphulatja atthweenhu.