¹ Vano Apwiya yaahomwiirela Moises: Owe npaka waryaaka, we Arao, Nadabe, Abiu nimahumu sapiini owiisrael, ni nkikokhorela ottayi. ² Moises phin'hala owa waryaaka. Akhwaawaayo ahiphiye waryaaka. ³ Moises aahorwaa waattonkela atthu ekettelo tjooteene tjaaPwiya. Atthu ooteene yaahaakhula nintjuu nimotja yiiraka: Ninaapanka nuulumo naaPwiya nihimyaaya. ⁴ Vano Moises aahantikha moolumo ooteene aaPwiya. Owitjissuuru, Moises aahaateka altaare imwaako ni aheessa mapotto khuumi nameeli omaluku, tjitjon'mo mapotto ookhuumi nameeli anthoonher wiira mahimo khuumi nameeli owiisrael. ⁵ Yena aahaaveleeliha amittonpe owiisrael wiira yaavahe okuttho waaPwiya. ⁶ Moises aahokussa ephome vakaani ni aahohela npassiyani; ekhwaawe aahomwaressela waltaare. ⁷ Yena aahokussa eliivuru yowaataana ni aahossoma ventji waatthuni. Yena aahiira: Nihaana nipankaka Apwiya en'himyaaya. Nikhaleke owiiwelela. ⁸ Vano Moises aahokussa ephome waamwaressela atthu. Yena aahiira: Ela ephome yowaataana Apwiya enoovahaayani ninkhuluvelo womoolumwaaya ooteene. ⁹ Moises, Arao, Nadabe, Abiu, ni mahumu sapiini wawelalyaaya omwaako. ¹⁰ Ayenatja yaahomoona Nluku owiisrael. Mettotjawe tjaari tjomaluku, tjowoonya phanka erimu. ¹¹ Nluku khataphulale ntatanawe noorussiya nimahumu owiisrael. Ayenatja yaahomoona Nluku, ni yaaholyatja noovurya. ¹² Apwiya yaahomwiirela Moises: Owe npaka wamwaako waryaaka'Kinaahala woovaha kettelo ni tjooruma tjantikhalyaaka, wiira wassomiheke. ¹³ Vano, Moises aahokhuma ni Josue, ni yaahowelatja wamwaako waNluku. ¹⁴ Moises aahaahimeeryatja mahumu: N'halatje ni n'nanriihatje npaka wan'hokolyaahu. Arao ni Hur an'halatja ninhu. Ntthu n'hala okhalana nrikariko aaphwanhatje yaayo. ¹⁵ Vano Moises aahowela npaka omwaako ni nihutte naahonkhuneela. ¹⁶ Waarya waaPwiya waahokhuruwela omwaako Sinai ni nihutte naahokhuneela mahuku sita. Nihuku nonasaapa, Apwiya yaahomwiihana Moises nmahutteni. ¹⁷ Okhumenla waaPwiya waari phanka mooro nmeethoni waathu owiisrael. ¹⁸ Moises aahokela nmahutteni ni aahowela mwaako. Yena aari omwaako mahuku arupayini othana noohiyu.