¹ Ohaana opankaka enpa yaNluku niikurtiina khuumi, tjotjankithi ni tjoosseerya, tjooreerihelatjiya. Nteko woovariya naanamatjuwelatja. ² Wuunuwawaya khula ekurtina ehaana ekhalaka emeeturu ssiriini nanaane, waatapuwawaya emeeturu tjesse. ³ Ekurtiina tjooteene tjihaana tjikhalaka enan'na emotja. Ekurtiina thanu tjihaana tjitakanihiyakanitjikhwaaya, ni ekurtiina thanu tjikhwaawe tjootakanihiya nitjikhwaaya. ⁴ Ohaana opankaka tjoolipihatja ekurtiina yoomalihera wakurtiina tjowantjera. Tjitjon'mo, ohaana opankaka tjoolipihatjera nkurukuru wokurtiina yoomalihera wokurtiina tjonayeeli. ⁵ Ekurtiina yowantjera ohaana opankaka tjoolipihatjera hanssiini, ni tjoolipihatjera hanssiini wokurtiina yonayeeli. Tjoolipihatjeran'nho tjakhaleke emotja niikhwaaya. ⁶ Ohaana opankaka tjoolipihatjera hanssiini tjowooru wowiira npaanin'mo ekurtiinan'nho tjkhaleke vamotja. ⁷ Ohaana opankaka ekurtiina tjonttapala nopuri tjin'hala okhuneela enupeeyo. Ohaana opankaka ekurtiina khuumi namotja tjooteene enan'na emotja. ⁸ Wakhula ekurtiina ehaana ekhalaka ephimelotjaya talaathiini, wuunuwawaya emeeturu tjesse. Khula ekurtiini tjikhaleke enan'na emotja. ⁹ Ekurtiina thanu tjikhaleke vamotja ni ekurtiina sita vamotja. Ekurtiina yonasiita ohaana okhunaka ohoolo woheema. ¹⁰ Ohaana opankaka tjoovarenla hanssiini wokurtiina yoomalihera watjen'nhe thanu tjowantjera, ni hanssiini tjoovarenla ekurtiina yoomalihera. ¹¹ On'hala opanka tjoovarenlan'nho hanssiini tjoparatha. Vano watakaniheke ekurtiinan'nho owiira tjikhale vamotja. ¹² Ekurtiina enkoohala, yeele yon'heemani, ehaana ekhuneelaka enupeeyo. ¹³ Ehaana ekhalaka emeeturu emotja nphantte nmotja, niimeeturu emotja yokurtiina nphantte nkhwaawe on'hala weerekamelo ohaana okhuneelaka miphantte tjonupa nphantte ninphantte nkhwaawe. ¹⁴ Ohaana opankaka, wonupeeyo, ninttapala noosseerya. ¹⁵ Ohaana opankaka ethaaowa tjonpeeku, eyookweelo, yonupeeyo. ¹⁶ Eyuunuwelo wakhula ethaapwa ehaana ekhalaka emeeturu khuumi, waatapuwawaya, emeeturu emotja ninuussu. ¹⁷ Tjihaana tjikhalaka tjoovarenla piili, emotja wakhula ethaapwa, wowiira tjivarenlane emotja niikhwaaya. Ethaapwa tjooteene ohala opanka tjitjon'mo. ¹⁸ Wapankavale ethaapwan'nho, ohaana opankaka ethaapwa ssiriini nphantte onkhuma ntjuwa. ¹⁹ Onaahala opanka epulooku arupayini tjin'hala okhala vathi wothaapwa ssiriini. Tjihaana tjikhalaka epulooku piili wothaapwa yowantjera wiira tjikhale nvarenlwaaya, ni wakhula ethaapwa tjihaana tjikhalanaka epuloku piili wiira tjikhale nvarenlwaaya. ²⁰ Ni nphantte wonayeeli wonupa, onkela ntjuwa, ohaana opankaka ethaapwa ssiriini ²¹ niipulooku arupayini tjoparata. Tjihaana tjikhalaka epulooku piili wakhula ethaapwa, tjitjon'mo npaka ohoolo. ²² Npaani, nphantte onkhuma ephyoo, ohaana opankaka ethaapwa sita. ²³ On'hala opanka ethaapwa piili wakhula nlootho yonupa. ²⁴ Tjen'nho ethaapwan'nho tjihaana tjikhalanaka epulookutjaya tjookawanyaatja, ni vamotja waanela nmotjaaru. Tjihaana tjikhala tjitjon'mo nmaloothoni. ²⁵ Tjihaana tjikhalaka ethaapwa naane niipulookutjaya. Tjihaana tjikhalaka epulooku khuumi nasita watjooteene, epulooku piili wakhula ethaapwa yowantjera, tjitjon'mo woorwaa ohoolo. ²⁶ Ohaana opankaka ethaapwa tjoovirikana thanu tjoopheela ovarenla ethaapwa tjonphantte wonupa, ²⁷ tjoovirikan thanu tjoopheela ovarenla ethaapwa wonphantte wonupa, ni thanu tjoopheela ovarenla npaani wonupa nphantte onkhuma ephyoo. ²⁸ Yoolipihera eriyari tjothaapwa, tjin'hala ovarenla, tjin'hala waatanliya nkurukuru niikhwaaya. ²⁹ N'nohala ovirihela ethaapwan'nho niiwooru. Ohaana tootho opankaka argola owooru, wowiira tjivarenle tjoovirikana, ni ethaapwan'nho oahaana ovirihela ewooru. ³⁰ Enupeeyo ohaana opanka phanka tjithoonhiheriyaa omwaako. ³¹ Ohaana opankaka ekurtiina yonankithi, yoosseerya, ni yoovevyaala, tjooreerihatjiya. ³² Ohaana othomyaaka nmapottoni matjesse tjonpeeku niiwooru. Ni yaala mapottwaala ahaana akhalaka owooru ni oweessenriya epulooku tjesse tjoparatha. ³³ Ohaana ovarenlihaka ekurtiinan'nho, ni ohaana opankaka nivuku nowaataana n'hina wonleesso. Nleesson'no nookawaniha nipuro ttakattiifu ni nipuro noottakattifessa. ³⁴ Onaahala weessa mwaapu wotampa wanivukuni nonamoona, ori nipuro ttakattiifu. ³⁵ On'hala weessa meetja nphantte woota wonleesso. Ssaminin'nha n'hala weessiya ohoolo womeetja, nphatte onkhuma ntjuwa wonupa. Meetjaayo ahaana akhalaka nphantte onkela ntjuwa wonupa. ³⁶ Ohaana opankaka ekurtiina emotja wonkhora onkhumenla n'heemni. Ekurtiineeyo on'hala opanka yonankithi yoorattarattatjiya. ³⁷ Nmakurtiinani ohaana opankaka mapotto mathanu ooviriheliya ewooru. Tjoovarenlatjaya tjihaana tjikhalaka tjowooru, ni onaahala weessenra epulooku thanu nmapottoni.