¹ N'hinttonkelatje ntthu moolumo oohikhala, wala n'hitakaneele nintthu ontuniyani munvahaka namoona owootha. ² N'hitakaneele waatthuni npheelaka opanka yootakhala, wala n'hinpanke namoona woopheela waakiha atthu. ³ Wala munkhalihaka massikhini mwha wawinhu. ⁴ Wakhala wiira n'naaphwanha emope wala enama ekhwaawe yan'wananiinhu enarimeelale, nkusse mwanvahe mwaneene. ⁵ Mwaweha enama yantthu hinoopheela enamorale, n'hihiye. N'haana nkhaviheraka. ⁶ N'hipankeke tjitthu tjoopheela omwaatja massikhini. ⁷ N'himootherye ntthu, ni n'himwiive nassariya, kontha akin'hala onlamula ontuniyani. ⁸ N'haamini waakhiya etthu, kontha anoonaayo antthukela moolumo aanassariya. ⁹ N'hin'huvihe ntthu ookhuma ottayi, kontha onawoonanya wiira n'naatjuwela makhalelo antthu oottayi, kontha mwaari tjitjon'mo elapo yowiigiipitu. ¹⁰ Eyaakha sita n'naahala waala noohepha tjilimaleenhu. ¹¹ Massi mwaakha wonasaapa n'naahala ohiya ni omumula, wowiira amassikhini naatthwaaya alye, En'halaaya ohiya, enama tjontakhwani tjinaahala olya. N'nohala opanka tjitjon'mo niimattatjinhu. ¹² Womahuku sita, n'nohala ovara ntekweehu, massi nihuku nonasaapa n'naahala omumula. Npanke tjitjon'mo wowiira enamatjinhu tjimumule, ni wowiira mwaana opottheenhu amumule. ¹³ Mwaahimeeryatje tjooteene tjinoohimeeryakaakani. N'haassipe anluku akhwaawe, wala n'hitthunihe wiira matjinaaya yiiwiye mwaanomwinhu. ¹⁴ Emaara tthaaru khula mwaakha n'naahala okipankela essukuhuulu. ¹⁵ N'nohala okipankela essukuhuulu tjophaawu phanka tiwiirenlyaaka, mahuku saapa n'nohala okhuura ephaawu yoohimiropo. Owakathi yoole, o'nhala ookonan'na mweeri waAbibe, opnkeliye yoola ntekoola. Phumweeri yoola okhumalyaa wiigiipitu. Massi hikhale n'hala owa woohiitthu waryaaka. ¹⁶ N'nohala otthapela essukuhuulu yoohepha, tjomihokorokho tjowantjera wontekweenhu, tjin'haleenhu waala nmattaniwinhu. Woomala mwaakha, n'nohala otthapela essukuhuulu yoohepha mwatakaniha tjiphwanhaleenhu nmattani. ¹⁷ Khula ntthu haana awaaka waryaaka, mi Pwiya, emaara tthaaru khula mwaakha. ¹⁸ Khan'nohala ovaha ephome watjoovahiyaaka niiphaawu yomiropo. Okuttho wonssukuhuuluniwaka khun'hala okhala ohiyu wooteene npaka ossa. ¹⁹ N'nohala okussa mihikorokho tjowantjera, tjooreeressa, n'waanaka owan'nhaka, enupa yaaPwiya, Nlukweenhu. Khan'nohala waapyaa epuri nleetini mwaanumwanaya. ²⁰ Kinaahala wooveleeliha nlaikha noopheela wookhavihera ninttala, ni wiira noorweehe nipuro nitthonkomanihalyaaka. ²¹ On'himeeryatje ratta ni iiwelele ntjuunaa. Ohinpatjapatje, kontha yena khan'hala olevenla tjoovariya. Ntjinanaka niri niyena. ²² Wiiwelela ntjuunawe ni opankaka tjooteene tjinoohimeeryaka, kin'hala okhala n'wanani an'wananyaa. ²³ Nlaikhanaka nin'hala okhala ohoolowaa ni ninawookussa npaka waamorreu, maheteu, maperizeu, macaneu, maheveu nimajebuseu; nimi kinaahala oweemessatja. ²⁴ Ohaakokhorele anlukwaaya, wakokhorelaka wala opankaka enpankaaya. Woovirikana, onaahala waakwanhulatja woomalela niwaatankulatja altaaryaaya omaluku. ²⁵ N'nohala waavarela nteko Apwiya, Nlukweenhu, yena naahala oreeriha ephaawiinhu nimaatjiinhu; nimi kinaahala okumiha eretta eriyariinhu. ²⁶ Khaavo nthiyana n'hala okhala woohiyara wala onpwessakatja mwaamwanawe elapwaa. Mahuku eekumyaa kinaahala omalihera. ²⁷ Kinaahala wooveleeliha ntakhalyaaka, wayaale an'halaa waaphwanha elapo en'halaa orwaa. Kinaahala waamaleliha atthu ooteene an'halaa waaphwanha. ²⁸ Kinaahala opnaka wiira awanani ooteene atthawe niwoova. Kinaahala waakurussa assinttuuttu an'hala owoomola maheveu, macananeu nimaheteu ohoolowaa. ²⁹ Akin'hala owoomola mwaakha n'motja paassi, wala elapweeyo en'hala okhala yootthawatthawiya, ni enama tjontakhwani tjinaahala wintjivihana mwaha wanhu. ³⁰ Ohiyavaa, kinaahala owoomola vakaani vakaani ohoolowinhu, npaka wan'haleenhu wintjivihana ni nkhalaka elapweeyo. ³¹ Kinaahala opanka mwiinanotjinhu okhuma epahari yoosseerya npaka epahari yomafilisteu, ni okhuma moothakoni npaka muro Eufrates. Kinaahala opanka wiira ottheme elapweele. Onaahala owoomola ohoolowaa. ³² Khun'hala waataana naayena wala anlukwaaya. ³³ Ayenatja khanphwanela okhala nlaponiwaa, wala yaanahala woophwanhiha etanpi. Waakokhorela anlukwaaya, weekhweeli on'hala okhala nryankhwaa.