7 ¹ Inyni lyra heka deròna òwy nihikỹ ratyre-ribi awityhymy rỹimyhỹre; rubu txumy bede rỹimyhỹre heka uladu tadiwo-ribi reamyhỹre ratyre-ribi awityhymy rỹimyhỹre. ² Kia ijesuna heto-ò iny ramyhỹre heka awire, kia ixenaki heto rỹimyhỹre-ribi, kiemy dori ijesutxi iny nohõtireny reakre, kiemy dori tiu txuu tule rukururenykre. kia iny irumy rỹimyhỹrenyre mahãdu tahe tiu iribi tõhõtireny rusaõtyhy itxi. ³ Bederyry heka awityhyre ajue-ribi; kia heka bederyry iny òsỹny rihumyhỹre, kia tahe icoracaõ rexiywinymyhỹre. ⁴ Mobo kia alisidihyyle rõhõtinymyhỹre, kia heka iny itxỹte rare; mobo bedeery ratximyhỹre, kia rubudi rõhõtinylemyhỹre. ⁵ Kia iny bedeery rybe-ò ijohonale heka awire, iny itxỹte wiu-ò ijohona-ribi. ⁶ Iny itxỹte mahãdu jue heka iwese aõti heòty-ò roomyhỹre wesele rare — kia aõkehe aõkõre. ⁷ Kia tiu bedeery raehehemyhỹreu, kia heka iny itxỹte wesemy relemyhỹre. Mobo aõdinodu nihikỹ dee rexiwahinymyhỹre, kia taumy ribinanymyhỹre. ⁸ Kia aõkonana heka aõ òraruna ratyre-ribi awimy ròhònymyhỹre. Iny webinadumy rỹimyhỹre heka iny rexityhytyhynymy rỹimyhỹre raty awire. ⁹ Kia ixidi bexiywinymy ikemy atxike; kia iny itxỹte mahãdu adebure yarale rirỹsỹmyhỹre. ¹⁰ Uritre lỹỹraxiõmyke: “Aõherekibo juhu bedeu aõbo bede awimy rỹiramyhỹ?” Ka lỹỹraxi heka bedeery lỹỹraxi aõkõ rare. ¹¹ Kaki heka bedeerylehekỹ ijõdike. Bedeery ijõdimy, kia tahe iny aõwedu nihikỹmy runyke. ¹² Bedeery heka nieru-ribi awityhyre. Bedeery tarasana heka iny mahãdureny hãwaki rỹimyhỹrenyre riijemyhỹrenyre. ¹³ Mohõtinyini aõbo Deuxu riwinyremy. Mobo tahe ritiòbitinykre, tii itiòemy riwinyre-ribi? ¹⁴ Kia tiu aõnaõna awimy reakreu mabedesakre; kia tiu aõnaõna sirasira rehemynykreu kadi mohõtinykre: Deuxu heka bedesana riwahinymyhỹre, iwesele ta aõnaõna sirasira riwahinymyhỹre, ka iny boho aõ rieryrenyõhyymyhỹrenyre, aõbo biurasòmy rỹtỹỹnykre. ¹⁵ Wabededỹỹnanaki heka bòdỹỹna ijõdilere, tai tahe diarỹ tuu ibutumy rabire. Iny awimy rỹimyhỹre rurumyhỹre, ka iny itxỹte tabededỹỹnana binadi irumy ratximyhỹre. ¹⁶ Tai heka awityhyre aõkõ, kia bedetyhy tule; aõherekibo tahe kai bexirubunykre? ¹⁷ Kia uritre itxỹtetyhyõmykre; urikõ-ribi bededỹỹnana wetyatxi buruheny? ¹⁸ Kia aõnaõna-ribi bexilòhòrarienykre ijõ wesele. Txibo kai Deuxulau buberukre-wana, kia ibutumy bexidehedehenykre. ¹⁹ Bedeery heka iny sohojile sõemy riwinyke, deboitue hãwa riòre dinodu-ribi. ²⁰ Kaki hãwa roireki heka iny ihoõhyyre aõ ikiemy òbitimy riwinyke, kia tiu aõki reòsaõmy iximy rarybeke ihoõre. ²¹ Kia uritre ibutumy ijohonaõmyke, kia aõmy iny witxira mahãdu rarybereri-ò, kia aõmysỹdỹỹdule roholake, aõbinabinamy rybena-ò. ²² Kai tahe teerylete, kia sõemy kai iny witxiramy aõnaõna binabinamy tarybemyhỹte. ²³ Diarỹ heka bedeery reuhere ibutumy arierytyhykremy. Diarỹ heka rexiywinyre bedeery nihikỹmy ararekremy, kia tahe bedeery nihikỹ ratyre reaõhyyre. ²⁴ Timybo tahe iny-õ bede binabinatxi rierymy reake? Kia heka inydeereny sỹytyhymy rỹimyhỹre, kia heka timybo raeryke isiratyhyre. ²⁵ Ka diarỹ tahe rexiywinyre idi aratyyritinykremy, aõnaõna arierykremy. Diarỹ heka rexihumy watximyhỹ bedeery nihikỹtxi areakremy, kia walỹỹraxina rawyòdỹỹnatxi areakremy watximyhỹ; kia arierykemy watximyhỹre, aõherekibo iny binabina mahãdu itxỹterenymy rỹira. ²⁶ Diarỹ aõnabinaõtxi reare, kia heka tii rubu ratyre txubererere iny hãwyy wesena. Kia heka hãwyy wesemy iki-wana wimy berinanykemy rexiwahinymyhỹre, kia heka brejuna heto-ò malòkemy adee rexiwahinymyhỹre, kia utura riy wesemy adi risỹnymyhỹre aramykemy; Kia iaxiò heka reruti rare idi aramykremy. Hãbu Deuxu-my reàlàmyhỹre heka iribi rexiwòmyhỹre, ka òrarudu mahãdu tahe aõkõre. ²⁷ Diarỹ heka itxi reare iòhò iòhòlemy, kia iu walỹỹraxina rawyòdỹỹna reijemy watximyhỹu. ²⁸ Kia iwitxira irawyòdỹỹna reijere, kia ta ijõtxi reaõhyyre. Kia Mil-my hãbu sõekyki sohoji hãbuõtxi reare, kia tii sohojile arityhynykre, ka hãwyy ykyki ta ijõtxi reaõhyyre. ²⁹ Kia ibutumy aõ reeryre widee rebunyre: Deuxu heka iny boho riwinyrenyre irutaõmy òbitimy, ka iny bohole tahe ibutumy risirarisiranymyhỹrenyre.