¹ A nagon aje tetena adi yi ködyö laŋaddu tör na ’balaŋ tojo Italia ko ki ’bo nu, a se ŋutukiŋdye Paulo se ko kulye ŋutu lo rereka kulo i könin lo lele duma lo kamörök mia geleŋ karin kanyit a Yuliŋ. Lepeŋ a lo teŋ na kamörök lo luŋu a Teŋ na Augusito. ² A yi kije i ki ’bo lo Adaramitio logon möŋdi ajo anyen tiri i köjinö ti Asia na gwon nyona ko tör nagon ki ’bojin monoa kata kunu. A yi ŋiörö ŋiörö mora ko Aristaruko ŋuto lo Makedonia logon si ’da Tesalonike. ³ Ko ’bure a ki ’bo monoani Sidona, a Yuliŋ konakiŋdye Paulo ’bura, a iŋge kölörö lepeŋ i meddya na julin kanyit anyen paparaki. ⁴ a yi ŋiörö ŋiörö nyu, a ki ’bo iti i swöt lo Kuprio logon köbuŋöt duma ti wukuŋdyö nyin lu, kogwon köbuŋöt wukuŋdyö kayaŋ ni. ⁵ A yi laŋaddi i tör kiden a kölökiŋdye Kilikia se ko Pampulia, a yi ’dure Mura na gwon Lukia yu nu. ⁶ A duma lo kamörök ryeji ki ’bo nyu lo po Alesaŋduria ’dek tu Italia, a tiŋdi yi i lukata nanyit. ⁷ a yi wöröni ko ki ’bo madaŋ kulye perok, a yi ryöni a nago i ’dur nyona ko Kinido, a nagon köbupöt tine kölörö yi i tu ŋerot nu, a yi iti ko ki ’bo i lu swöt lo Kurete logon köbuŋöt ti wukuŋdyö nyin lu nyona ko Salamone. ⁸ A yi wöröjine nyona ko kijit, ama a yi ryöni a nago i tu, a yi ’dure i pirit na luŋu a Kijit monowet na ’but, nyona ko köji na Lasea. ⁹ A nagon diŋit a najo aje lwöŋgu nu, a kulya ti tu nikaŋ ŋerot gwe a nagusu kogwon diŋit Minyet aje lwöŋgu, nyena a Paulo jujuje lepeŋat adi, ¹⁰ Pon temejik kwe, nan aje met adi jölö nikaŋ ŋerot mo gwon a nago; ti gwon a ki ’bo se ko tito lo gwon i lukata nanyit kulo mo lo körö kode toliki ka ’de ama koyi köti. ¹¹ Ama a duma lo kamörök mia geleŋ lo yiŋge kulya na jam duma lo ki ’bo se ko monye ki ’bo kune lwölwöŋ kulya na jam Paulo. ¹² Nyena kogwon ŋinu kijit monowet ’bayin a na ’but i meliparikin, a lojore ti ŋutu jujuje adi ti yi ŋiörö ŋiörö anyen yi ŋona ryeju komor na ’but i ’dur Poinike anyen joŋga meliŋ yu. Poinike a kijit na Kurete monowet na ki ’bojin komorga swöt lo loki ko lo tokotyaŋ ko i swöt lo lobot ko lo tokotyaŋ. ¹³ A nagon köbuŋöt lo wukuŋdyö madaŋ i swöt lo loki lo suluje wukuŋdyö nu, a ŋutu ti ki ’bo kulo yeyeji adi se aje ryeju komor na ’but na ’deggi se na, a se pikuŋdye witi monowet lo ki ’bo kaŋo i tör, a ki ’bo iti ŋerot nyona ko kijit na Kurete. ¹⁴ A ’de ’de köbuŋöt wome wukuŋdye kaŋo i kijit. Ŋilo köbuŋöt po i swöt lo ’yure ko lo lobot, ¹⁵ a wuköddi ki ’bo, a nagon yi möŋi ri ’dikiŋdya ki ’bo i tu i swöt lo wukuŋdye köbuŋöt nu a yi tine bulö, a yi kölökiŋdye köbuŋöt i wuköddu na yi. ¹⁶ A yi iti i lu swöt lo tikön lo ’dit lo luŋu a Kauda, logon a muk köbuŋöt, a yi ryöni a nago i toŋa na ki ’bo lo ’dit logon pikö ko ki ’bo duma an ’dirön. ¹⁷ A ŋutu ti ki ’bo pikuŋdye ki ’bo lo ’dit i ki ’bo duma lukata. A kirut a se doggi ki ’bo duma go ko patala. Lepeŋat a kujönö adi se de ŋona wuwuköji i piritön nanye ’delak na gwon Surti, nyena a se lakuŋdye boŋgwat wukiesi ti ki ’bo kune kaŋo, a kölökiŋdye ki ’bo i wuköji. ¹⁸ A köbuŋöt tiŋdi ki ’bo i yeyeleŋta parik, a ko ’bure a se suluje ’dumba tito kaŋo i ki ’ŋo lukata a gumbe i tör. ¹⁹ Ko ’bure nanyit a lepeŋat ko ’börik gumbe tito kitaesi ti ki ’bo kulo i tör kata. ²⁰ Perok jore yi a ko met kolor kode kaser, a köbuŋöt yeŋe wuggö parik, a yeŋdu nikaŋ na lwökö iŋge ’duddyö. ²¹ A nagon ŋutu aje joŋga diŋit a najo ’bak nyesu kinyo nu, a Paulo gwo ’de gwo ’dan kase kiden, a kulyani adi, Yakulo, ko ta ködyö a yiŋ kulya kwe adi ti yi gwe ti kö ’yu Kurete, a yi ködyö tine ko ryö na körit se ko toliki na tito. ²² Ama soŋinana nan jujuja ta anyen ta togo ’yu töilyet, kogwon lele losu mo ti toliki ama ka ’de ki ’bo lo toliki. ²³ Kogwon kaje i tukwaje malaikatat lo Ŋun logon nan gwon a lonyit a twöji lepeŋ lo gwo ’dan köyö nyona. ²⁴ A malaikatat kulyani adi, Paulo, ko kujönö, kogwon do agu ködyo gwo ’dan ko Kaisar i komor; nyena mete, Ŋun aje rukökin do adi ŋutu liŋ logon moraddu ko do i ki ’bo kulo mo ti twatwa. ²⁵ Nyenagon ta yakulo, togo ’yi ta töilyet, kogwon nan a yuŋ Ŋun adi de gwon gwoso na taki ’e nan na, ²⁶ ama tör de gubara ki ’bo kaŋo tojo i tikön. ²⁷ A nagon gwe a tukwaje topuök wot iŋwan nu, a yi nyuŋ gwon i wuköji i tör na ’balaŋ na luŋu a Adaria, a i tukwaje kiden a tomonok ti ki ’bo yeyeji adi se gwe nyona ko kijit. ²⁸ Nyena a se ’dibbe tör, a togulu nanyit gwe gwoso tojolan na ŋutu merya murek. Diŋit a na ’dit a se köti ’dibbe ’dibbö, a togulu nanyit gwe a tojolan na ŋutu puök wot mukanat. ²⁹ A tomonok kujönöni adi tör ŋona de gubara ki ’bo kaŋo tojo i pirit nagon a ŋurupö. A lepeŋat kölöddi witiöt iŋwan kak i kotet na ki ’bo logon a monowesi, a momo ’yi anyen kak baŋun. ³⁰ A tomonok ga ’yi wökön kaŋo i ki ’bo, a kölöddi ki ’bo lo ’dit kak i tör kata, mumulugga adi se kölöddu kulye witiot i ŋerot na ki ’bo, ³¹ ama a Paulo takiŋdye duma lo kamörök mia geleŋ se ko ŋutu kanyit adi, Ko kilo tomonok a ko gwon i ki ’bo kata a ta tine bulö lwökö. ³² Nyena a kamörök ’duŋge nekenejin ti ki ’bo lo ’dit kune a kölöddi lepeŋ i tu. ³³ A nagon kak gwe nyona ko waran nu, a Paulo mo ’yi se liŋ parik anyen nyesu kinyo, a kulyani adi, Ta soŋinana aje si ’da perok puök wot iŋwan a ko den ŋo nagon pokin kasu loki kune, a ta gwe a ko nyesu nene ŋo. ³⁴ Nyena nan mamaŋdu ta anyen nyesu kinyo, kogwon ko ta a nyesu a ta gwe a iŋgo, kogwon ma ’di lele losu kupiret lonyit geleŋ mo ti likin kanyit i kwe. ³⁵ a nye kulyani sona, a ’dumuŋdye ambata, a tiŋdi Ŋun tinate ko ŋutu liŋ i komor a pipiŋdye pipiŋdya, a suluje nyesu. ³⁶ A lepeŋat liŋ iŋge togolo a poki i nyesu na kinyo. ³⁷ a yi liŋ gwe a ŋutu miajin murek ko merya buryo wot buker i ki ’bo kata. ³⁸ A nagon ŋutu liŋ aje jo nyesu nu, a se gumbe ’bolot i tör kata anyen ki ’bo gwon pa ’de ’de. ³⁹ A nagon kak aje waran nu, a tomonok tine den ŋilu jur, ama a se meddi nene pirit nagon a sese nagon kare ’bulökiŋdyö i tör. A lepeŋat yeyeji adi ko bubulö se ködyö yöŋö joŋga ki ’bo nyu. ⁴⁰ Nyena a se gubaddi patala ti witiöt lo monoari ki ’bo kulo a kölökiŋdye se i pioŋ kata, a lepeŋat köti laggi nekenejin ti laya dumalak nagon tuwöröju ki ’bo, a ’bilikiŋdye boŋgo ki i kwe na ki ’bo, anyen köbuŋöt ködyö wukörö ki ’bo ŋerot, a se suluje tu i kijit. ⁴¹ A se wuköjine i kiden na wökiesi murek ti pioŋ, a kume lo ki ’bo ’depakiŋdye go i sese, ama a kotet iŋge ’be ’beleŋo ka ’de ka ’de kogwon yala lo tör yaya ’yu ko riŋit a duma. ⁴² A kamörök yeyeji tatuja ŋutu lo rereka kulo, anyen lele lose gwon ti wasaddu i kijit a wöki wökön. ⁴³ Ama a duma lo kamörök mia geleŋ teŋgi se i koŋdya na yeyeet nase kogwon nye ’de ’dekan lwöggu Paulo. A nye sarakiŋdye adi ko ŋutu logon bubulö wasaddu ti lepeŋat labara i pioŋ kata anyen ’dur i kijit a kokwe, ⁴⁴ a ti kulye lo kebbi morga baulan kode kunie tupesi ti ki ’bo logon a ’be ’beleŋo. A gwe sona, nyena a ŋutu liŋ iŋge lwököddu ’börik i kijit.