¹ Phiikettelo tjin'halaa waahimeerya atthu: ² Mwathuma epottha waaheperi, yena n'hala ovara nteko eyaakha sita ni, mwaakha wonasaapa, naahala okhuma woohipokhera. ³ Wakhala wiira waale veekhaawe, haana ahiinýaka; akhala oothela, naahala orwaa naamwaarawe. ⁴ Amwenyaawe yanvaha nthiyana naayena yaayaraka asaana, vano amwaarawaayo naassaanaawyaayo an'hala okhala aamwenyaawe, ni yena haana akhumaka veekhaawe. ⁵ Massi epottheeyo yuuluma ratta: Kin'naafenta amutjaaka naamwenyaaka; akin'hala okhuma ootaphuwatja, ⁶ vano, amwenyaawe ahaana ankussaka waNluku, ni an'hala omweesa wankhora, anaahala ottenla n'nharu nisinkano. Tjitjon'mo, nantekoole n'hala okhala epotthaaya. ⁷ Wakhala wiira nlopwana natumiha mwaamwanawe phanka epottha, yena khan'hala otaphulatjiya phanka ananteko. ⁸ Yena aahaatjivelihe amwenyaawe, yaayo yiithanlelalyaawe, amweenyaayo ahaana antumihaka. Yena khanphwanela ontumihera ntthu oottayi. Yena khunonphwanela, kontha non'huvihatja. ⁹ Wakhala wiira amwenyaayo anantheliha mwaamwanaya, yena haana ankhalihaka phanka mwaamwanawe. ¹⁰ Wakhala wiira mwaamwanayooyo nankhotta nthiyanooyo, ni aakussaka athiyana akhwaawe, yena khunphwanela ovukula eyoolya, nitjitthu tjikhwaawe. ¹¹ Massi, awan'nhawaayo yeehivarele nteko tjitthu tjootthaaru, ayena ahaana akhalaka ootaphuwatja woohiliva wanakhala etthu. ¹² Wakhula ntthu n'hala onpanka etthu ntthu woopheela okhwa, naahala ohukhumwiya npaka okhwa. ¹³ Wakhala wiira ntthuuyo pankale woohilakela, kinaahala onthoonhera nipuro noopheela otthawela. ¹⁴ Wakhala wiira ntthuuyo nonpanka mwayiini mwaataman'nuaawe noopheela omwiiva, ohaana onkumihaka, hata wankhalaawe waltaare waNluku wiira akhwe. ¹⁵ Wayoole nhala waahanhuriha anumwanawe wala athumwanawe, weekhweeli yena naahala ohukhumwiya npaka okhwa. ¹⁶ Wayoole n'hala onkussa ntthu arwaaka ontumiha, wala aphwanhaniyaka, naahala ohukhumwiya npaka okhwa. ¹⁷ Wayoole n'hala waatakhaliha athumwanawe wala anumwaane naahala ohukhumwiya npaka okhwa. ¹⁸ Atthu yaattakana, n'motja anrakalihaka nkhwaawe ninluku wala essooku, woohimwiiva, massi narupaathale wakorini; ¹⁹ ni yoola antja weetta ratta, nlopwana anrakalihale haana alivaka owakathi ohaleelalyaawe, tjitjon'mo phanka tjivonalyaawe, massi nlopwanooyo khan'hala okhala ntakhali. ²⁰ Wakhala wiira ntthu nanrakaliha nantekwaawe niikopwaawe ni nantekoole phukhwa, ntthuule haana ohukhumwiya. ²¹ Massi, nantekoole akhala mahuku meeli wala mararu, nlopwanoole khan'hala ohukhumwiya, kontha hohuva woohaleela epotthaawe. ²² Alopwana yaattakana ni phumooniha oweryaa nthiyana eerukulu ni akhwaka mwaamwanawe, himwiirihale etthu ekhwaawe, weekhweeli namakossooyo haana alivaka phanka tjin'halaawe olanla namaphuka milattu. ²³ Massi, wavara yootepa, onaahala oliva niikumi ekhwaawe, ²⁴ niitho niniitho, niini niniino, ntata nintata, n'nha nin'nha, ²⁵ mooro nimooro, nikhwatta ninikhwatta. ²⁶ Wakhala wiira ntthu nanrakaliha nantekwaawe nomwiiva, yena haana an'hiyaka orwaa wootaphuwatja mwaha woniithonawe. ²⁷ Ankumiha niino, niyena naahala olivela niniinonawe. ²⁸ Emope yanrakaliha ntthu niinhakatjaya wala nthiyana emopeeyo ehaana ehomakatjiyaka npaka okhwa, ni khinphwanela okhuuriya enamaaya; massi mwaneenyooyo haana nlattu. ²⁹ Massi wakhala wiira emopeeyo yaahaana elamalelo woorakaliha khalayi, i maneene atjuwelaka ni hitthunaka otafiti, ni emopeeyo enrakalihaka nlopwana wala nthiyana, emopeeyo ehaana ehomakatjiyaka ni mwanenyooyo okhwa. ³⁰ Alepeliya yoolepeliya mwaha weekumyaawe, yena haana alivaka wayeele en'halaawe olepeliya. ³¹ Wakhala wiira emope enanrakaliha mwaana mwanlopwana wala nthiyana, mwaneene emopeeyo haana attharihenlaka ekettelo. ³² Emope yanrakaliha ntthu, mwaneene emopeeyo haana alivaka eparatha talaathiini wapwiiyawe, ni emopyaawe ehaana ehomakatjiyaka. ³³ Ntthu athipa nlikitti, khuhivuhela, emope wala enama ekhwaawe phumorela mon'mo, ³⁴ mwaneene nliittin'no haana anlivaka mwaneene enameeyo, niinama yokhweeho enkhala yawawe. ³⁵ Emope yantthu yarakaliha emope yantthu nkhwaawe wanpheelaaya okhwa, en'hala otumihiya emope ekumiiyo nookawanatjiya nssurukhuuyo, naayenatja an'hala okawanatja emope yookhweeyo. ³⁶ Massi, wakhala wiira yaari elamalelo yokhalayi womopeeyo, ni mwaneenyooyo atjuwelaka, yena n'hala oliva enama niinama, ni emope yookhweeyo en'hala okhala yawawe.