¹ Ohaana waapankaka altaare woopaha elunpani. Ohaana waapanakaka nimiri tjonpeeku. ² Wuunuwawaya okhaleke emeeturu emotja ni waatapuwawaya emeeturu emotja. Altaaryaayo akhaleke oolikana ni eyeemelelwaaya ekhaleke emeeturu piili. Maloothwaaya akhaleke vamotja. ³ Altaaryaayo ohaana waakhuneelaka niilunpani niiwooru nkhuneelwaaya, miphanttetjaya nimaloothwaaya. ⁴ Ohaana opankaka yooreerihela altaaryaayo yowooru. Miphanttetjaya altaaryaayo ohaana opankaka tjoovarenlatjaya piili. Tjikhaleke ekopo piili tjoopheela waateessana altaaryaayo. ⁵ Ohaana opankaka ekopo tjomiri tjonpeeku no ohaana okhuneelaka niiwooru. ⁶ Altaare olunpani ohaana weessaka ohoolo wonleesso niri ohoolo wonivuku nowaataana. En'hala okhala ohoolo womwaapu ori ninivuku nowaataana, on'halaaka woophwanha. ⁷ Arao haana apahaka elunpani khula owitjissu. Yena haana apahaka natthonkomanihatjale mithuko. ⁸ Arao apharihela tootho mithuko, ohiyu, yena haana apahaka elunpani waltaare. Eyo ehaana ekhalaka yoovahiyaaka yolunpani womakhoto ooteene aatthu. ⁹ Massi we khunphwanela ovaha elunpani ekhwaawe waaltaare, wala okuttho nkhwaawe wala yoovahiya yoopahiya. We khunphwanela omwaressela nipha waltaare. ¹⁰ Arao haana apankaka tjitjon'mo nmaloothoni waaltaare khula mwaakha emaara emotja. Yena haana apankaka tjitjon'mo niiphome yoovahiya mwaha wotanpi. Nkhulupale aanankuttho haana apankaka tjitjon'mo womakhoto ooteene aatthu. Tjoovahiya tjooteene thimi kin'hala ovahiya, Apwiya. ¹¹ Apwiya yaahomwiirela Moises: ¹² Wawaalikela atthu owiisrael, vano khula ntthu haana avahenraka ekumyaawe waPwiya. Ohaana opankaka tjitjon'mo wawaalikelavale, wowiira ahaakhuwele assinttuuttu wawaalikelavale. ¹³ Yoole n'hala waalikeliya naahala oliva, phanka elemelelo yonipuro ttakattiifu. Yeeyo en'hala okhala yoovahiyaaka. ¹⁴ Yoole n'hala waalikeliya, oyaakha ssiriini woorwa ntjulu, haana akivahaka yoovaha. ¹⁵ Atthu yavaha tjovahatjaya mwaha weekumitjaya, thajiri khan'nhala ovaha tjinene, wala massikhini khn'hala ovaha vakaani. ¹⁶ Ohaana waakhenlaka nssurukhu waatthu owiisrael ni ohaana waahimeeryaka nteko n'heemani wonthukumano. Oyo ohaana okhalaka muupuwelelo waatthu owiisrael ohoolowaka, wiira apanke mwaha weekumitjaya. ¹⁷ Apwiya yaahomwiirela Moises: ¹⁸ Ohaana opankaka epassiya yuulupale yoporontje ninipuro noweessiy epassiyeeyo yoporontje, epassiya yooreeriheliya. Ohaana weessaka eriyariru woheema onthukumano ni altaare, ni ohaana wiitthelaka maatji. ¹⁹ Arao naassaanaawe ahaana anhawaka noorapiha enhaatjaya nimaatji onpassiyani. ²⁰ Ayenatja yakela n'heemani wonthukumano, wala yaattamenla waltaare wiira apahe tjoovaha, ayenatja ahaana yiirapihaka nimaatji, wiira ahikhwe. ²¹ Ayenatja ahaana yiirapihatjaka wiira ahikhwe. Eyo en'hala okhala ekettelo ya Arao naassimutjaawe nimakhoto ooteene aatthwaawe. ²² Apwiya yaahomwiirela Moises: ²³ Okusse mitithaari tjooyevatja: Ekiilu emiya thanu, ekiilu emiya piili wohansiini tjocanela, niikiilu emiya piili wohanssiini tjocamelo tjoonukhela. ²⁴ Ekiilu emiya thanu tjocassia, niiliituru emotja yomakhura. ²⁵ Ohaana opankaka makhura oreeriheliya nitjen'nha tjintthun'nha, nteko wantthu npanka tjoonukhelatja. An'hala okhala makhura ttakattiifu ooreeriheliya . ²⁶ Ohaana ottapelaka heema onthukumano nimakhura yaayo ni nivuku nowaataana, ²⁷ meetja nitjitthutjaya tjooteene, ssaminin'nha nitjitthutjaya, altaare olunpani. ²⁸ Altaare onkuttho nitjitthutjaya tjooteene niipassiya ninipuronaya. ²⁹ Ohaana okireerihelaka wowiira akhale ooreerihiya wami. Wayoole n'hala okwanha tjitthun'nha naahala okhala ottayi wami. ³⁰ Ohaana ontthapelaka Arao naassaanaawe ni waareeriha wiira akhale anankutthwaaka. ³¹ Ohaana waahimeeryaka atthu owiisarel: Ala makhura ootthapelela awaaniye waaPwiya womakhoto ooteene aatthu. ³² Makhuraayo khanphwanela okela mwiirutthuni mwaatthu, wala ohioanketho makhura makhwaawe kontha phaaPwiya. N'haana npankaka tjitjon'mo. ³³ N'hala opanka yoonukhela phanka yena, wala amoottihaka ntthu, oyo ntthuuyo haana iiviyaka naatthwaawe. ³⁴ Apwiya yaahomwiirela Moises: Okusse tjitthu tjinpankeliya yoonukhela tjooteene tjoolikana. ³⁵ Opanke phanka elunpani, yootakaniheriya yoonukhela, nimaakha, ootthapeliya nimi. ³⁶ On'hala wootwaa npaka othuluwa. Weesse ohoolo wonivuku nowaataana, niri n'heemani wonthukumano, on'halaaka woophwanha. On'hala okhaliha yawaka. ³⁷ Elunpani en'halaa opanka, khun'hala opanka ekhwaawe phanka yeeyo. An'hala okhala ttakattiifweenhu. ³⁸ N'hala opanka phanka yaayo wiira akhalihe yowiinukhelihatjera haana iiviyaka naatthwaawe.