¹ येशु यरीहो सेहेराम पोची गीयो आने तिहीने जातलो आथो. ² ताहा व्या जक्कत नावा केडो एक माअहुं आथो तो करपट्टी लेनारो आने खुबुज मातलो आथो. ³ येशु केडो हाय तो वेरो खातोर कोशिश केअतलो पेन खुबुज गरदीम तिया काय चालेनेय काहाका तो बोधो आथो. ⁴ ताहा तो बादाहा आगाडी दोवडुतो गियो आने येशुल वेरा खातोर एक उंबरा चाडावे चोडी गियो, काहका तो तियोज वाटोपेने जानारो आथो, ⁵ हा येशु तिया जागावे आवताज उंचे विइन तियाल आख्याे, जक्कया माहार निचे उती आव, काहाका आज माल तो कोअ आवुलो हाय. ⁶ ताहा तो माहार निचे उती आलो, आने खुशीकी तिया आवकार केएये ⁷ तो विइन बादालोक कारकुर केरा लाग्या की, पापी माअहा कोअओ गोवारो गियोहो ⁸ ताहा जक्कय उबो रिइन प्रभुले आख्यो प्रभुजी वेअ, मा आरदी मिलकत गरीबाहान हदी दिहु जर मायुंय केडावेने बी ठोगीन कांवी लेदो वेरीतर तोआय चारपट दी देहे ⁹ येशुय तियाल आख्यो आज इयो तारण वेअलो हाय काहाका ओ बी मांअहु आब्राहामा पोयरो हाय. ¹⁰ काहाका माअहा पोयरो गेहलाहाने होदा आने वाचावा खातोर आलो हो. ¹¹ जाहा ते ए गोठ्या उनातला आथा ताहा तियाय येक दाखलोबी आख्यो काहाका तो यरूशलेमा राहरापाही आलो आथो आने देवा राज्या आने राज्या तुरूत आवीन आवनाये हरय, ऐहेकी तीयाहाल होमजात लो. ¹² तीयाय आख्यों एक मातालो माअहु तिया राज्य पदवी तिलब.वीन फीचे आवेहे इया खातोर तरे बिहीरा देशाम निगी गियो. ¹³ तियाय तिया दोहो सेवकाहान हाघा आपने तियहान दोहो माहरी हदइन आख्खे आय आवेहे तावलुग वेपारो केअजा. ¹⁴ आने तिया शेहेरोमेने लोक तिया फाचली वकील मोकलीन आख्यो इयान आमाहावे राज नाय केरा एहेकी आता मोरजी नाहा. ¹⁵ एहकी वियोका तो राज मिलवीन तो रात तिलवीन फाचो आलो ताहा जिया सेवकाहान माहरी वेपारो केराखातोर पोयसा देदलो आथा, त्याय कोतहो कामव्यो तो फुचा खातोर तियाहान तिया हाघा. ¹⁶ ताह पेअलो आगला आने आख्यो का महाराज तुयूल देदलो मोहरा की माअयु आजी दाहा मोहरा कामाव्याहा. ¹⁷ तियाय तियाल आख्यो, मा हाऱ्या सेवका खुब हारो केयो तु वाय हानी गोठीम विश्वासु रियो इयाखातोर तुल दोहो सेहेराहावे अधिकारी नेमी दिहु. ¹⁸ फाचे बिहीरो आलो आणे आख्यो ओ माहाराज पाच मोहरावे मायु बिहीरा पाचा माहरा कामाव्याहा. ¹⁹ तियाय तियाल आख्यो तुल बी पाच सेहेराहावे अधिकारी नेमो दिहु ²⁰ फाचो आजी एक सेवक आलो आणे आख्यो ओ माहाराज तुयू देदलो मोहर मायुय पोतडाम बांदीन थोवी देदलो आथो. ²¹ तु डांबऱ्यो हाय, जो तु थोवो नाह तो तु काडतोहो आने जो तुयूय पोअयो नाहा तु वाडतोहो इयाखातोर माल बीख लागतुजी ²² माहाराजाय तियाल आख्यो ओ खोटा सेवक आय तो मुयाकी आखली गोठीकी की न्याय कोहू आय डांबऱ्यो हाय, इ तुल मालुम आथो मायुय जो देदो नाहा काडी लिहु आने जो पोअयो नाहा तो पोअयासे नाहा तो वाडतोहो ²³ फाचो तुयूयं मा पोयरा बेंकाम काहाले नाहा थोव्या ? आने आय फाचों आवतो ताहा माल त्याजाकी कमली जातो. ²⁴ ताहा तिया पाही उबीरेणाहा तिया आख्यो, इयावेनो तो मोहर मागी लिइन तियावे दोहो मेहर हाय तियाल दी द्या ²⁵ तिहाहाय तियाल आख्यो माहाराज तियावे ता दोहो मोहरा हाय. ²⁶ आय तुमाहाने आखुहू जिया केडीवे हाये, तियाल आजी देवाय जाय आने जियावे नाहा हाय तियावेने जो कांवी हाय तो बी मागी लेवाम जाय ²⁷ आय तियाहावे राज नाय केरा जोजे, एहेकी विचार केअनारा मा दुश्मनाहाने इही जी आवा, आन मा देखता मांय टाका. ²⁸ येशुय एडगोठ्या आखीन तो यरूशलेम सेहेरावेले आगला गियो ²⁹ आने जाहा तो जैतुन नावा डोगाही बेथफगे आने बेथानी आवी पोच्यो ताहा तिया बेन चेलाहान एहेकी आखीन मोकल्या ³⁰ आने आख्या तुमा हुबूरने गावाम जा आने तिही जाय पोचाहा ताहा आमीलुग केडोज तियावे बोठो नाही एहेंडो एक फुरक्या पिलको बांदलो देखाय. तीयाल सोडीने इही ली आवजा ³¹ आने केडोबी तुमाने फुची इयाल काहा सोडता ? ताहा एहेकी आखजा प्रभुल इया गोरज हाय. ³² जियाहान मोकलुला ते तीही जाय पोच्या ताहा जेहकी आखलो तेहकी तियाहान सापड्यो. ³³ आने ते फुरक्या पिलकाल सोडतुला, ताहा तिया मालिकाय तियाहांने आख्यो तुमा पिलकाल काहाल सोडताहा? ³⁴ ताहा तियाहा आख्यो प्रभुल इया गोरज हाय. ³⁵ ते तियाल येशुही ली आला, आने तियाहा पोतडे तिया पिलकावे फांगाव्ये आने तियावे येशुल बाहाव्यो. ³⁶ येशु वाटीपेने जातलो ताहा लोक तियाहां पोतडे वाटीवे फात्तले ³⁷ जाह तो जैतुन डोगा उतुरतीवे आलो, ताहा बादा चेलाहा मा मोडा टोलो हाय ताहाय जे हाऱ्या गोठ्या चमत्काकामे वेईल आथे तीया खातोर तियाहाय मोडाहाकी बोबलीन देवा स्तुती केऱ्या लाग्या. ³⁸ तियाहा आख्यो “प्रभु नावाकी आवनारो राजो आशिर्वादीत हाय! होरगाम शांती आने उचाम उचा जुगांवे गौरव वेअ. ³⁹ ताहा खुब लोकाहामेने बाकी परुशी येशुल आख्यो गुरुजी तो चेलाहान ठाकोजरा आख हाय ⁴⁰ तियाय आख्यों आय तुमाहान आखु ए ठाकाजरी ताहा तियाता डोगडा बोंबली उठी. ⁴¹ जाहा तो पाही आलां ताहा तो शेहरा होवे वेअयो ताहा तियावेल विइन तिया खातोर रोड्यो आने आख्यो. ⁴² केल्या गोठ्या तुले शांती देणाऱ्या ते आजे होमजी लेतो ता कोतों हारो वेअतो, पेन आमी ते तो डोआहा हुबूरने दोबावी थोवल्या आल्याहा. ⁴³ काहाका उहेडा दिही आवणारा हाय का तो दुशमन आवीन चारी सोमखी टोलवायन तुल कोंडवी ली आने तो माज मे आवा खातोर वाट तियार की ली ⁴⁴ ते तुल आने तो पोयराहान तो पीतडाम धुलीम मिलवी ने ते तोअमा डोगडाप डोगडो रानेइय देनारे काहाका तु देवाय तोअवे दोया केअयो तो टेम तुयूय ओख्यो नाहा.” ⁴⁵ येशुय परमेश्वरा मंदीराम गियो आने तिही वेपार केअनाराहान बारे काडी देदे ⁴⁶ आने तियाय आख्यो एहेंकी लेखलो हाय की मां कोअ प्रार्थना केअनु कोअ वेरी पेन तुमाहाय तियाल बांडाहा कोअ उबजावलो हाय. ⁴⁷ आने तो हमेशा परमेश्वरा मंदीराम हीकवुतलो मुख्य याजक ने नियमशास्त्रा हिकवुनारा लोकाहा मुख्याबी तियाल माई टाका कोसीस केतलो आथा. ⁴⁸ पेन तेहकी केराखातोर तियांन सुज्यो नाहा काहाका बांदा लोक तिया लोक आनंदाकी उनामला आथा.