¹ Ni eteciidu yoopipila, yossafarau ni yosheerya ahopankatja ekuwo tjo teciidu wiira tjikhale tjikelaniyaka mapuro ossuali nipuro neettakattiifu. Ayena ahopanka ekuwo tja Arao tjo mapuro ettakattiifu, wo nayeeli Pwiya tjamwirenliaaya Moises. ² Bezalel hopanka ekuleti yo wooru ni yoteciidu yoopipila, yossafarau ni yosheerya. ³ Ayena yahonyatta ehalahalo tjo wooru ni yahothikila nihatja wo fio, wo wiira ettottiheriye wo eteciidu yoopipila, yossafarau ni yosheerya ni eliinyu yoovevyaala, nteko wa namahema otjuwelatja. ⁴ Ayena ahopanka tjo m'makhatani wo kuleti, tjothukenliya miphantti miili. ⁵ Ecintu aya, yo teciidu, yaari toko yo kuleti, ya pankiye ni ethu emotja, yopankiya ni elinyu yovevyaala yothaviya ni yaari yowottiheriya ewooru, yaari yoopipila, yossafarau ni yosheerya, toko Pwiya tja mwirenlyaaya Moises. ⁶ Yahothomyaatja maluku onix owoottiheriya ewooru ale, yahantikhatjiya matjina assaana oIsrael. ⁷ Bezalel ahohela m'makhatani wo kuleti, toko maluku omupuwela Pwiya assaana khuumi neeli oIsrael, toko Pwiya tjimwirenlyaawe Moises. ⁸ Yena hopanka watheremani, nteko wa namatjuwelatja ovara ethu, apankaka toko ekuleti. Yena hopanka yo wooru, yo teciidu yoopipila, yossafarawu ni yosheerya, ni yolinyu yoovevyaala. ⁹ Yaari yo malootho matjece. Ahokhuna emaara piili Yaari ecentimeetru ciriini na thaaru erekamelo ni ecentimeetru ciriini na thaaru eyaatapuwelo. ¹⁰ Ayena ahothomiaatja efiila tjece tjo maluku owaarya. Efiila yoopatjera eyo ahaavo rubi, topazio m'motja ni berilo m'motja. ¹¹ Efiila yo nayeeli nahavo esmeralda, safira m'motja ni ediyamante. ¹² Efiila yo neeraru nahavo jacinto, agata m'motja ni ametista m'motja. ¹³ Efiila yo neetjece nahaavo crisolito, onix m'motja ni jaspe m'motja. Maluku ayo yottiheratjiye ewooru. ¹⁴ Yaari maluku khuumi neeli kontha yaari matjina assaana oIsrael khuumi neeli. Kuta nluku nahantikhiya, toko nlutto, ntjina wa mwaana oIsrael. ¹⁵ Ayena ahopanka ekorenti tjooyevatja tjo wooru, tjoothaviya toko nkhoyi tjo wa theremani. ¹⁶ Ayena ahopanka erenda piili tjo wooru ni aneli eli owooru, ni ahaalutta aneli oyeeli miphantti tjo miili owatheremani. ¹⁷ Ayena ahohela ekorenti tjoothaviya tjo wooru makenkereni nkerekhere wo m'makhatani. ¹⁸ Ayena aholuttaaniha miphantti milin'yo wa ekorenti tjithaviyen'yo mapuro omiili. Aholutta tja m'makatani waya wa ohoolo wo kuleti. ¹⁹ Ahopankatja makenkere meeli owooru ahothukenlatja nkherekhere wo watheremani wattotheliyaaya n'hina, wattamenlaka wa ekuleti ya namukutho. ²⁰ Ayena ahopankatho makenkere meeli ni ahothukaniha miphantti tjo m'makhatani, ohoolo waya ekuleti, wattamenlaka mapuro nttothiyaaya, watjulu waya ecintu yovevyaala yo eteciidu yo kulete. ²¹ Ayena yohothuthukenla wa theremani waya wo makenkere niwaya wa m'makenkereni ni nkhoyi woopipila, wo manan'na wa kelaaya othukiya saneene watjulu waya wo ecintu yovevyaala yo eteciidu okuleti. Phaakiyaaya tjoo wo wiira ehitaphuwatje ekuleti, Yapankiye w nayeeli toko Pwiya tjamwirenlyaawe Moises. ²² Bezalel hopanka etuunika yo kulete yapankenle ni maliinya oteciidu yoopipila, nteko wa namattothatja. ²³ Ayena yahaana nipuro nattenliaaya wo wiira ovire muru. nkurukuru waya m'mo yahothavenliya wo manan'na tjahakelaaya otaphuwa tja. ²⁴ Mapuro yattothiyayam'mo, ayena yahopanka eroma yo eteciido yoopipila, yosafarau ni yoosheerya ni yo liinyu yoovevyaala. ²⁵ Ayena ahopanka esiinu tjo wooru, yahohela nroma wa nkurukuru yo tuunika, nenenke niiroma ²⁶ esiinu emotja ni eroma emotja, esiinu emotja eroma emotja, nkurukuru wo tuunika ya Arao. Pwiiya phamwirenlyaawe Moises. ²⁷ Ayena ahopanka ekatjako tjo liinyu tjoovevyaala ya Arao ni assanaawe. ²⁸ Ayena ahopanka eturbante yo liinyu yovevyaala, ni epaana yoovilikeliya yo liinyu yoovevyaala, efooru yo linyu yoovevyaala, ²⁹ ecintu yo liinyu yoovevyaala ni yoteciido yoopipila, yosafarau ni yosheerya, nteko wa namattothatja. Pwiya phamwirenlyaawe Moises. ³⁰ Ayena ahopanka ekorowa yo wooru; ayena ahoottihatjera vaava, toko ethu yokolariya: YOVAHEN'YA PWIYA. ³¹ Ayena ahothuka watjulu waya vaa nkhoyi woopipila. Ayo yaari manan'na Pwiiya tjanrumalyaawe Moises. ³² Vano nteko wontabernaakulo, etenda yo nthukumano yahomalihiya. Apoovo oIsrael ahopanka tjoteene. Ayena ahotharenla toko tjaleheriyaaya Pwiya tjamwirenlyaawe Moises. ³³ Ayena ahowaana etabernaakulo wa Moises, etenda ni ekaruma tjayan'yo, tjothukeliya, ethaapua, eviiga, ni mithitteeryo tjayan'yo. ³⁴ Mavatheliyo ni mattapala onama, tjopintariya yosheerya, mavatheliyo ni ettapala yookoromala yo nama yom'maatjini, eveeu yaattiyenla, ³⁵ nivuku nowataana ni ekopo tjayan'yo ni etampa tjaya. ³⁶ Ayena ahowaana meesa, ni ekaruma tjnkela wisaatheriya ni ephau wa owa wa Pwiya; ³⁷ ekandelaabru yo wooru ni elampata tjaya tjo thatiya, ni tjithu tjinowanayan'yo ni petoroolyo onlampatani m'mwe; ³⁸ altaari owooru, makhura owoottiheraniya ni elumani yoonukhela; ni ekurtiina wikela ntabernaakulo; ³⁹ altaari obronze ni ekuwo tjaya ni ekaruma tjoovareliya miteko ni ebaciya ni nthitteeryo ayooyo. ⁴⁰ Ayena ahowanatja ekurtiina wa puwani vale ni mithitteryo tjayan'yo, ni ekurtiina yo makhumenloni wa puwani vale, mikhoyi tjayan'yo ni miri tjo etenda, ni ekaruma tjinkela ovareliya miteko nkuultuni ntabernaakulo, etenda yo nthukumanoni. ⁴¹ Ayena ahowaana ekuwo tjoovevyaala wiira tjiwareliye yipankiyaka esuali mapuro ettakattiifu, ekuwo tjeettakattiifu tja namukutho Arao nassanaawe, wiira evare nteko we namukutho. ⁴² Tjo, aoovo oIsrael ahopanka miteko tjooteene wo nayeeli Pwiya tjanrumalyaawe Moises. ⁴³ Moises hoona nteko woteene ni howeha nteko ovaralyaaya. Vano Moises hareeriha.