6
1
Angetlhenquesec nenwanenquescama mongeliasqueiam acuacmo acto nelto malha nelliaw'o, enwanca'a nlho lhta niecje angelieplauquesec amanie nema jengetlhecmosecamoc alhta aptemacja Cristo, acjemo coca m'a nellanecja na mota engellualho'oc aniem'o caselha ncollatsecama jengiantemecja nengetsepmacja m'a, netamen ma'a angellanecjac mocjom caselha ncollatsecama nac. Acjemo njan ma'a lhema acnem anac nentema mongiasqueiam Engiapom Neten, netamen mo'oc acnem angiascamoc mocjom.
2
Mancaimelhcac quetlhencap ma'a ncolhec altaqjenwesquescacjo nema atlhecmosecamo lhta ampacjasecjanque lhta actemacja m'a nema jenlauquescama nac conne iemmen ancoc, actemacja nac apcacjesecamoc apmeio'oc apietsetso'oc apquellelto Jesucristo apquennemolhema, actemacja njan nema apnaqlhatecjasqueiam apquenmasquenwaiacmo, actemacja njan nema ta aliecpelquemo emanie nac.
3
Nlhenquec co ewalhoc meltemo etnancoc Engiapom Neten lhema acnem elleliejecjoc quetlhencap, mo'oc acnem coca melleliejecjec.
4
Quetlhencap apquetlhewaianquec malha aponmatema la'a, apqueliepconme lhta secje lhta caselha metca aquianmoma aniemai'o Engiapom Neten, apquetlhewaianco lhta njan Espiritu Santo.
5
Apqueliepconme lhta njan Engiapom Neten apaioma actacmanma nac, apqueliepconme lhta njan acmowana nac ncotnec jata acmacmecama emanie nac mo'oc nengawacja ta.
6
Jai, apqueliepconme lhta quetlhencap ma'a lhamacjo caselha altacmanma nac, coca apqueliengiacjo la'a mancollapuanquec mocjom ellanecjac apualho'oc, ncotnecjac quelha malha mocjom apqueliaqlhaclhema neten iamet actennescama Engiapom Neten apquetca cacpota eliemetcasama quelha enenlhet'awoc ma'a.
7
Etlhojoc quelha njan quetlhencap ma'a malha lhepop actec anac acpetsesma nac iemmen acmamai'a aquiawai'a la'a. Ca actacmelo la apnaclhecamoc aquielhna m'a apquellelto nac apquenaicamoc, netamen Engiapom Neten etacmelquesec jata nalhepop anac.
8
Coca actepo la wanlha meneuque canjan iammeiac, mancolatsama ta njan lhepop actec ma'a, etuasecjac jata Engiapom Neten, netamen ncolhec jata njan aluanlhacjo m'a.
9
Quetlhencap elialheng'a asquellamelaiam, ncoijec ania'a asietquescama lhquec, coca asiawec
co'o etlhewancoc jata quetlhencap caselha altacmelo aniem'o m'a nengelluoncasemmalhca nac tep,
10
ncanec Engiapom Neten apto apeiwomo panque', meleluancamec na quetlhencap ma'a apquelpasmomo lhta, apquellamelaiacmo lhta njan apquennemolhema acuacmo nenwanlha nac.
11
Coca ntasec etlhenquesec metca acpensanweiam, metca njan apqueliamasanweiam alleclemo apualho'oc, netamen etlhewancoc jata caselha altacmelo apquelleljalhanmo mota caselha ncowac jata.
12
Moltoc ncowac acnem aptaicamoc manconmajai'a enmacmama quetlhencap, ntasec coca eluanancoc ma'a malha aptaiancolha nac ma'a apquellelto ta apquetlhewaicamoc caselha aplheianmo lhta Engiapom Neten aniem'o njan ma'a meliasqueiam, metca njan apquelpecjescama apquellailhema caselha ncowac jata.
Apcaicamoc Engiapom Neten lhema apaioma ncotnec jata Abraham
13
Necsa apcaicamo lhnac nanec lhema apaioma Engiapon Neten Abraham, aptemesquesammacpo lhna apanque juramento apuesai'a apanquec ma'a aptemo lhnac na jawe ngiapac, ncanec mamma apno enenlhet apientalhnemo m'a,
14
lhnac nanec aptemac Engiapom Neten:
«Awanjec jata ncotnec astacmelquesquescama apcaniemjaicama lheiap, apentelhec jata etnec aptawana'ac neptamen, jawe ngiapac anquec astacja nac ascano lheiap»
lhnac nanec aptemac ma'a.
15
Mang nac nanec epecjescamac Abraham apquelailhemo apqueltennascamo lhema apaioma Engiapom Neten, netamen nnac aplhewai'o lhamacjo caselha m'a.
16
Ca enenlhet la necsa aptema juramento, elhenec apuesai'a po'oc apto neten apanquec ma'a, iocjalhmec jata njan ncotnec ma'a actema juramento.
17
Lhnac nane nqueniemai'ac Engiapom Neten aptemesquesammmacpo panquec juramento apuesai'a m'a cacpota ncotnec iocjalhmec anquec apquetlhewaicamoc caselha m'a, metca njan apaiqmoncasecja mo'oc aplheianma caselhaja.
18
Jai, meiaqmoncasecjec mo'oc la aptema juramento cacpota njan apenescamo apaioma aplheianma Engiapom Neten ncanec mamma apmopuana ania'a. Coca nenlhamacjo nengellelto nentengiaicamoc jengeltacmelquescama Engiapom Neten ntasec ncolhnancoc alleljalhnecama engellualho'oc angetlhewancoc jata caselha aplheianmo Engiapom Neten jengellancoc jata.
19
Ca aljalhnecama enwalhoc anac jentemescasquec metca actaicama enwalhoc, malha actonac lomma nemmen la'a aquieujecamoc anac nemmen, netamen ncolhec aquiengiantamoc nemmen tawa apac actetemmalhca tama nau'a cacpota ncomascoc aquieujecamoc ma'a.
Coca aljalhnecama enwalhoc anac jengellentalhnecsec jata m'a Engiapom Neten apnemacja aquieto neten, tep ma'a ietamopai'a apjalhtemommap,
20
ca aptalhnenwecjo lhta njan Jesús ma'a cacpota jengenmaiesquescacjac ma'a, aptemenwecjo lhta njan apiaucja sacerdote malha aptemo lhnac nanec Melquisedec.