¹ A gwe sona i saa musala nakoriri i diŋit kwakwaset, a ko Petero se ko Yoane iti i Kadi na Ŋun. ² A lele ŋuto logon ’beron a bata i mokosi suluja ko ŋote i pele lo yeŋ yeka yu temba i lor. Lepeŋ a topiriki i kotumit na mariŋ na Kadi na Ŋun, ŋina kötumit luŋu a Nakwekwelen na, anyen popolija ŋutu logon lupö i Kadi na Ŋun kulo. ³ A na meddi nye Petero se ko Yoane i lupo i Kadi na Ŋun nu, a nye mo ’yi lepeŋat. ⁴ a Petero ko Yoane diŋe lepeŋ go a kulyani adi, Meddi yi. ⁵ A nye diŋe lepeŋat go, yeŋdu wuju nene po kase. ⁶ Ama a Petero takiŋdye lepeŋ adi, Nan ’bak gurut nagon a pödö kode a dakap, ama nan titikin do po nagon kata köyö na; nan saŋu do i karin ti Yesu Kristo lo Najareta adi, Wöröni wörö. ⁷ A nye morgi lepeŋ i könin lutaten a ’biluŋdye lepeŋ ki; ’de ’de kijek a mokosi kanyit se ko korokolo kanyit gole golon. ⁸ A nye labara ki, a gwo ’de gwo ’dan, a wöröni wörö, a kirut lupöni i Kadi na Ŋun ko se i pirit na geleŋ, wöwöröji ko lalabara ko pupurja Ŋun. ⁹ A ŋutu liŋ meddi lepeŋ i wörö ko i pupurja na Ŋun, ¹⁰ a se iŋge gwulu adi lepeŋ a kaŋoŋolianit lo sisi ’datu i kötumit na luŋu a Nakwekwelen na mariŋ na Kadi na Ŋun na, a töilyet kase iŋge rusukö a se soŋi soŋu i po na konaki lepeŋ na. ¹¹ A na ’depakiŋdye ŋilo ŋuto i morga na Petero se ko Yoane nu, a ŋutu liŋ iŋge söŋu a wöki ko lepeŋ yu i baraŋöa na luŋu a na Solomona na. ¹² A na meddi Petero ŋutu nu, a nye pije lepeŋat adi, Ta ŋutu ti Yisaraele, nyo nagon ta sösöŋu ko kine kulya? Kode nyo nagon ta dir yi sona gwoso nagon yi lo tiŋdu ŋilo ŋuto i wörö ko riŋit nikap se ko twöju nikap na Ŋun? ¹³ Ŋun lo Abarayama, ko a lo Yisaka, ko a lo Yakobo, ko a Ŋun lo merenyejin kaŋ lo a toduma ’yu köliŋönit lonyit Yesu, a ta iŋge ŋutu kin lepeŋ i konisi ti ŋutu, a renyani lepeŋ ko Pilato i komor, ma ’di i mukök nagon Pilato a yeyeju kölöddu lepeŋ nu. ¹⁴ Ama a ta renyani Ŋuto Loke ko a Lorigwo, a ta kölumbö muluŋdye katatuanit anyen tiki ta. ¹⁵ a ta tatuje Monye ru, ama Ŋun aje topi lepeŋ i twan, a yi iŋge met kine kulya. ¹⁶ Karin ti Yesu se ko yubbo na kine karin aje togo ’yu ŋilo ŋuto logon ta a met ko a den ŋilo. Yubbo na kine karin na toke ’ya lepeŋ a loke ’diri, a ta liŋ memeddya. ¹⁷ Nyena luŋasirik, nan a den adi ta se ko kasarak kasu a koŋdya ’bak denesi. ¹⁸ Ama Ŋun aje tiŋdu kine po i kona gwoso na jambi nye ko nebijin liŋ i kutusen köju nu, adi Masia lonyit ködyö ŋoŋoŋga. ¹⁹ Nyenagon löpuŋge ta töilyet ko löpukwene ta ko Ŋun ni, anyen toronjin kasu boŋo seyaji kaŋo. A Matat mo tiŋdi ta diŋit toruet, ²⁰ a sunyukiŋdye ta Masia logon nye aje wulökin ta lo logon a Yesu. ²¹ Lepeŋ agu ködyö möŋdu ki yu tojo ko diŋit a po nagon tetenarikin po liŋ a ludukö gwoso nagon Ŋun a jambu ko nebijin kanyit loke i kutusen köju ’beron nu. ²² Kogwon Mose köju a kulya adi, Matat Ŋun mo totopukökin ta lele nebi gwoso na topuköki ’e nan i kiden na kötumit nasu nu, a ta mo yiŋge po liŋ nagon nye mo jamakin ta kune. ²³ A mo gwe sona adi, ŋutu liŋ logon mo ti ’bon yiŋga ŋilu nebi kulo mo tutukara asut ko ŋutu kiden. ²⁴ Nebijin liŋ köju a jambu sona suluja ko Samuele se ko nebijin logon po kanyit i mukök kulo; lepeŋat liŋ a tuggö po nagon mo kokona i kulo perok. ²⁵ Taa ŋutu lo paruŋdya kulya na jam nebijin kune, ta paruŋdya tomoret nagon Ŋun a milyekin merenyejin kasu na, na takiŋdye nye Abarayama adi kötumiton liŋ ti kak mo ’bo ’boria kogwon nyakwariat kanyit. ²⁶ Nyena a Ŋun iŋge ’bilikiŋdya Koliŋonit lonyit a sunyukiŋdye ta a kokwe anyen ko ’boroja ta i löpukuŋdyö na ta liŋ kaŋo i toronjin kasu.