¹ A nagon Petero se ko Yoane nyuŋ gwon i jambu ko ŋutu nu, a koanejin ko duma lo katiyuk ti Kadi na Ŋun se ko Sadokejin poŋdi kase ni. ² Lepeŋat a woran kogwon Petero se ko Yoane gwon i todiŋdyö na ŋutu ko i laŋa adi lo twatwa pipien i twan kogwon Yesu ko mugun nanyit aje ŋien i twan. ³ A lepeŋat morgi se, a tiŋdi se i kadi rereket tojo ko ko ’bure, kogwon kak gwe a somukö. ⁴ Ama a ŋutu jore lo yiŋga ŋilo kulyaet kulo iŋge yubbö; nyena a kayupök liŋ aje ’dur gwoso aliŋan mukanat. ⁵ A ko gwe sona i ko ’bure, a kasarak ti Yudayaki ko ŋutu temejik se ko katodinok ti Saresi ti Mose momoruŋdye Yerusalema. ⁶ A lepeŋat momori i pirit na geleŋ ko Ana koane duma, ko Kayapa, ko Yoane, ko Alesaŋöero se ko kötumit liŋ na koane duma. ⁷ A nagon Petero se ko Yoane aje jwe kase i komor nu, a se pije lepeŋat adi, Ta koŋdya kine kulya ko riŋit nipa, kode ta kita i karin ti pa? ⁸ A kirut Petero iŋge jore ko Mulökötyo Loke, a waddi lepeŋat adi, Ta kasarak ti ŋutu kaŋ se ko ŋutu temejik, ⁹ ko ta ’dek pija yi i lo lor kogwon po na ’but nagon a konaki ŋuto lo bata lo ko nye tokela ada, ¹⁰ nyena ta liŋ se ko ŋutu liŋ ti Yisaraele dene ta den adi, ŋilo ŋuto gwo ’dan kasu i komor a loke kogwon karin ti Yesu Kristo lo Najareta. Ŋilo a Yesu logon ta köju a ’bikikin i ködini na görö logon Ŋun aje topi i twan lo. ¹¹ Lepeŋ a ŋurupit logon ta ka ’dukök a renya lo, ama aje wora a ŋurupit tutuŋet lo goŋet lo kadi. ¹² Lwökit ’bayin ko lele ŋuto kwöŋ, kogwon kunie karin ’bayin i kak ni nagon a tiki ŋutu anyen agu ködyö lwöggu yi. ¹³ Nyena a se ko meddi topurwan nase Petero ko Yoane, ko a den adi lepeŋat a ŋutu logon a ko todinö ko ti den kulya nu, a se iŋge söŋu; a kirut se iŋge kurun adi lepeŋat köju gwon ko Yesu i pirit na geleŋ. ¹⁴ A lepeŋat iŋge met ŋilo ŋuto logon aje tokela lo gwogwo ’dan ko Petero se ko Yoane i pirit na geleŋ, a kutusen kase iŋge ’dija. ¹⁵ Nyena a se takiŋdye lepeŋat anyen wuwuddya i pirit jamet na putet, a se morani ko ’börik adi, ¹⁶ Yi kon kulo ŋutu ada? Kogwon ŋutu liŋ lo si ’da Yerusalema kulo aje den adi lepeŋat lo koŋdya ŋina kweyet sörit, a yi tine bulö renya nye. ¹⁷ Ama ti yi tokujöŋdi ta lepeŋat adi ti se. gwe ti jambu ko lele ŋuto köti i kine karin, anyen kine kulya gwon ti rekin ko ŋutu kiden. ¹⁸ Nyena a se lupundye lepeŋat, a saŋi saŋu an se jambu kode todiŋdyö kwoŋ i karin ti Yesu. ¹⁹ A Petero se ko Yoane kölumbö waddi lepeŋat adi, Ta ko mugunya kasu lilije ta ko po a nyo nagon a na ’but ko Ŋun i metet: adi i yiŋga na ta kode i yiŋga na Ŋun? ²⁰ Ko gwe gwoso yi, nyena yi ti bulö kölökiŋdyö i jambu na po nagon yi ko mugunya kaŋa met ko a yiŋ kune. ²¹ A se tokujoŋdi se köti, a kölöddi se, ti ryö kiko logon se riŋge lepeŋat kogwon se kukujönö ŋutu; kogwon ŋutu liŋ pupurja Ŋun i po na kona kune. ²² Kogwon ŋuto logon a tokela i kiko logon a sörit lo gwon ko kipajin lwölwöŋ merya iŋwan. Kayupok a mo ’yu Ŋun anyen se gwon a purwat. ²³ A na kölöri Petero se ko Yoane nu, a se yitöni ko ŋutu kase yu, a nyönyökökiŋdye lepeŋat po liŋ nagon koanejin temejik se ko ŋutu temejik a kulyari ko se kune. ²⁴ A na yiŋge se nu, a se poki i kwakwaddu na Ŋun ko töili geleŋ adi, Pon Matat, do a gweja ko ki ko kak, ko toron ti ’balaŋ se ko po liŋ nagon gwon i lukata nase kune. ²⁵ Do köju a jambu ko riŋit na Mulökötyo Loke ko merenye likaŋ Dawidi koliŋonit ilot i kutuk adi, Nyo nagon ŋutu ti jurön woworan? Nyo iŋweyajin ti ŋutu yeyeju mwon ko kana? ²⁶ Moran ti kak a ’dakakin i mörö, a kasarak momori i pirit na geleŋ i mörö ko Matat se ko Masia lonyit. ²⁷ ’Diri Erode ko Pontio Pilato momoruŋdya i na köji mora ko Lwaka se ko ŋutu ti Yisaraele i mwon ko Yesu köliŋonit ilot loke, logon do a welakin a Masia lo. ²⁸ Lepeŋat momora anyen koŋdya po liŋ nagon do ko riŋit inot se ko yeyeet inot aje teteŋdya ajo anyen kokona kune. ²⁹ Nyenagon pon Matat, mete met tokujöŋdu nase na yi, ko tiki yi köliŋönök kulök i jambu na kulyaet ilot ko topurwan a duma. ³⁰ Riu könin ilot i toligga, ko ti sörösi ko kweyesi konani kona i karin ti köliŋonit ilot loke Yesu. ³¹ A nagon se aje jo kwakwaddu nu, a pirit nagon se a momora kata na boŋdi böŋdu, a se liŋ iŋge jore ko Mulökötyo Loke, a jambi kulyaet lo Ŋun ko topurwan. ³² A teŋ na kayupök gwe ko yeyeet geleŋ ko töili geleŋ, a lele gwe ’bayin logon kulya adi po kanyit a kanyit ka ’de, ama po liŋ papara. ³³ a luyökie iŋge tokujö ko riŋit a duma adi Yesu ’diri a ŋien i twan, a ’busan na Ŋun gwe a duma ko se liŋ. ³⁴ a lele ŋuto gwe ’bayin kase kiden logon yöŋö ŋo, kogwon ŋutu lo gwon ko meleseno kode kadijik kulo tutugwör se, a joŋdi gurut nagon se a wu kune ³⁵ a tiŋdi ko luyökie i komor, a kokorakine i ŋutu liŋ geleŋ geleŋ gwoso i ’dekesi kase. ³⁶ A lele ŋuto kata karin kanyit a Yosepa, logon luyökie luŋ a Barnaba. (Barnaba nyönyökö adi kato golonit.) Ŋilo ŋuto a Lewityo ko a ŋuto lo Kuprio. ³⁷ A nye tugwöŋi melesen nanyit, a joŋdi kine gurut a tiŋdi ko luyökie i komor.