¹ Nluku aahuuluma moolumwaala ooteene: ² Mi kiPwiya, Nlukweenhu, ookumihaleni elapo yowiigiipitu, nipuro naapotthiyeenhu. ³ N'hinkhalane Nluku nkhwaawe woohikhala miivano. ⁴ N'hikhalaneke ekhove yoovirikana khula etthu eri watjulu erimu, walaeri vathi ethaya, wala eri vathi womaatji. ⁵ N'haakokhorele yaayo aatthwaayo, wala n'haakokhorele, kontha mi, kiPwiya, Nlukweenhu, kiNluku onfento. Kinawaahukhumu anamwane, mwaha watjoovara tjootakhala tjan'nathumwanaya, npaka nikhoto noneeraru wala noneetjesse wayaale ahinkitthuna. ⁶ Massi inaahala waathoonhihera nfento yaale an'hala okifenta noossunka ekettelotjaka. ⁷ N'hikusse ntjinanaka, Apwiya, Nlukweenhu, mahala. Akin'hala onkhaliha ntthu yoole n'hala okussa ntjinanaka mahala. ⁸ Nkuupuweleke nihuku nosaapatu. ⁹ N'haana nvaraka mitekotjinhu mahuku sita. ¹⁰ Massi nihuku nonasaapa, nawaka, Apwiya Nlukweenhu. Nen'no nihukun'no, khan'nohala ovara nteko, wala mwaamwaninhu, nantekweenhu, enamatjinhu, wala ntthu ookhuma ottayi akhalaka nluwaniwinhu. ¹¹ Kontha mahuku sita, mi, Apwiya, kihunpa erimu, niitthaya, epahari nitjooteene tjirivo ni kihomumula nihuku nonasita. Vano mi, Apwiya kihoreeriha nihuku nosaapatu wiira nikhale nawaka. ¹² Mwaattittimihe athumwaninhu naanumwaninhu, n'naahala okhalana ekumi yintji vathi, mi Apwiya Nlukweenhu, yoovahalyaakani. ¹³ N'hiive. ¹⁴ N'heette oluva. ¹⁵ N'hin'nhe. ¹⁶ N'hiwuulume onhala amwaattaman'nueenhu. ¹⁷ N'hitanhifu etthoko yaamwaattaman'nueenhu; n'haatanhifu amwaara aamwaattaman'nueenhu, wala khula etthu yaamwaattaman'nueenhu. ¹⁸ Atthu ooteene yaahoona overunha niitari ni yaahiiwa nipalapatta ni yaahoona mwaako otthuwaka mwiissi. Atthu woonalyaaya tjon'mo, yaahoovatja ni yaahokhalela ottayi. ¹⁹ Ayenatja yaahomwiirelatja Moises: Onihimeerye ninawiiwa; massi ohin'hiye Nluku anihimeeryaka ninaahala okhwa. ²⁰ Moises aahowiirela atthu: N'hoovatje, kontha Nluku wale woolawihani wiira n'hikosse. ²¹ Vano atthu yaahokhala ottayi, ni Moises aahaattamenla waaryaawe Nluku. ²² Apwiya yaahomwiirela Moises: Phin'halaa waahimeerya atthu owiisrael: Nhuuvaatja n'nawoonaka wiira kin'wuulumanakani wiirimu. ²³ N'hiipankelatje anluku akhwaawe ohoolowaka, anluku oparatha wala anluku owooru. ²⁴ N'haana nkipankelaka altaare vathi wiira nvaheke okuttho woopahiya, tjoovaha tjooreera, epwittipwitthi niimope. Wakhula nipuro nin'hala ottittimihiya ntjinanaka, kinaahala owa ni kinaahala wooreerihani. ²⁵ Mwakipankelatja altaare omaluku, n'haateke nimaluku oothikiliya, kontha, mwaateka nitjitthutjinhu, anaahala otakhala. ²⁶ N'haateke woopheela ossunka tjitthutjinhu.