¹ Ama lele ŋuto kata karin kanyit a Anania. Lepeŋ se ko narakwan nanyit Sapira a tugwöŋu kak nase, ² ama a ’de ’yi kunie gurut nagon a gworiesi, narakwan nanyit a den, a joŋdi pitönö kune a tiŋdi ko luyökie i komor. ³ Ama a Petero pije lepeŋ adi, Anania, nyo nagon Satani tojoreju töili ilot a tiŋdi do i mumulugga na Mulökötyo Loke, a do ’de ’yi kunie gurut nagon a gwöriesi ti kak kune? ⁴ I ŋerot nagon do a ko nyuŋ tugwöŋu ŋina kak nu lepeŋ na a inot, a i mukök nagon do aje tugwöŋu nu, gurut kune köti a lomore inot, ’bayin sona le? Nyo nagon do yeyeju koŋdya sona konut i töili? Do a ko mumulugga ŋutu, ama do mumulugga Ŋun. ⁵ A na yiŋge Anania kilo kulyaesi nu, a nye ’dorone kak a twane twan. A ŋutu liŋ lo yiŋga kine kulya kulo iŋge kujönö parik. ⁶ A teton poŋdi po a doggi opu nanyit ko boŋgo, a ’dokoddi kaŋo a nuŋge lepeŋ. ⁷ A i mukök na saalan gwoso musala, a narakwan nanyit luponi kadi, a ko den po nagon a kona kune. ⁸ A Petero pije lepeŋ adi, Taki nan, ta ’diri a wuju gurut mukune a gwöriesi ti kak le? A lepeŋ waddi adi, lye, yi a wuju gurut mukine. ⁹ a Petero pije lepeŋ adi, Nyo nagon ta a torukökin i möŋu na Mulökötyo lo Matat? Yiŋge mokosi ti ŋutu lo nugga lalet ilot kulo makilu popo i kötumit; lepeŋat köti de ’dokoro do kaŋo. ¹⁰ ’De ’de kijek a lepeŋ ’dorone kak ko Petero i mokosi a twane twan. A na lupe ’i kilo teton kadi nu, a ryeji lepeŋ aje twan, a lepeŋat ’dokoddi öpu nanyit kaŋo, a nukakiŋdye ko lalet i merete. ¹¹ A ŋutu liŋ lo momora a kanisa kulo se ko ŋutu liŋ lo yiŋga kune kulya kulo iŋge moka kujönö duma. ¹² A luyökie iŋge koŋdya kweyesi se ko sorosi jore ko ŋutu kiden. A se liŋ gwe i pirit na geleŋ i baraŋöa na luŋu a na Solomona na. ¹³ A lele ŋuto lo kaŋo gwe ’bayin logon a purutat i morakiŋdya ko lepeŋat, ma ’di ködyö ŋutu a pupurja se parik. ¹⁴ Ama a ŋutu jore logon a yubbö Matat kulo lyan ko wate yeŋe morakiŋdya ko lepeŋat. ¹⁵ Nyenagon a ŋutu logon ko twana yekwene i kikolin, a toperoni i dotoesi ko i birisiyat, anyen ma ’di ködudwö na Petero boŋo muggö kulye kase na wöröji ’e nye nu. ¹⁶ A lodir lo ŋutu iŋge po i köjinö na gwon i mara ti Yerusalema kune, yekuŋdya ŋutu kase logon ko twana se ko ŋutu logon a yöyöŋö ko mulökö lorok, a lepeŋat liŋ iŋge tokela. ¹⁷ A koane duma se ko ŋutu liŋ lo gwon ko lepeŋ logon a lapet na Sadokejin kulo suluje yulön ko po na kon luyökie kune, ¹⁸ a se momorgi lepeŋat a tiŋdi i kadi rereket nagon rerekani ŋutu abur. ¹⁹ Ama i ŋilu tukwaje a malaikatat lo Matat paji kotumiton ti kadi rereket, a joŋdi se kaŋo a kulyani adi, ²⁰ Iti ta tu gwo ’de ta i Kadi na Ŋun, ko jamaki ta ŋutu kulyaesi ti na gwiliŋit ludukotyo. ²¹ a na yiŋge se kine kulya nu, a se luponi i Kadi na Ŋun i kwokö, a suluje todiŋdyo. Nyena a koane duma ko ŋutu lo gwon ko nye kulo lo ’dure, a se luŋgi momoret na ŋutu temejik liŋ ti ŋutu ti Yisaraele i pirit na geleŋ, a se soŋdi ŋutu i kadi rereket anyen tu joŋdya lepeŋat. ²² A na poŋdi temejik ti kadi rereket nu, a se gwe a ko ryo lepeŋat i kadi rereket, nyena a se yitöni bot a takiŋdye se adi, ²³ Na tiri yi i kadi rereket nu, yi ryo kotumiton liŋ a titiko go, katiyuk titiju i kotumiton. Ama a na paji yi nu, a yi gwe a ko ryo lele ŋuto lukata. ²⁴ a na yiŋge duma lo katiyuk ti Kadi na Ŋun se ko koanejin temejik kine kulya nu, a se iŋge dyadya ’yu parik ko ’dutet na kine kulya mo gwon ada. ²⁵ a kirut lele ŋuto lo ’dure, a takiŋdye lepeŋat adi, Yiŋge ta, ŋutu logon ta a tikin i kadi rereket kulo kulu gwon i Kadi na Ŋun todiŋdyo ŋutu. ²⁶ A kirut duma lo katiyuk ti Kadi na Ŋun se ko ŋutu kanyit iti tu a joŋdi lepeŋat taliŋ ’bak koŋdya nene po, kogwon se kukujono ŋutu an se gugubatu ko nurupo. ²⁷ A nagon se aje joŋdya luyökie nu, a se togwo ’yi lepeŋat i komor na momoret na ŋutu temejik, a koane duma pije lepeŋat adi, ²⁸ Yi köju a saŋu ta go adi ti ta gwe ti todiŋdyo ko kine karin, ama ta aje todinikin todinesi kasu i Yerusalema liŋ, a ta yöŋöni joŋdya rima ti ŋilo ŋuto kayaŋ i kusik. ²⁹ Ama a Petero se ko luyökie kulye kulo waddi adi, Yi agu kodyo twöju Ŋun Iwolwoŋ ŋutu. ³⁰ Yesu logon ta a tatu i ’bikikiŋdyo na lepeŋ i ködini i? a görö lo, Ŋun lo merenyejin kaŋ aje topiju lepeŋ i twan. ³¹ A Ŋun iŋge toduma ’yu lepeŋ kanyit i könin lutaten a Kasaranit ko a Kalwökönit, anyen tiŋdu ŋutu ti Yisaraele i Iöpuggö na töilyet, anyen toronjin kase boŋo pipitöki. ³² Yi a ŋutu logon aje met kine kulya, yi se ko Mulökötyo Loke logon Ŋun a tikin ŋutu lo twoju nye kulo. ³³ A na yiŋge se kine kulya nu, a toilyet kase iŋge mien parik, a se yöŋöni tatuja lepeŋat. ³⁴ Ama a lele Parusityo lo ŋinu momoret karin kanyit a Gamaliele, katodinönit lo Saresi ti Mose logon ŋutu liŋ twötwö lo, ŋine ki a saŋi saŋu adi, ti kilo ŋutu jopani kaŋo ko diŋit a na ’dit. ³⁵ a nye jujuje ŋutu lo momora kulo adi, Ta ŋutu ti Yisaraele, kunyar ta i po nagon ta yöŋö konakiŋdya kilo ŋutu kune. ³⁶ Teuda köju a pukun a koŋdi mugun a ŋuto duma, a ŋutu gwoso miajin iŋwan iŋge morakiŋdya kanyit, ama a lepeŋ köju iŋge tatua a katwöyök kanyit liŋ iŋge rekin, a worani a po kana. ³⁷ a i mukök nanyit a Yuda lo Galilaya lo puku i diŋit wuret na karin ti ŋutu, a lepeŋ köju iŋge jiggö kulye ŋutu kanyit i mukök, ama a lepeŋ köti iŋge tatua, a katwöyök kanyit liŋ iŋge rekin. ³⁸ Soŋinana nan takiŋdya ta adi, ko konakiŋdya ta kilo ŋutu nene po, kölöki ta lepeŋat ka ’de; kogwon ko ŋina yeyeet se ko kita a ti ŋutu, a mo kakaŋi kakaŋu, ³⁹ ama ko se a ti Ŋun a ta mo tine bulö te ’ya kilo ŋutu, an ta ködyö ko rye a merok ti Ŋun. ⁴⁰ A se iŋge ruk jujuwesi ti Gamaliele. A se lupundye luyökie kulo a tiŋdi lepeŋat i ’bito, a sarakiŋdye lepeŋat anyen gwon ti jambu i karin ti Yesu, a kölöddi se. ⁴¹ Nyena a luyökie iti kaŋo i komor na momoret na ŋutu temejik, lyölyöŋiörö adi se a rye jujukin poŋga ’dö ’döyö kogwon kine karin. ⁴² Perok liŋ a lepeŋat gwe a ko kö ’yu todiŋdyö i Kadi na Ŋun se ko i midijik, a tine kö ’yu tokujö na Loŋe Lo ’but adi Yesu a Masia.