5 ¹ Lhema apiau'acja la sacerdote ncolhec aliequieso m'a apiesecsec la apquennemolhema cacpota etnesquesancoc apquellapascama mota napaqtec Engiapom Neten cacpota engiancoc nema acmescama, nema aluanlhema njan caselhaja aquiacmoiecja coca m'a meliamolhma la'a. ² Ca apiau'acja nac sacerdote meienna'ac ma'a ncanec enenlhet apanquec ma'a, apuanquec coca njan elietnajoc napaqta'a enenlhet'awoc la melianweiacmo canjan malha apquetlheneiam anac. ³ Ca apiau'acja nac sacerdote apcanque mota Engiapom Neten apqueluanlhema caselha aniem'o meliamolhma apquennemolhema, cacpota njan ma'a apcanquec apqueluanlhema caselha Engiapom Neten aniem'o njan meijamolhma apancoc apanquec ma'a, ncanec meienna'ac. ⁴ Mancapuanquec enenlhet eliequiesacpo panque cacpota emacmonwomoc ma'a actacmelacja la nenmacmecama aniem'o aptema apiau'acja sacerdote, Engiapom Neten coca apqueliequiescama apanquec ma'a, ca aptemacja lhnac nanec apquelanei'o Aaron apqueliequiescamo m'a. ⁵ Cristo njan meliequiesammacpoc apancoc apanquec la'a cacpota etnec apiau'acja sacerdote, Engiapom Neten coca apcaicamoc ma'a actacmelacja apmacmecama, lhna aptemac apcanemo: «Lheiap apto eietca, astepquescama ejenquec acnem anac» ¹ lhna aptemac ⁶ Lhnac nanec na aptemac mocjom: «Lheiap apto sacerdote mancotnenwaiam annelha, aptemo lhnac nanec ma'a Melquisedec» ^{2 7} Necsa apcaniemjaicama lhta Cristo jenque'e nalhepop anac apquenmalhnoncomo lhta aquieplomo aquiennactema apqueleclhanwecama apqueltemo epasmoc Engiapom Neten ma'a, ncanec na nietnec apmopuana m'a cacpota ewonquesec tep necsa acmajai'a ncowac apquetsepma. Ca aplengai'o lhta njan Engiapom Neten ma'a aniem'o apqueliejecjo mota m'a. ⁸ Niecje aptema Apquetca apanquec ma'a ncacjoc coca aplengaianquec aquientalhnema, ca aquianwesquescaiacmo lhta njan ma'a aniem'o metca apiengecja aptacja la Engiapom Neten ⁹ Niaweianquec coca njan apianweiacmo acuacmo apto apqueluonquescama tep mancotnenwaianlha nnelha aplhamacjo apquellelto la apquelleliejecjo m'a. ¹⁰ Netamen Engiapom Neten aptemesquescama apiau'acja sacerdote apnemo m'a Melquisedec. ¹¹ Ncaimelhquec quelha mocjom anlhenec ania'a nac, nientelhec coca m'a, quetlhencap apsonca ie mamma acpecjai'a elianwomjo'. ^{12 13} Lhennenga niecje apquellengai'a ania'a actacmanma aplhenammap Engiapom Neten quetlhencap, apuanca'a nlho lhta niecje etnancoc jengetlhecmoscama, coca metnaiancoc ma'a, ncaimommalhquec quelha mocjom ncolhec atlhecmoso alhiewai'a la jengetlhecmoscama, meliennactema coca aptaiancoc quetlhencap malha actonac nematca la'a actoma nac neme ncoc nquen la'a, mancapuanquec etuoc aptoma la aliennactema, wanlha coca neme. Apquennawec quetlhencap jenque'e nematca nac, meliejec na eliecpelcoc actacja la acpeiwomo. ¹⁴ Coca apquellelto nac apqueliojo caselha actacmanma nlho ca la ncollatsecama nqueltamenquec apquelluetai'a caselha m'a, ca enenlhet'awoc anac malha aptancoc ma'a apqueliawo la'a, apuanca'ac etawancoc aptecamoc aliennactema.