¹ Omwiihane mwaamun'naa Arao naassaanaawe Nadabe, Abiu, Eleazar ni Itamar wiira akhale anankutthwaaka. ² Ohaana opankelaka Arao mwaamun'naa. tjoowariya. Tjen'nho tjoowariyan'nho, tjin'hala okhala nttittimiho waawa. ³ Ohaana waahimeeryaka atthu ooteene ootjuwelatja, yaale yaatjalihalyaaka n'nepa wootjuwelatja, wiira apanke tjoowara Arao nookhala nankutthwaaka. ⁴ Tjoowariya tjin'halaaya opanka tjin'hala ohala tjoolipa, ekuwo yoolipihatjiya, yoovilikelatjiya nmuru niissuntu. Ayenatja ahaana apankaka tjoowariya. Tjin'hala okhala tjamwaamun'naa naassaanaa wowiira akikhalele onankuttho. ⁵ Anamapankaayo ahaana apankaka niikuwo yoovevyaala, ewooru, yonankithi, ni yoosseerya. ⁶ Ahaana apankatjaka yeenankuttho yowooru, yokuwo yoovevyaala, yonankithi ni yoosseerya. Ohaana okhalaka nteko wantthu ootjuwelatja. ⁷ Tjihaana tjikhalanaka tjooreeriha piili nkurukuruwaya. ⁸ Essuntwaaya ehaana ekhalaka phanka yeenankuttho; ehaana epankiyaka vamotja i yoowara nankuttho, yoopankiya niiwooru, yonankithi ni yoosseerya. ⁹ Ohaana okussaka maluku meeli ni wantikha mon'mo matjina aassaana khuumi nayeeli owiisrael. ¹⁰ Matjina sitaayo ahaana akhalaka nluku nimotja, ni matjina sitaayo ahaana akhalaka nluku nikhwaawen'no, woottharenlana eyaakhatjaya. ¹¹ Nintthu ootjuwela wantikha wanlukuni, naahala wantikha maluku oomeeli matjina aassaana khuumi nayeeli owiisrael. Malukwaayo ohaana weessenraka tjoolipihera tjowooru. ¹² Maluku oomeeli on'hala weessa watjoowara nankuttho wiira muupuwenleke Apwiya naassaana owiisrael. Arao naahala okussa matjinaawe waaPwiya, wamakhatani oomeeli amuupuwenlaka. ¹³ Ohaana opankaka tjoohalaha tjowooru ¹⁴ ni onholo miili wowooru, ni ohaana olipiheraka onholooyo nitjen'nhe tjoohalahala tjowooru. ¹⁵ Ohaana opankaka yananphuki, nteko wanamatjuwelatja, yoopankiya phanka yanankuttho. Opanke yowooru, yonankithi ni yoosseerya niikuwo yoovevyaala. ¹⁶ Ehaana ekhalaka miphantte tjooteene tjoolikana. Ohaana okhunaka emaara piili. Ehaana ekhalaka ephimelo emotja eyun'nuwelo niiphimo emotja erekamelo. ¹⁷ Ohaana okhalihaka eliinha tjesse tjomaluku ooreeressa. Eliinha yowantjera yorubi nmotja, topazio nmotja ni granada nmotja. ¹⁸ Eliinha yowaakulela esmeralda n'motja, safira n'motja ni diamante n'motja. ¹⁹ Eliinha yoneeraru jacintu n'motja, agata n'motja ni amestia n'motja. ²⁰ Eliinha yoneetjesse ehaana ekhalanaka berilo n'motja, onix n'motja ni jaspe n'motja. Tjooteene tjin'hala opankiya niiwooru. ²¹ Malukwaayo ahaana yiissaathiyaka nimatjina khuumi nayeeli aassaana owiisrael, khula nluku tjinttharenlanaaya matjina. Ahaana akhalaka phanka anela, khula ntjina nikhalaka phanka mahimo khuumi nameeli. ²² Ohaana opankaka tjoophwaneliha phanka mikhoyi, nteko woovariya niiwooru. ²³ Ohaana opankaka tjitthu piili tjowooru weessaka nkurukurumwaya. ²⁴ Ohaana weessaka mikhoyi tjoomiili tjowooru nkurukurumwaya moomiili. ²⁵ Ohaana weessenraka nkurukuru tjoopiili mikhoyi tjoolipihera tjoopiili. Vano ohaana otthukaka nphantte woohoolo. ²⁶ Ohaana opankaka piili tjowooru, ni weessaka ekurukuru piili tjikhwaawe nmwiinanoniwaya wookhumenla. ²⁷ Ohaana opnakakatho piili tjowooru, ni ohaana otthukela n'hinawaya watjoowara nankuttho, watjoottotthiya tjikhwaawe, wayoottotthiya yoowara nankuttho. ²⁸ Ayenatja ahaana etthukaka ninkhoyi wonankithi, wowiira tjikhale tjoolipa vatjulu wossuntu ettottheliye nankuttho. Ni wowiira ehihiyane niyoowara nankuttho. ²⁹ Arao arwaa nipuro ttakattiifu, yena haana akussaka matjina khuumi nameeli aassaana owiisrael wanphuki wanrimani ni wahimyatjiye wiira, okhale muupuwelelo woohimala ohoolo waaPwiya. ³⁰ Ohaana okussaka Urim ni Tumim. Tjen'nho tjihaana tjikhalaka wanrimani wa Arao ni aphiya ohoolo waaPwiya, Arao haana ankussaka nphuki wanrimaniwawe npaka waaPwiya. ³¹ Ohaana opankaka nlaya nokuwo neenankuttho. ³² Nihaana nikhalanaka ephaa woopheela ovira muru. Epheeyo ehaana ekhalaka yoorukureerya wowiira hiphare. Nihaana niratteliyaka. ³³ Mun'halaaya ototthiyan'mo, nihaana nikhalaka nliinha nonankithi, ninoosseerya moorukureerya. Tjitthu tjowooru tjin'hala oheliya nkurukurumwaya. ³⁴ Ehaana ekhalanaka ewooeu niiroma woorukureerya nlayan'no, ³⁵ Nlayan'no nihaana nikhalaka ni Arao, wowiira ntjuunawe niiwiyeke akela nipuro ttakattiifu, waaPwiya, ni wookhuma. Wowiira yena hikhwe. ³⁶ Ohaana opankaka nikula nowooru niwantikha, NTTITTIMIHO WAAPWIYA. ³⁷ Nikulan'no ohaana otthukaka ninkhoyi wonankithi ohoolo wokuwo. ³⁸ Ehaana ekhalaka wayuutji ya Arao; yena haana akhalaka wowiira avahiye tjoovahiya tjattakattiifu tjaatthu owiisrael tjinaavahaaya Apwiya. Ekuweeyo ehaana ekhala wayuutjiwawe wiira Apwiya yaakhela tjoovahatjawe. ³⁹ Ohaana opakaka nlaya nokuwo yoovevyaala. Ohaana opankaka tootho essuntu, ninteko wanamaratta. ⁴⁰ Assaana aArao, ohaana waapankelaka nikula, essuntu ni waaphwanelihatja. ⁴¹ Ohaana onwarihaka mwaamun'naa Arao naassaanaawe. Ohaana waattapelaka, waahimeerya, nookivahenra, wiira akhale anankutthwaaka. ⁴² Ohaana waapankelaka ekuwo tjoohithoonha n'hinawaya, ekuwo tjoowara n'yuununi npaka nkotjokotjoni. ⁴³ Arao naassaanaawe ahaana awaraka yiikelaka n'heemani wonthukumano, wala yaattamenlatja waltaare, wiira yakhal nipuro ttakattiifu. Ayenatja ahaana apankaka tjitjon'mo wiira ahikhwe. En'hala okhala kettelo yoohimala ya Arao naatthu an'hala onphwanha.