4
1
Njeclhec mocjom aclhengama Engiapom Neten apenescamo lhnac nanec apaioma angelentelhec jata aquieto iocjalhma m'a nengiamposammalhquelha, coca mongeltacmelcaselhco la m'a, mongelentelhec jatelha m'a, angellajo ta ennenco'o m'a.
2
Nnenque lhta jengelleltennascamo ennenco'o ania'a actacmanma, ca ntemac na nellieijenca'a m'a apquellengai'ac najan, acjemo coca ntemac ncanec apqueliasqueiacme lhta m'a ania'a.
3
4
Ennenco'o lhtoca mongeliasqueiacmoc ania'a actacmanma m'a, angelentelhec jata njan iocjalhma nengiamposammalhquelha apancoc Engiapom Neten.
Coca lhnac nane aptemac Engiapom Neten jenque'e:
«Lhta stac aspaioma aslawo jawe ngiapac anquec co'o m'a, melentelhec jata iocjalhma nengiamposammalhquelha ejencoc anac»
Apenescanquec nac nanec Engiapom Neten apquelentepquescama lhamacjo caselha lhmanquec jam acuaiacmo acnem 7 m'a, ca actemo nac na actalhesammalhca Engiapom Neten apaioma jenque'e:
«Apiamposammacpec nac nanec Engiapom Neten apmacmecama acuaiacmo acnem 7 m'a»
5
Jai, ca ntemac na mocjom actalhesammalhca Engiapom Neten apaioma jenque'e:
«Melentelhec jata aquieto iocjalhma nengiamposammalhquelha ejencoc anac»
6
Moclhem'a enenlhet apquelaimecpoc elentelhec jata mocjom ma'a iocjalhma nengiamposammalhquelha, canjan ma'a mang nac nanec elentalhnema apmaniaie apquellengai'a ania'a actacmanma ncanec mang nac nanec elleliejecjoc ma'a.
7
Lhnac nane nqueniemai'ac elhenec mo'oc acnem Engiapom Neten elentelhec iocjalhma nengiamposammalhquelha, coca niecje njan acnem nenwanlha nac.
Nwenactemawe lhnac nanec acnem melleliejecjoc Engiapom Neten apaioma enenlhet'awoc ma'a acuacmo acnem apnemo David, lhnac nanec aptemac:
«Apquelleng'o la quetlhencap acnem anac Engiapom Neten apaioma, meliennactesanquec apualho'oc»
8
Mang nac nane ncomopuanac Josue elentalhnecsec enenlhet'awoc co israelitas iocjalhma nengiamposammalhquelha alheno lhquec, ca nqueniemai'ac aplheianmo mocjom Engiapom Neten mo'oc acnem jata cacpota elentelhec ma'a, mancolhoc ma'a acnem aplheianmo lhnac nanec secje lhta.
9
10
Colhua coca enenco'o nenwanlha nac nengellelto Engiapom Neten apquennemolhema acto iocjalhmec nengelleljalhanma' angelentelhec jata iocjalhma nengiamposammalhquelha nac ma'a, coca m'a jata angeliamposalhcac ma'a aniem'o nenmacmecama, ca aptemo lhnac nanec Engiapom Neten apiamposammacpo apenescamo actacja nnelha apmacmecama.
11
Jai, ntasec coca mota antengiancoc engiempeioc cacpota angelleltalhnenwomoc ma'a nengiamposammalhquelha, montanquec ma'a aptaiancolha lhnac nanec enenlhet'awoc apqueliasqueiacmec nac nanec ma'a.
12
Ca Engiapom Neten anac apaioma nietnec acmowana, jengaicamoc na aquiennactema ennengio'oc, malha actonac pelletaw acmowana ncoiaqtemenec neten anquec coca m'a, aselhtec ma'a pelletaw anac janet necja'ac la anmalhnemmalhca. Ncoclhec acuacmo connec anquec enwalhoc canjan acuacjo engiempejec, acuacmo connec anquec apualho'oc la enenlhet, canjan aquiecpelquemo alquetamecama apualho'oc canjan apuenmac'acja la ellanancoc.
13
Lhamacjo caselha apquelentepquescama lhta Engiapom Neten mancollawanquec ncolielhanenquesec napaqtec ma'a, apuanquec etac lhamacjo caselha iocjalhmec anquec, lhema acnem jata ncotnec angetlhenec angelleltennacsec nentaiancolha napaqtec ma'a.
Jesús apto apiau'acja sacerdote
14
Apnec ennenco'o apiau'acja sacerdote engancoc apiecai'o lhta m'a mo'oc au'alhoc anac neten, apuesai'a Jesús apto njan Engiapom Neten apquetca, ca ncanec ma'a ntasec angetlhenquesec nentaicamoc mongeliasqueiam aquieplomo nentengiaicamoc engiempeioc.
15
Ca apiau'acja apuesque sacerdote nac ma'a apuanquec elietnajoc nengaqta'a ennenco'o necsa mongeliennactema la'a, ncanec apuetai'a lhta apmanie aquiepconma m'a, nnawec ennenco'o colhuawe nac, coca m'a melanai'ac caselha ncolatsecama la m'a.
16
Ntasec angeltetescacjo mota ennenco'o m'a metca nengai'a napocja aptanema apnacja Engiapom Neten apto ngiapom jengamelaiam, apiosec jata njan jengellanjoc ennenco'o m'a, jengelpasmoc jata njan acuo'o la acnem aquientalhnema ncanec apto apiamolhma apancoie'.