¹ Vano aPwiya ahomwiirela Moises, ² Nihuku noopatjera wo mweeri, oteke etabernaculo, enupa yoheema yonthukumano. ³ Orwaane nivuku no wataana mpaaniwaya m'mo ni waakhuneele nii veu. ⁴ Ohaana owaanaka meesa ni waarumariki oratteene tjithu tjomphuanela. Vano ohaana owaanaka ekantelabru ni wissaatheraka akhanttiyero. ⁵ Ohaana waahela altaari olumpani owooru nenenke wo nivuku nowaataana, niohaana ohelatjaka okuurtiina omakeleloni wo tabernakulo. ⁶ Ohaana waahelaka altaari ovaheriya okutho ohoolo womakhumenlo wo tabernakulo, enupa yonthukumano. ⁷ Ohaana ohelaka epiiya nenenke wo enupa yonthukumano ni waltaari, ni ohaana otjarihaka maatji. ⁸ Ohaana orattavenlaka epuwa eyo woorukurerya etabernakulo, ni wataphulele ekuurtiina omakhumenloni wo wapuwanivale. ⁹ Wakhusse makhura ni ohaana woottiheraka etabernakulo ni wa yooteene en'hala okhalela vaavale. Ohaana okivahenreraka wa ekaruma tjoteene tjinvarela miteko. ¹⁰ Ohaana woottiheraka makhura altaari onkutho ni wa ekaruma tjinvarela miteko tjoteene. Wakivahenre altaari aayo, ni an'hala okhala ettakattiifu wa mii. ¹¹ Woottihere epiya yo bronze ni nthitteryayooyo, ni okivahenre. ¹² Wan'mwaane Arao nassanaawe ayo omakhumenloni wonupa yonthukumano ohaana waarapihaka ni maatji. ¹³ Wan'warihe Arao ekuwo tjooreerela wa mii, ni wamottihere makhura ni okivahenrele wo wiira yena Akivarele nteko toko Namukutho aka. ¹⁴ Wawaane assaanawe ayo ni wawarihe ekatjako. ¹⁵ We ohaana owoottiheraka makhura toko tjiwottihenrya apapayaayo, wo wiira akivarele nteko toko anamukutho. Othapeliya wayan'wo an'hala okhala anamukutho ohikhumatho wa makhoto oteene". ¹⁶ Moises phipankalyaawe. Yena hotharihenla wa tjoteene Pwiya tjaahimalyaawe. Yena hopanka tjoteene n'ya. ¹⁷ Vano etabernakulo yahotekiya nihuku noopatjera wo mweeri, mwaakha wo na yeeli. ¹⁸ Moises hoteka etabernakulo, hothipelatja mithitteryo tjayan'yo, holutta ethapua tjayan'yo, holutta eviga tjayan'yo, ni hothipelatja miri tjayan'yo ni apontto ayaale. ¹⁹ Yena hovathela toko etenda, wo manan'na toko Pwiya tjaarumalyaawe. ²⁰ Hohela ekettelo tjo Waataana n'hina wo nivuku. Hokomelatja miri wa nivukuni vale ni phawanaawe etampaaya watjulu vale. ²¹ Howaana nivuku n'ne mpaani wa etabernakulo. Hotaphula ekuurtiineele wo wiira attiyenle nivuko noo wataana, toko Pwiya tjirumalyaawe. ²² Hohela meesa mpaani wa etenda yonthukumano, mphantti woohitto wo etabernakulo, otawaya ekuurtiina. ²³ Hinsaathi ephaau wa meesa wariyari wa Pwiya, toko Pwiya tjimwirenlyaawe. ²⁴ Yena hohela ekandelabru mpaani wo etenda yo nthukumano, wa hoolo wo meesa, mphantti wootjulo wo etabernakulo. ²⁵ Hoparihelatja elampata wa hoolo wa Pwiya, toko Pwiya tjamwirenlyaawe. ²⁶ Phaahela altaari owooru ntendani wonthukumano, ohoolo wo kurtiina. ²⁷ Hopaha watjulu waya vale elumpani, toko Pwiya tjimwirenlyaawe. ²⁸ Hothomya ekurtiina omakhumenloni wo etabernakulo. ²⁹ Hinsaathi altaari onkutho omakhumenloni wo etabernakulo, enupa yo nthukumano. Yena hovaha nkutho ni hovaha oferta watjoolya tjo m'mattani waltaari vale, toko Pwiya tjimwirenlyaawe. ³⁰ Hinsaathi epiiya yo bronze n'neke wo etenda yonthukumano ni waltaari, ni hoheela maatji mwen'mwe wo wirapihela. ³¹ Moises, Arao ni assaanaawe yaanyawa vaavale ni yatawatjera mpaciyani ³² wakunla okathi waakelaaya ntendani wo nthukumano yanarwa mpaka waltaari vale. Yanamwiirapiha, toko Pwiya tjimwirenlyaawe Moises. ³³ Moises hothenkatja tjiri mantjira epuwa yo etabernakulo ni yaltaari. Hotaphula ekurtina omakhumenloni wo wapuwani vale. Womanan'na yaayo, Moises homaliha nteko. ³⁴ Vano nihutte nihokuneela etenda yonthukumano, ni waarya wa Pwiya ohotjara ntabernakulo m'mwe. ³⁵ Moises khaalamuliya okela ntendani wo nthukumano, kontha nihutte naari watjulu waya, ni kontha waarya wa Pwiya ohotjaria ntabernakulo. ³⁶ Wakhula owakathi nihutte wawelaaya wa tjulo waya etabernakulo, apoovo oo Israel phakhumaaya ekahayeeyo. ³⁸ Vano, nihutte n'no naahiweleke apovo ale khayaakhuma. Ayena yanakhala mpaka nihuku naawelaaya. ³⁷ Kontha nihutte naa Pwiya naari wa tjulu waya etabernakulo nihuko nooteene, ni Mooro ayooyo ohiyu wo teene, woonaniaaya wa mentho wa poovo oo Israel, wa mwetteloaaya.