¹ Mweeri woneeraru atthu owiisrael anahiyaleene elapo yowiigiipitu, nihuku nen'ne, ayenatja yaahohokoleela woothakoni Sinai. ² Anakhumale oRefidim, ayenatja yaahomakatja oSinai, ohoolo womwaako. ³ Moises aahowela npaka waNluku. Apwiya yaahomwiihana vamwaako ni yaahomwiirela: N'haana muulumelaka etthoko yaJaco, atthu owiisrael. ⁴ N'hoonatja ewiirihalyaaka atthu owiigiipitu, tjookussalyaakani nmapuphani mwaassaanuni koowiihakani. ⁵ Phimaana mwiiwa ratta ntjuunaka ni nssunkaka waataanawaka, n'nohala okhala awaka mwaatthu ooteene, kontha elapo yooteene yawaka. ⁶ N'nohala okhala omwene weenenkuttho niilapwaaka ttakattiifu. Phamoolumo an'nhalaa wuulumela atthu owiisrael. ⁷ Vano, Moises aahohokolyaa ni aahaalattula mahumo aatthu. Yena aahaattomkelatja moolumo ooteene yaahimeeriyaawe naaPwiya. ⁸ Atthu ooteene yaahaakhula yiiraka: Ninaapanka tjoteene Apwiya tjihimyalyaaya. Vano, Moises aahorwaa waattonkela Apwiya moolumo aatthwaale. ⁹ Apwiya yaahomwiirela Moises: Kin'hala okhumenla nmahutteni wiira aathwaayo akiiwe kiwuulumanaka ni akhaleke oowiiwelela. Vano, Moises aahaahimeerya Apwiya moolumo aatthwaale. ¹⁰ Apwiya yaahomwiirela Moises: Orwee waatthuni. Olelo ni meelo nkittakattifihe, ni wiirele akatthe ekuwotjaya. ¹¹ Nkhale oottonkomanyaa wonihuku noneeraru, kontha, nihuku noneeraru, mi, Pwiya, kinaahala waakulela omwaako Sinai. ¹² Onaahala waahimeerya atthu ooteene mwiinano woorukureerya mwaako: Owiirelaka ratta: Hikhale n'hala owela mwaako wala okwanha. Wayoole n'hala okwanha mwaako naahala okhwa. ¹³ Hikhale n'hala onvara yoole nkoovara mwaako. Ohiyavaa, yooyo ntthuuyo n'hala ohomakatjiya nimaluku wala ohomiya ninttheere. Akhale ntthu wala enama, anaahala okhwa. Nipalapatta naruma owakathi mwintji, ayenatja anaahala owela omwaako. ¹⁴ Vano Moises aahokhuruwa omwaako arwaaka waatthuni. Yena aahaattakattifiha atthu waaPwiya, ni ayenatja yaahokattha ekuwotjaya. ¹⁵ Yena aahowiirela atthwaale: Nkhale oottonkomanyaatja wonihuku noneeraru; khan'nohala ophiya waassaarinhu. ¹⁶ Nihuku noneeraru, wassalyaaya, waahoverunha niitari ninihutte omwaako. Ni naahiiwanyaa ntju nuulupale nonipalapatta. Atthu ooteene yaahoova. ¹⁷ Moises aahaakumihera atthu ooteene ota wiira yamoonan'ne Nluku, ni ayenatja yaahkhala nkurukuru mwaako. ¹⁸ Mwaako Sinai waari wookhuneeliya nimwiissi kontha Apwiya yaakhuruwale nimooro nimwiissi. Mwiissi waawela phwanka mooro, ni mwaako wooteene waanaattettemela. ¹⁹ Owakathi nipalapatta waarumaaya ventji, Moises aanooluma, niNluku aanaakhula. ²⁰ Apwiya yaahokhuruwela omwaako Sinai, woomaleloni mwaako, ni yaahomwiihana Moises. Ni Moises aahowela. ²¹ Apwiya yaahomwiirela Moises: Okhuruwe ni waahimeerye atthu wiira ahituphe mwiinano awaaka waryaaka, wala entji anaahala oriimeelatja. ²² Anankuttho anaattamenla APWIYA ahaana yiittakattifihaka wiira APWIYA ahaarukunuwele. ²³ Moises aahowiirela Apwiya: Atthu ahiwele vamwaako, kontha nhu n'honiirela: Nthoonhe mwiinano womwaako ni mwaattakattifihe Apwiya. ²⁴ Apwiya yaahomwiirela: Okhuruwe ni wanwaane Arao, massi anankuttho naatthu ahiwele, kinawaakwanulatja. ²⁵ Vano, Moises aahokhuruwa npaka waatthuni ni aahaahimeeryatja.