¹ Bezalel hopanka altaari onkutho othaapwa ompeeku. Yaari omalootho matjesse omeetro nimotja wo talathiini na thanu yun'nuwelo waaya, erekamelo emetro piili wo ciriini na thanu. ² Yena anoothokola m'maloothoni omaatjesse, olikaneelaka ni enyaka tjo mope. Enyakan'yo yakhalihera ethu emotja ni altaari, ni yena phottihatjeraawe ni ebronze. ³ Yena hopanka ekaruma tjaakea ovareliya miteko waltaari: etigela yakela omwaryeela ettuura, epaa, epiiya, egaarfu ni mapuro yakela opahiya mooro. Yena hopanka tjoteene n'ya ekaruman'ya tjo bronze. ⁴ Yena hopanka egrade wa yaayo altaari ayo, alikaniheraka wo nthavi noo bronze, vathi waya ncerecere. Yanaaphiya mpaka eriyari woo altaari. ⁵ Yena hototossera wo malootho omatjesse wo grade o bronze ale, toko elipihero wo miri. ⁶ Bezalel hohema miri tjo mpeku ni hoottihatjera ebronze. ⁷ Yena hothinyeratja mirin'yo waaneli wo miphantti tjaaltaari, wo wiira ekusseriye. Yena hopanka altaari ohiithu, akussaka ethaapua. ⁸ Bezalel hopanka epiiya yuulupale yo bronze ni nthitteryo aya wo bronze. Yena hopanka epiiya yoo espelho tjaari tjaathiyana yaa vara nteko omakhumenloni wo etenda yonthukumano. ⁹ Yena hopankela epuwa. Ekurtiina omiphantti wotjuulo wo puwa vale tjaari tjo liinyu tjooveviaala, tjaarupaini na thanu erekamelo. ¹⁰ Ekurtiina tjaarina epilaare ciriini, ni khikitjero ciriini tjo bronze. Yahaavo araame yathukatjeriya epilaare n'ye, toko miri tjo parata. ¹¹ Wo manan'na yaayo, mphantti woo hitto, tjaahaavo ekurtina tjo meetro arupaini na thanu,epilaari ciriini, ni mithitteeryo tjo bronze ciriini, araame ya thukatjeriya epilaare ni miri tjo arata. ¹² Ekurtiina wo mphantti onkela ntjuwa tjaarina meetru ciriini na piili n'nuusu, ni epilaare khuumi ni mithitteeryo. araame ni miri tjo pilaare tjaari tjo parata. ¹³ Ekurtiina tjaariana emeetru ciriini na piili n'nuusu mphantti onkhuma ntjuwa wo wapuwani vale. ¹⁴ Ekurtiina n'ye tjaari tjo makhumenloni tjaarina meetru sita ni ecentiimeetru sapiini nathanu. Tjahaana epilaare thaaru ni mithitteeryo thaaru. ¹⁵ Mphantti nkinooyo woomakhumenloni, tjahaavo ekurtiina tjaari meeturu sita ni ecentimeetru sapiini na thanu, ni pilaari thaaru ni mithitteeryo miraru. ¹⁶ Ekurtiina tjoteene tja ttekiye wa puwani vale tjaari tjopankiya ni liinyu tjoovevyaala. ¹⁷ Mithitteryo tjaya tjaari tjopankiya ni ebronze. Eretja ni miri tjaari tjopankiya ni prata, tjowariheliya wa nankatha tjaari tjopankiya ni parata. Epilaare tjoteene tjo wapuwani vale tjaari tjowoottiheriya eparata. ¹⁸ Ekurtiina tjo wankhora vale tjo wapuwani vale tjaarina emeetru khentta. Ekurtiina yaari tjopankiya eteciidu yo pipila, yosheerya ni yosafarau, elinyu yovevyaala, ni yaarina emeetru khentta. Yanaaphiya emetru khentta mun'nuwelo aya ni ecentiimeetru cirini na thanu erekemalo, toko ekurtiina tjo wapuwani vale. ¹⁹ Tjahaana mithitteeryo tjesse tjo bronze ni raame oparata. Tjawariheliye wanankatha vale ni miri tjaya tjaari tjopankiya tjo parata. ²⁰ Miri tjoteene tjo ntendani tjo tabernaakulo ni tjo wapuva vale tjaari tjopankiya ni bronze. ²¹ N'ya phi tjithu tjapankiye tjo ntabernakulo, etabernakulo tjo Kettelo tjo Wataaniha, tjitharihenliyka toko tjintjutjihalyaawe Moises. Tjaari miteko tjo maleviita ovathiwaya ettiheriyaka ni Itamar, mwaana anamukutho Arao. ²² Bezalel, mwaana aa Uri, mwaana aa Hur, onikhoto na Juda, hopanka yeele Pwiya yanhimeralyaaya Moises. ²³ Aoliabe, mwaaana aa Aisamaque, nikhoto naa Da, hovara ni Bezalel toko namahema, namatjiwelatja opittikula, toko namapakatja eteciido yo liinyu yoopipila, yoosheerya ni yoopuurpura ni yo liinyu yooveviaala. ²⁴ Ewooru tjavareliye miteko tjooteene, wo miteko tjoteene onari womphantti weettakattiifu, eri tjo, ewooru yofeerta, tjaari ciriini na khentta etalentu tjene ni eminya saapa wo talathiini esiikulo tjene, wo nayeeli ephimeliyo wo siikulo wo mapuro eettakattiifu ale. ²⁵ Eparata yoovahiya naathu yaari eminya etalentu tjene ni ekonto wo minya saapa wo sapiini na thanu esiikulo tjene, ²⁶ wala esiikulo emotja wakuta nthu, eyo enthoonyera wiira, esiikulo n'nuussu, wo nayeeli ephimeliyo yo siikulo yo mapuro eettakattiifu. Ola nthonyero ola waphuan'nye wo manan'na wo yaale yaalikeleliye wa oteene yaale yantikhiye, o hirimu o ciriini eyakhatjene oruaaka ntjulo, athueene yaari ekonto eminya siita ni ekonto thaaru wo elufu wo hanssiini, oteene waya. ²⁷ Etalentu tjene eminya tjo prata tja hototossiya wiira epankeliye nthitteeryo wo santuwaario ni mithitteeryo tjo kurtiina: mithitteeryo eminya, etalento emotja wakuta nthitteeryo. ²⁸ Wo ekonto eminya saapa wo sapiini na thanu esiikulo tjene tjo prata tjoohala, Bezalel hapanka araame opilaare, ahavathela anankatha ale, ni ahohema miri tjo vaavale. ²⁹ Ebronze tjaavahiye tjahophiyaka etalentu sapiini ni esiiculo ekonto piili ni minya tjesse. ³⁰ Wa yeeyo, yena hopanka mithitteeryo wo makhumenlo oteenda yonthukumano, altari oo bronze, egrade tjo bronze, ekaruma tjooteene tjo altaari, ³¹ mithitteeryo tjo wapuwani vaa, mithitteeryo tjo omakhumenlo ni owapuwani vaa, miri tjoteene ontendani wa etaberanakulo ni miri tjoteene ontendani owapuwani vale.