¹ Apwiya yaahomwiirela Moises: ² Waahimeerye atthu owiisrael, an'hala wiivahenra, wiira atakanihe tjoovaha. Okaakhenlele tjoovahiyan'nho. ³ Tjoovahiyan'nho ohaana okussaka eriyari yaatthu: Ewooru, eparatha, eporontje, ni tjitthu tjikhwaawe, ⁴ tjotjankithi niinttapala nonama noosseerya; nttapala nopuri; ⁵ nttapala nikithi tjonama tjon'maatjini; miri tjonpeeku; ⁶ makhura oluussu tjonupa yaNluku, tjoophwanela tjomakhura niilunpani, ⁷ nluku nwaarya nimaluku makhwaawe owaarya. ⁸ N'nohala okitekela enupa wiira kikhale eriyari waathu. ⁹ Tjooteene n'nohala opanka tjin'halaaka woothoonherani nmitekoni nitjitthutjaya tjooteene. ¹⁰ Ayenatja ahaana apankaka ekalawa yootthuleliya miri tjonpeeku. Eyun'nuwelwaaya en'hala okhala emeeturu piili ninuussu; eyaatapuwelwaaya emeeturu emotja ninuussu; ni erekamelwaaya emeeturu emotja ninuussu. ¹¹ On'hala otthulela niiwooru yooreeressa npaani noota, ni on'hala opanka ethoonhero yowooru watjuluwaya. ¹² Onaahala otulussa ewooru ephantte tjesse, ni on'hala weemessera metto tjoomitjesse tjonivuku, miili khula nphantte. ¹³ Onaahala okipankela ekopo tjonri wonpeeku ni on'hala okhuneela niiwooru. ¹⁴ Ekopon'nho on'hala ohela n'hinawaya tjiri piili khula nphantte wonivuku, woopheela oteessa. ¹⁵ Ekopo tjihaana tjikhalaka ninivuku, ni tjoohikumihiyatho. ¹⁶ N'hina wohivukun'no on'hala weessa ekettelo tjin'halaaka woovaha. ¹⁷ Onaahala okipankela mwaapu wotanpa. Erekamelwaaya emeeturu piili ninuussu; winssawaya on'hala okhalana emeeturu piili ninuussu. ¹⁸ Onahala okipankela ewooru yoophitiya nkurukurumwaya mwaapu. ¹⁹ Tjoopiili on'hala weessa nkurukuru wakhula nphantte. On'hala ototossa emotja paassi wootossera mwaapuuyo. ²⁰ Tjinaahala otaphuwa ohoolowaya woopheela ovarenla mwaapuuyo. Tjin'hala opittikussiya emotja ohoolo weekhwaaya, ewehaka nphantte womaapu. ²¹ Mwaapuuyo on'hala weessa wiitinli wonivuku, n'hina nivukun'no on'hala weessa ekettelo tjin'halaaka woovaha. ²² Yookuneela nivukun'no, kinaahala woophwanha. Kin'hala owuulumana watjulu mwaapu. Kin'hala wuuluma waanakuru ooyeeli ari ninivuku tjirina ekettelo tjowaataana ni kin'hala owuulumela moolumo ooteene an'halaaka waavaha atthu owiisrael. ²³ Onaahala opanka meetja omiri tjonpeeku. Wuunuwawaya emeeturu piili; aatapuwawaya emeeturu emotja, ni orekamwaya emeeturu emotja ninuussu. ²⁴ On'hala okhuneela niiwooru, erekamelwaaya niiwooru. ²⁵ Onaahala opanka ooreera ookuneelaka ewooru, ophimaka ekokho tjesse eyaatapuwelo. ²⁶ Onaahala opanka tjooreerihela tjesse ni on'hala weessa nmakurukuru tjootjeesse, nri mettotjaya. ²⁷ Tjihaana tjikhalaka tjooreera, wowiira ekopon'nho tjikhaleke ninipuro, woopheela oteessa. ²⁸ Onaahala opanka ekopo tjomiri tjonpeeku ni on'hala okhuneela niiwooru, woopheela oteessa meetjaayo. ²⁹ Tjooreerelan'nho, mikhuki, ekhuyeri, mitiita niiparatho, tjin'hala ovareliya nteko woopheela okaweliya nipha. On'hala opanka niiwooru. ³⁰ We ohaana owaanaka ephaawu wameetja, waryaaka. ³¹ Onaahala opanka essaminin'nha yowooru. Essaminin'nheeyo, nitjithujaya tjooreerela. Ekoophutjaya tjokhala phanka ethutu, ni tjihan'hala opankiya nipuro nimotja. ³² Moonotjaya sita tjin'hala okhala nmaloothoni, moono miraru nphantte nkhwaawe nimiraru nphantte nkhwaawe. ³³ Moono woopatjera on'hala okhalana ekoophu tthaaru tjookhala phanka ethutu, niikoophu tthaaru tjookhala phanka ethutu moono nkhwaawe. Moono tjoosiita tjin'hala okhala tjitjon'mo. ³⁴ Moono tjooteene tjin'hala okhuma mon'mo. Mon'no, tjihaana tjikhalaka ekoophu tjesse tjoopankiya niithutu. ³⁵ Ekoophu niikhwaaya tjihaana tjikhalaka moono tjowantjera, tjoopankiya vamotja, ni ekoophu niikhwaaya vathi womoono tjonayeeli, tjoopankiya vamotja. Weenen'na yeeyo, ekoophu niikhwaaya tjihaana tjikhalaka vathi womoono tjoneeraru, tjoopankiya vamotja. Moono tjoosiita tjin'hala okhuma nssaminin'nhani. ³⁶ Tjooteene tjin'hala opankiya niiwooru yoophitiya. ³⁷ On'hala onpanka ssaminin'nha nimithukotjaya saapa, tjoopheela omwaleela. ³⁸ Tjoopharihela ni tjoottipuhera wapanke tjowooru. ³⁹ Moono nmotja wowooru wokiilu talaathiini natjesse on'hala onpanka ssaminin'nha nitjitthutjaya. ⁴⁰ Ni opanke tjoteene tjinthoonheriyaa omwaako.