¹ Vano phinpheelaa okivahenra wowiira akikhalele onankuttho. Okusse enama emotja niipwittipwitthi piili tjoohirakala, ² ephaawu tjoohimiropo nimakhura. Ni okusse mikatthe tjoohimiropo tjooruwen'nha nmakhurani. Opanke mikatthe niitiriku yoopeephyaa. ³ Ohaana weessaka nipuro nimotja, owaane ntthuttuni, niinaman'nho. ⁴ Ohaana orweehaka waArao naassaanaawe omakhumenloni woheema wonthukumano. Ohaana onrapihaka Arao naassaanaawe nmaatjini. ⁵ Ohaana okussaka ekuwo tjoowara Arao ninlaya, ekuwo yanankuttho, tjooteene munwarihaka woorukureerya. ⁶ Ohaana omweessenraka ekuwo nmuruwawe niitthuvo ttakattiifu vatjulu ekuwo. ⁷ Vano okusseke makhura ooreeriha onmwaresseleke nmuruwawe. ⁸ Ohaana waawaanaka assaanaa nooweessenra nikula. ⁹ Ohaana onwarihaka Arao naassaanaawe niissuntu niikuwo. Nteko weenankuttho on'hala okhala naayenatja niikettelo yoohimala. Weenan'na yeeyo, ohaaana onreerihaka Arao naassaanaawe wiira akivarele nteko. ¹⁰ N'haana n'waanatjaka epwittipwitthi n'heemani wonthukumano ni Arao naassaanaawe matataaya akhaleke vamuruwawe. ¹¹ Ohaana wiivaka epwittipwitthiiyo ohoolowaka, Apwiya, n'heemani wonthukumano. ¹² Ohaana okussaka ephome vakaani yopwittipwitthi ohelaka woomaleloni altaare ninikokhonaa, ni ohaana omwaresselaka ephome yoohaleeyo nkurukuru altaare. ¹³ Ni ohaana okussaka makhura opaheke ooteene waltaare. ¹⁴ Massi enameeyo, nttapala, ohaana opahaka ota. Eyo en'hala okhala yoovahiya tjotanpi. ¹⁵ Ohaana okussaka enama yowantjera, Arao naassaanaawe matataaya ahaana akhalaka vamuruwaya. ¹⁶ Vano wiiveke enameeyo. Vano okusseke ephomeeyo omwaresseleke n'hina waltaare. ¹⁷ Ohaana othikilatjaka enameeyo nphantte ninphantte, vano okusseke mettotjaya nitjitthutjaya tjikhwaawe nimuru, ¹⁸ weesseke waltaare. Vano opaheke enameeyo yooteene. On'hala okhala okutthwaaka, Apwiya. En'hala okhala etthu yookitjivela; en'hala okhala yoovahiyaaka yookuttho. ¹⁹ Vano okusseke enama ekhwaawe, ni Arao naassaanaawe ahaana yeessaka matataaya vamuruwaya. ²⁰ Vano ohaana wiivaka enameeyo nookussa nphantte wophome. Yeeyo ephomeeyo on'hele woomaleloni n'nharu moono weelopwana, ninikokho nontata noolopwana, ninikokho non'nha noolopwana naArao naassaanaawe. Vano ohaana omwaresselaka ephome khula nphantte waltaare. ²¹ Ohaana okussaka nphantte wophome eri waltaare ninphntte womakhura ooreeriha, on'mwaressele Arao niikuwotjawe, naassaanaawe niikuwotjaya. Vano, Arao, naahala oihiya tjitjon'mo niikuwotjawe, assaanaawe niikuwotjaya. ²² Ohaana okussaka makhura onamaayo, makhura oomwiilani, nphantte ohapa, ephumu tjoopiili, makhura ankhalanaaya, ni mwetto womoono weelopwana kontha enameeyo yooreeriheliya anankuttho. ²³ Okusse ephaawu emotja, nkatthe woopankiya nimakhura, nkatthe n'hina wotthuttu yophaawu tjoohimiropo tjin'hala okhala ohoolowaka, Apwiya. ²⁴ Ohaana weessenraka nmatataniwawe Arao naassaanaawe. Ayenatja ahaana akiwiiheraka, Apwiya, ni waathonhera phanka yoovahiyaaka. ²⁵ Ohaana okussaka tjoolya tjn'matataniwaya ni opaha waltaare vamotja nookuttho. Eyo en'hala okhala yookitjivela; okuttho woopahiya nimooro. ²⁶ Ohaana okussaka ekhakaatja yonama yaareeriheliye Arao phanka yoovahiyaaka, Apwiya. Vano eyo phin'halaa okhuura. ²⁷ Ohaana okivahaka ekhakaatja evahalyaa phanka yoovahiya nimwetto on'hala ovahiya, tjooteene tjikhumale n'namani tjooreeriheliya Arao naassaanaawe. ²⁸ Tjen'nho enaman'nho, tjivahiye naatthu owiisrael, tjihaana tjikhalaka tja Arao naassimutjaawe. Tjin'hala okhala tjoovahiya tjaanankuttho, tjikumihiyaka naatthu owiisrael, kiwiiheriyaka, Apwiya. ²⁹ Ekuwo ttakattiifu tja Arao ahaana assunkeriyaka assaanaawe. Ayenatja an'hala oreerihatjiya noohimeeryatjiya. ³⁰ Nankuttho n'hala onkhalenla waassaanaawe, n'hala owa n'heemani wonthukumano wiira akivarele nteko, nipuro ttakattiifu, n'hala owara ekuwon'nho mahuku saapa. ³¹ Ohaana okussaka enama yooreerihiya yaanankuttho ni waapyaa nipuro ttakattiifu. ³² Arao naassaanaawe ahaana akhuuraka enameeyo niiphaawu eri n'hina woheema onthukumano. ³³ Ayenatja ahaana akhuuraka enameeyo niiphaawu evahalyaa, wowiira kireeriheliye. Khaavotho n'hala lya eyoolyeeyo, kontha ahaana yoonelaka wiira yooreeriheliyaaka, yoohiyeriyaaka. ³⁴ Wakhala wiira enaahala enaahala enama erupaka ossenliya wala ephaawu, ohaana opahaka. Khin'hala oliyatho kontha kinooreeriheliya. ³⁵ Weenan'na yeeyo, woottharenla tjooteene tjoorumalyaaka wiira ovare, ohaana ovaraka ni Arao naassaanaawe. Ohaana okhalanaka mahuku saapa oopheela okireerihela. ³⁶ Nihuku nooteene ohaana ovahaka epwittipwitthi emotja phanka yoovahiya watjoolevenliya tjoottheka. Ohaana waareerihaka altaare, ni ohaana waattikitthelaka makhura wookireerihela. ³⁷ Womahuku saapa, ohaana waareerihelaka altaare Apwiya. Vano altaaryaayo kinaahala oreeriheliya woomalela. Yooteene en'hala okwanha altaare kinaahala okawaniheriya. ³⁸ Ohaana ovahaka, mahuku ooteene, waltaare, enama piili tjoyaakha emotja tjeeyareelo. ³⁹ Enama emotja ohaana ovaha owitjissu. Enama ekhwaawe on'hala ovaha yootjootjilo. ⁴⁰ Enama yowantjera, on'hala ovaha ekiilu piili tjophepa niiliituru emotja yomakhura ni on'hala omwaressela eliituru emotja yonipha phanka yoovahiya yoowuriya. ⁴¹ On'hala ovaha enama yonayeeli niikelaka ntjuwa. On'hala ovaha phanka tjoovahiya owitjissu tjoopahiya watjoovahiya tjonipha. Tjin'hala okhala tjookitjivela. ⁴² Tjin'hala okhala tjoovahiya tjoopahiya naatthwaa. Ohaana okipankelaka omakhumenloni woheema onthuumano, on'halaaka woophwanha wiira kiwuulumane. ⁴³ Kinaahala okumaana naatthu owiisrael; heema naahala okhala ookawaniheriya waaryawaka. ⁴⁴ Kinaahala onreeriha heema onthukumano ni altaare wayaale ari awaka. Kinaahala onreeriha Arao naassaanaawe wiira akhale anankutthwaaka. ⁴⁵ Kinaahala okhala naatthu owiisrael ni kinaahala okhala Nlukwaaya. ⁴⁶ Ayenatja anaahala otjuwela wiira kiPwiya, Nlukwaaya, aakumihale elapo yowiigiipitu wowiira kikhale naayenatja. MikiPwiya, Nlukweenhu.