8 ¹ Kia iny bedeery sohojile aõnaõna riòbitinymyhỹre. Kia iny bedeery òsỹny rarỹsỹnymyhỹre, kia iruxeramy relemyhỹre iboxieryreri hãrele ² Iòlò rybetyhydỹỹna bityhynyke, kiemy dori kai Deuxu koki iny òbiti tatemy iximy tarybete tamy ³ Iòlò heka aõwaxina ao ixideewimy riwinyke. Kia uritre wylemy iko-ribi òlòmy wisỹdỹỹõmykre, kia uritre aõnaõna binabina widỹỹmy nohõtiõmykre. ⁴ Iòlò heka tabedeery nihikỹdi rexirarexiramyhỹre, kia iny-õ aõmy tamy rybeõmy aõ riwinyra-wanaki. ⁵ Kia kai irybetyhydỹỹna bityhynyberi-wana, tiu aõnaõnabinamy aõhe butỹỹnyõtyhy. Kia iny ibedeery ijõdimy rỹimyhỹre rierymyhỹre timybo, tiubo rexirarexirakre. ⁶ Kia heka bede òbitimy iu aõ rỹikre ijõdire, kia aõ itỹmyramy relekre ijõdire aõnaõna sohoji sohoji-ò. ⁷ Ka iny bededỹỹnanareny binabina nihikỹ tahe iny boho rieryrenyõhyymyhỹrenyre, aõhebo biurasòmy rukutỹỹnyrenykre, kia mobo dori inykoreny ijyyõna. ⁸ Tiu iny-õ yhy ributumy rimyõtyhy. Iwese tahe tiu iny-õ rubulau rexieõtyhy, kia tiu iwitxira txu-ò riwahinyõtyhy. Iny boho heka ijesu rikierenykre, kia heka iny iribi rahenykre ihoõre. ⁹ Diarỹ heka ibutumy tuu rabire, kia aõnaõnadi rahõtinyreu, ka hãwaki aõnaõna ròhònymyhỹremy. Kia juhu bedeu iny bedeery ruru nihikỹmy rỹiramyhỹ, ijõ mahãdu tahe aõhỹỹmy rutỹỹnyrenyre, iny bedeery ruru nihikỹ dori rimyrenyre. ¹⁰ Diarỹ heka iny itxỹte rubu ỹnymy rabire. Kia wabede weruramy tuu rawowydymy rỹimyhỹre, kia heka ihãwakilere tai iny itxỹte mahãdu aõnaõnabina riwinymy rỹirakile. Kia heka bòdỹỹnaõle rare. ¹¹ Aõherekibo tahe iny mahãdu irutaõlemy rubumy wiko relyymy rỹimyhỹrenyre? Aõherekibo tahe rubudỹỹdu mahãdu wylemy brejuna hetowo-ò ralòrenyõmyhỹrenyre. ¹² Kia rubudỹỹdu-õ aõwaxina cem-my rubudỹỹmy rarybeke, kia ixybyle irymy rareke. Kohe, diarỹ reeryre; “Txibo kai Deuxulau buberukre-wana, kia ibutumy awimy atxikre. ¹³ Ka iny itxỹte mahãdureny-ò tahe awimy aõkõ roirekre. Ibededỹỹnanareny heka iwese bedeubròrò rỹimyhỹre wesele rekoamyhỹrenyre: Kia jyre mahãdu rururenykre, kiemy dori Deuxulau ruberurenyõre.” ¹⁴ Kia heka timy turybena ihoõre. Beteheini aõbo ka hãwa bedeki ròhònymyhỹre: Kia tiwese aõkõ inywi mahãdu brejuna heto-ò rirònymyhỹrenyre, iny itxỹte mahãdu aõkõle reamy; iny itxỹte mahãdu aõwiwi ritamyhỹrenyre, inywi mahãdu aõkõlemy reamy. Aõmybo rarybemyhỹre: Kia heka bòdỹỹnale rỹimyhỹre. ¹⁵ Iurenana heka diarỹ reerymyhỹre, iny boho rikexideysanyrenyke, kiemy dori tii sohojile inydeereny awityhyre, rikiroximyhỹrenyke, monamy rikiõrenymy rikexideysanymyhỹrenyke. Tii tỹỹna heka rikiwinymyhỹrenyke, kia iny boho rakaõmysyỹdỹỹnyrenyke, Deuxu inydeereny ka hãwaki bededỹỹnana riwahinyre wahe. ¹⁶ Kia heka sõemy ixidi resỹnyre bedeery nihikỹmy ararekemy, kia aõnaõna ka hãwaki ròhònymyhỹre arierykemy, kia tahe reeryre iny aõwaxina irumy bede riekre txumy rumy. ¹⁷ Kia hãrele tahe tiu aõ rieryõtyhy, aõbo Deuxu riwinymyhỹre. Kia iny mahãdu ixidi rarurunymyhỹre, kia tiu aõ rieryõhyymyhỹrenyre. Iny bedeery nihikỹ mahãdu aõwaxina raryberenykre aõnaõna rierymyhỹrenyremy, kia inatyhymy tii boho aõ rieryrenyõhyymyhỹrenyre.