¹ Bafalisi nabañoli nibakeza mwa Jelusalema kukezakukopana neye. ² Bakukeza kubona balutiwa bakwe nibalya buloto na mayanza, asacenete. ³ (Bafalisi nama Juda kabalyi mbita habasamba kumayanza, kakuli balemenene kucizo cabakale. ⁴ Bafalisi habazwa kuma ulisezo, kabalyi esi habali cenisa, balemenena kuzintu zingi zibabaamuheli, ziswana sina kusanza inkomoki, inongo, zibikilo zizwa habutale, ne ntaelo kuzibalya) ⁵ Bafalisi nabañoli bakubuza Jesu, ''Cinzi balutiwa bako habasayendeleli necizo cabakale, kono balya buloto namayanza asasambite?'' ⁶ Iye akutiyenzi kubali, ''Isaya abapolofiti nenza habawambi balihele. Sina hakuñoletwe, 'Aba bantu banikuteka ke milomo yabo, kono myozo yabo ina kule neme. ⁷ Banilapela nokusena intuso, kuluta milao sina intuto za bantu.' ⁸ Mubakani milao ya Nyambe no kulemenena kuzizo za bantu.'' ⁹ Akuwamba kubali, ''Cinzi hamukana milao ya Nyambe kuti mumamele cizo cenu! ¹⁰ Mushe abawambi, 'Kuteke beso nibanyoko, 'Hape, 'Yense yawamba zibi kubesi kapa banyina kafwe.' ¹¹ Mutiyenzi, 'Haiba muntu awamba kubesi kapa kubanyina, ''Intuso yenibamitusi ikaiswanela kuwaniwa kwangu ndi Korbani''' ( iwamba yenzi, ' Kuhewa kwa Nyambe'), ¹² cwale kamusimuzuminini kutendela besi kapa banyina cintu. ¹³ Mumana milao ya Nyambe mumikwa yecizo cenu cinimwamana kuwisikiza hansi. Hape mupanga zingi heco.'' ¹⁴ Akukuwa igandya lya bantu hape nokutiyenzi, ''Muteleze kwangu, mwense, nokunisuwa. ¹⁵ Kakwina cintu cizwa kunze kwingila kumuntu ciola kumusihiza. Cintu cizwa kumuntu ncecimusihiza.'' ¹⁶ Haiba kwina ena matwi asuwe. ¹⁷ Jesu hasiya igandya lya bantu nokwingila mwinzubo, balutiwa bakwe bakumubuza ze nguli. ¹⁸ Jesu akutiyenzi, ''Nenwe kamusuwisisi? Kamubwene conse cizwa kunze kacisihizi muntu, ¹⁹ kakuli kacizwi kumozo, kono ciya mwibumo nokuzwila kunze mukalimba-limba?" Jesu akubawambila zilyo zonse zicena. ²⁰ Akutiyenzi, ''Zizwa kumuntu nzezimusihiza. ²¹ Kuzwila mukati komuntu, kuzwa kumozo, nzezileta mihupulo mibi, intakazo zo bubuki, busa, bwihazi, ²² Bubuki, kushukelwa, kuhomenena, intakazo, lunya, buhata, muipo, buyanga. ²³ Bonse bubi buzwa mukati, nzezi sihisa muntu.'' ²⁴ Akunanuka kuzwa ko nakaya ku cilalanda ca Tire na Sidoni. Akwingila mwinzubo, kana kasaka kwizibiwa kwena, hape kana kakukonahala kumupata. ²⁵ Kobutungi, mwanakazi ikena mwana wo mukazana ikena myoya ya masila nasuwa zakwe hape akwiza kuwila ha matende akwe. ²⁶ Mi mwanakazi keli mu Gelike, ikeli Musiro-fenisya ke cipepo. Akumukumbila enzi azwise myoya mibi kumwanakwe wo mukazana. ²⁷ Akutiyenzi, musiye banuke batange balye. kana nji nenza kuhinda zilyo za banuke nokuha bambwa.'' ²⁸ Akumwitaba no kuwamba kwali, ''Kota, Unfumuwangu, nanga bambwa bena munkotela ye ntafule balya bubulumusi bwa banuke.'' ²⁹ Akutiyenzi, ''Kuziwawamba, ulukuluhite kuyenda. Myoya mibi ciyazwa kwali mwanako.'' ³⁰ Akubola kwinzubo yakwe akukawana mwanakwe alele ha buhilu, myoya mibi niyazwa kwali. ³¹ Akuyenda hape kucilalanda ca Tire, kenzila ya Sidoni mu cibwi ca Galileya kuzwilila mucikiliti ca Dekapolisi. ³² Bakumuletela muntu muhulu ikena bukabu kukuwamba, bakumukumbila kubika iyanza lyakwe hakwe. ³³ Bakumukundukiseza kwimbali kuzwa mwi gandya lya bantu, akubika minwe mumatwi akwe, akuswa nokukwata lulimi lwakwe. ³⁴ Akulola kwiwulu nokuhensumuka, nokuwamba kwali, ''Effata.'' kutiyenzi, ''Yaluke!'' ³⁵ Yaho feela matwi akwe akwiyaluka, cikakatizi co lulimi ci kuzwa, akutanga kuwamba nokusena bukabu. ³⁶ Jesu akubalaela kusa wambila bantu. Kono mukaba laelela, mukabawekeleza kuwamba. ³⁷ Niba komokwa cahwa, enzi, ''Apanga zintu zonse nenza. Apanga basasuwi kuti basuwe nabana basawambi kuti bakuwamba.''