¹ Wakhala wiira ntthu nawiin'nha emope wala enama ekhwaawe phyiiva wala otumiha, yena haana alivaka emope thanu mwaha womope emotja, niinama tjesse mwaha wonama emotja. ² Wakhala wiira ntthu naaphwanhiya in'nhaka, ni, ntthu anrakalihaka wala okhwa, yooyo ntthu n'hala omwiivooyo khan'hala okhala ntakhali. ³ Massi, ntjuwa nakhuma yena hinaaya win'nha, ntakhali phuuule mwiivale. Nawiyooyo n'hala ohukhumweliya yeele yin'yalyaawe. Yena eehikumihe etthu, yena n'hala otumihiya mwaha wowin'yawawe. ⁴ Wakhala wiira enama yowiyiya naaphwanhaniya, ekhale enama wala etthu piitthu, yena naahala oliva woovikana. ⁵ Wakhala wiira ntthu naakussa enamatjawe arwaaka oliha nmattani ni ahiyaka, enama tjirwaaka ematta yantthu nkhwaawe, yena haana akumihaka yoophwanela yonmattaniwawe. ⁶ Wakhala wiira mooro onaapharela ni okelaka nmattani, opahakatjaka etjoolya, yoole pahale mooroole haana alivaka. ⁷ Wakhala wiira ntthu nanssunkiha mwaattaman'nuaawe nssurukhu wala mihakhu tjikhwaawe, phuwa ttapaya win'nha, ttapayooyo phuvariya, yena haana alivaka woovikana. ⁸ Ttapayooyo eehiphwanhiye, mwaneene etthokooyo haana arwaaka wiithoonha waanamaphuka milattu woopheela otjuwela wakhala wiira khakwanhakwanhale mihakhu tjamwaattaman'nuaawe. ⁹ Woomaleloni, ekhale enama wala ekhale etthu piitthu en'hala orimeela, attonkaka mwaneene: Eyo yawaka, mwaha tjominphantte tjomiili tjin'hala orweehiya ohoolo wanphuki. Ntthu n'hala omwaatja phunki yena naahala onliva mwaattaman'nuaawe. ¹⁰ Wakhala wiira ntthu nanssunkiha mwaattaman'nuaawe emope wala enama phiinama ni, yakhwavale wala yoona owerya wala okussiya ntthu hinoona, ¹¹ olupheela waaPwiya ohaana okhalaka mooteene weenen'na wiira amooneehe wakhala wiira khatankanhale mihakhu tjamwaattaman'nuaawe. Mwaneenyooyo haana aaminiki ni nkhwaawooyo khanliva. ¹² Massi, enameeyo phin'nhiya, nkhwaawooyo haana anlivaka mwaneenyooyo. ¹³ Wakhala wiira enameeyo enaarimeela, nlopwana nkhwaawooyo haana awaanaka enama ekhwaawe. Yena khan'hala oliva mwaha woorimeela. ¹⁴ Wakhala wiira ntthu namwaatjima mwaattaman'nuaawe enama niinameeyo phoona owerya mwaneene hirivo, ntthuuyo haana anlivaka mwaneene enameeyo. ¹⁵ Massi, mwaneenyooyo iira narivo, nlopwanooyo khan'hala onliva; wakhala wiira enameeyo yaanowaalukariya, ehaana eliviyaka niihissapu yaassikissaniye. ¹⁶ Wakhala wiira nlopwana naarupa niiharussi woohipheela onthela, weekhweeli yena haana akhalaka amwaarawe nooliva tjin'halaawe olanliya. ¹⁷ Wakhala wiira athumwanawe anankhottiiha, yena haana alivaka ehissapu tjinliviya eharussi. ¹⁸ Nhuuvaatja n'hikupaleele okhala ninanhanka nkumi. ¹⁹ Wayoole n'hala orupa niinama weekhweeli haana ahukhumwiyaka npaka okhwa. ²⁰ Wayoole n'hala onkokhorela nluku woohikhala Apwiya haana akhwaka. ²¹ N'hin'hukhumwe wala ontanhifu ntthu oottayi, kontha mwaari atthu tjitjon'mo elapo yowiigiipitu. ²² N'haatanhifu anankhweli wala ekhwaatjuni. ²³ Mwaahuvihatja, ayenatja anaahala okikhuwela, Apwiya, ni kinaahala wiiwa okhuwelayaya. ²⁴ Orussiyawaka onaahala owa, ni kinaahala owiivani niikatana; assaarinhu an'hala okhala anankhweli ni assaaneenhu an'hala okhala ekhwaatjuni. ²⁵ Wakhala wiira n'nawaatjima nssurukhu attwaaka amassikhini, n'haalivihe woovikana. ²⁶ Mwaatjima nlaya namwaattaman'nueenhu, n'haana n'hokolossaka ntjuwa niinakela, ²⁷ kontha nkhuneelo nmotja orinaawe; Yena n'hala orupa tjani? Yena akikhuwelavale, kinaahala omwiiwenla, kontha kinakiriri. ²⁸ Nhu khan'nophwanela okihanhuriha, Nluku, wala ontakhaliha nphuki aatthweenhu. ²⁹ N'waaneke tjoovahatjinhu tjooteene. Nkivaheke oowantjereenhu waayara ooteene. ³⁰ N'nohala opanka tjitjon'mo niinamatjinhu. Womahuku saapa, an'hala okhalatja nan'nanumwanaya, massi, nihuku nonanaane, nkivaheke. ³¹ N'nohala okhala awaka. Vano, n'hikhuureke enama yowiiviya niinama ekhwaaya nmwiini. Ohiyavaa, nrihele olapwani.