अध्याय 21
1
फाचे इसुंय मातला लोकाहांन तिया –जिया दान दान पेटीम टाकतां देख्या
2
तियाय एकी गरीब रोडे बायाल बी दान पेटीम बेन पोयसा टाकतो देख्या
3
ताहा येसुय आख्यो आय तुमाहांन खेरोज आखहूं इयो गरीब रोंडे बायीय बादाहा से बाद टाकह्यों
4
काहाका इयाहांय तियाहां खुबूज मिलकती मेने थोडो-थोडो दान टाकह्यों पेन इयोंय जोतो कामावलों आथों तो बादोंज टाकी देदहो
5
तिही खुब लोक मंदीरा बोद्दल गोठ्या केअतला इ मंदीर हाराम हारा डोगडाहां की आन हारी हारी वस्तु भेट दिइन खुब हारों तियार केअलों हाय
6
ताहां ईसुआखहे बेअताहा ने ? पेन एहेंडो टेम आवी इया डोगडाहांवे डोगडो नायं री बादोज पाडी टाकी
7
इसु चेला तियाल फुचताहा “ ओ गुरूजी इ बादों किदीही वेरी? आन ए गोठ्या जाहा वेरी तिया काय निशान केनारी?
8
ईसुय आख्यों “ तुमा ढोगायाहा माअ हाचवीन रेजा ते दिही पाही आवी गियाहा काहाका मां नावा की खुब लोक आवीन आखी आय हाय पेन तेहेंडा लोकाहा फाचाडी जावनु नाय.
9
आन तिया दिह्याहाम लढायीही आन दंगाहा बोद्दल तुमा उनायाहा ताहां काबराय माअ जाह ए गोठ्या पेअल्या बेअनाऱ्याज हाय, पेन ओतहा की बादी दुन्या नाश नाय वेअनारी
10
आजी तो तियाहान आखहे, “ एक जाती लोक बिहीरा जाती लोकाहा विरूध्द केरी आन एक राज्य बिहीरी राज्या विरूध्द केरी
11
आन तोरती खुबूज जोर में आली उठी आन खुब जागहावे काल पोडी आन नवा-नवा रोग निंगी आन जुगाम काबरावी देनाऱ्या गोठ्या आन मोड्या निशाण्य देखायी
12
ए गोठ्या वेरी तिया पेअला ते मां नावा खातोर तुमाहावे खोटो आरोप किइन तिइ ली जाय आन तेरावी दी फाचें भक्ती पोंगा अधिकाऱ्याहां आथाम होपी दी ते कचरीम कोडी देवावी आन मां नावा खातोर राजाही आन अधिकारी लोकाहाही ती ली जाय
13
तिही तुमा मा बोद्दल साक्षी दयाहा
14
ताहां तुमा काय आखहा इया बोद्दल आगलोंज मोनाम विचार माअ क्याहा
15
काहाका आय तुमाहान गोगां खातोर एहेंडी ओकल आज शब्द देहें तियाही विरूध्द केंअनाराहान, तुमा विरूध्द कावीन गोगानारो नाय
16
पेन तुमा याहाकी बाहाको, पावहुं जातुले आन हेंगात्ये बी तुमाहान तीइ दी आन तुमाहामेने बाक्याहान मारावी
17
आन मां नावा खातोर बादा लोक तुमा विरूध्द केरी
18
पेन तुमा मुनकामेने एक किही बी नाय वे अनारो
19
पेन तुमा विश्वास टिकी रेवनु की जीव वाचावाहा
20
जाहा यरूशलेम सेहेरा चारी सोमकी दुश्मनाहा सैन्य आवी जाय, ताहा तुमा होतजी लेजा आमी इया नाश वी जावनु टेम आवी गेहेलो हाय,
21
ताहा जे यहुदीया प्रातांम री तियाहाय डोगाम नाही जावुन, जे यरुशलेम सेहेराम री कमयाहाय बारे निगी जावुन
22
काहाका नियमशास्त्रामेन बाद्या गोठ्या पुऱ्या वेरा खातोर ओ बोदलो लेवनु दिही री
23
तिया दिह्याहाम जियु बायाही मोयना री आन तियो बायीही हाने पोयरे दुध खानारो री तियोहोन खुब तारास वेरी काहाका देशावे खुब मोडो संकट आवी आन तिहीने लोकाहांन खुबूज तारास वेरी
24
बाक्याहान तारवायी की माय टाकी आने बाक्याहान तिइन गुलाम बोनावीन बादा देशाहाम ली जाय जावलुग बिहिरी जाती लोकांहा टेम पुरो नांय वेरी तांवलुग बिहीरी जाती लोक यरूशलेम सेहेराल चुंदी टाकी
25
ताहां दिही चांद आन चांदुलीहीम निशाण्या देखायी आन ताेरतीवेने बादा देशाहांवे संकट आवी आन दोऱ्यो डाखरी उठी तियाकी बादें माअहे काबराय जाय
26
आन दुन्याम आवनारा संकटाहा की काबरायन लोक मोअसा होच वी जाय, काहाका जुगामेने सोकतीहीन आलवी दी
27
ताहा ते लोक माअहां पोयराल सोकती की आन मोडी माहीमा की वादलाम आवता देखी
28
ए गोठ्या सुरू वेरी ताहा हारकी उबी रिइन उचे वेअना काहाका तुमा वाचानु टेम पाही आवी गियोहो
29
इसूंय तियाहन एक गोठ आखी, “अंजी्रा चाडवाल आन बादा चाडवाहान वेअजा
30
जाहां ते चाडवें पांगलुतेहें, तियाहांन बिइन तुमा हेामजी लेनाहा आमी उनालेा आवनारो हाय
31
इयोन रितीका जाहा तूमा बी, ए गेाठया वेअतां देखहा ताहा होमजी लेजी, आमी पोरमेहेरा राज पाही आवी गियोहों.
32
आय तुमाहान खेरोज आखुहूं जावलुग ए बाद्या गोठ्या पुऱ्या नाय वेरी तांवलुग इं पिढी पारवानारी नांय
33
जुग आने ताेरती नास वी जाय, पेन मा वचन किदीहीज पारवानारो नाय
34
इयाखातोर तुमा हाचवीन रेजा, नेता खावनु-पिवनु आन दुन्यापेन गोठीही चिंता केअते रिहा आन तो दिही तुमाहांवे एकदोमुंज फांदा होच आवी पोडी
35
काहाका बादा दुन्यामेने लोकाहांवे तो एहेंकीज आवी पोडी
36
तुमा इयो गोडीहीमेने बाचायां आन माअहां पोयरा हुंबर उबी रा खातोर तियार रां जोजे तियाल जागते रिइन सदाज प्रार्थना केअते रेजा”.
37
रोज दिही इसु मंदीराम पोरमेहेरा हाया गोठ्या हीकवुतलो आन राती जैतुना डोगो आखतेहें तियावे जायन रेतलो.
38
बादा लोक तियाहा गोठ्या उनाला खातोर चुनख्या मेदीराम आवतला.